ហ៊ុលរស្មីនិង Kate Bartlettរដ្ឋាភិបាលបានណែនាំឲ្យម្ចាស់អាជីវកម្មទាំងអស់ ដែលបម្រើសេវាកម្មអីុនធើណិត និងទូរសព្ទ័សាធារណៈ ឲ្យដំឡើងកាមេរ៉ាសុវត្ថិភាពនៅបរិវេណធ្វើអាជីវកម្មរបស់ខ្លួន ដើម្បីថតអត្តសញ្ញាណអ្នកប្រើប្រាស់ នៅក្នុងកិច្ចខំប្រឹងប្រែងមួយ ដើម្បីបង្ក្រាបអំពើភេរវកម្ម និងបទឧក្រិដ្ឋតាមអុីនធើណិត នេះបើយោងតាមសារាចរមួយរបស់រដ្ឋាភិបាលដែលទទួលបានកាលពីម្សិលមិញ។
យោងតាមសារាចរណែនាំចុះថ្ងៃទី២៨ខែកុម្ភៈ របស់ក្រសួងមហាផ្ទៃ និងក្រសួងប្រៃសណីយ៍ និងទូរគមនាគមន៍នេះ បានឲ្យដឹងថា ក្រុមហុ៊នទូរគមនាគមន៍ សាខាលក់និងចែកចាយបន្តទាំងអស់ ត្រូវចុះបញ្ជីអាសយដ្ឋានអាជីវកម្មរបស់ខ្លួន។
យោងតាមសារាចរណែនាំចុះហត្ថលេខាដោយលោក សូរ ឃុន រដ្ឋមន្ត្រីក្រសួងប្រៃសណីយ៍ និងទូរគមនាគមន៍ និងលោកស ខេង រដ្ឋមន្ត្រីក្រសួងមហាផ្ទៃនេះ បានឲ្យដឹងថាទីតាំងទាំងអស់ដែលបម្រើសេវាអុីនធើណិតនិងទូរសព្ទ័សាធារណៈ ដូចជាហាងអីុនធើណិតនិងផ្ទះសំណាក់ជាដើមនោះ ត្រូវតែដំឡើងកាមេរ៉ាដើម្បីថតរូបអតិថិជននីមួយៗ និងរក្សាទុករូបភាពទាំងនោះយ៉ាងហោចណាស់រយៈពេលបីខែ។
យោងតាមសារាចរដដែលនេះបានឲ្យដឹងទៀតថា អាជីវកម្មតូចតាចតាមចិញ្ចើមផ្លូវទាំងអស់ ក៏ត្រូវកត់ត្រាអត្តសញ្ញាណអ្នកប្រើប្រាស់ និងថតរូបអ្នកប្រើប្រាស់នោះទុកដែរ។ចាំបាច់ត្រូវតែអនុវត្តតាមវិធានការថ្មីនេះជាបន្ទាន់។
សារាចរណែនាំនេះមានខ្លឹមសារទៀតថា “ បទពិសោធន៍នៃការស៊ើបអង្កេត និងការបង្ក្រាបលើបទល្មើសផ្សេងៗក្នុងពេលកន្លងមក បានបង្ហាញថា ឧក្រិដ្ឋជនជារឿយៗប្រើប្រាស់សេវាទូរគមនាគមន៍ដូចជា ទូរស័ព្ទដៃ ការទូរស័ព្ទតាមអីុនធើណិត និងអីុនធើណិត ជា
មធ្យោបាយប្រព្រឹត្តអំពើភេរវកម្ម បទឧក្រិដ្ឋឆ្លងដែន អំពើប្លន់ចាប់ជំរិតឃាតកម្មគ្រឿងញៀនការជួញដូរមនុស្សបទល្មើសសេដ្ឋកិច្ច និងការបញ្ជូនរូបភាពអាសអាភាស និងទង្វើអនាចារផ្សេងៗទៀត ដែលធ្វើឲ្យប៉ះពាល់ដល់ប្រពៃណីជាតិ និងសីលធម៌ក្នុងសង្គម”។
សារាចរនេះក៏បានលើកឡើងដែរថា អ្នកបម្រើសេវាកម្មអីុនធើណិត និងទូរស័ព្ទទាំងអស់ ត្រូវតែមានការប្រុងប្រយ័ត្នក្នុងការប្រមូលព័ត៌មានលម្អិតផ្ទាល់ខ្លួនរបស់អតិថិជន និងមានពេលមួយខែសម្រាប់ពិនិត្យមើលឯកសារសម្គាល់ខ្លួនចាស់ៗរបស់អតិថិជន ដើម្បីធ្វើឲ្យប្រាកដថា អតិថិជននីមួយៗត្រូវបានចុះឈ្មោះត្រឹមត្រូវ។
លោកស្រី សុខ ចាន់ដា ប្រធាននិងជានាយិកាប្រតិបត្តិនៃក្រុមហ៊ុន មេគង្គ ណិត (Mekong Net) បានលើកឡើងថា លោកស្រីមិនជឿថា បទបញ្ជាថ្មីនេះនឹងធ្វើឲ្យប៉ះពាល់ដល់អ្នកផ្តល់សេវាអីុនធើណិត ដោយសារច្បាប់តម្រូវឲ្យកត់ត្រាអត្តសញ្ញាណអតិថិជនរបស់ខ្លួននោះទេ ប៉ុន្តែនឹងប៉ះពាល់ដល់អាជីវកម្មតូចៗដូចជាហាងអីុនធើណិតជាដើម។
លោកស្រីបានលើកឡើងបន្ថែមទៀតថា “ ពួកគេនឹងត្រូវចំណាយប្រាក់ទិញកាមេរ៉ា និងដំឡើងសឺវើ (server) និងហាតដ្រាយ (hard drive) ធំ។ទោះបីជាពួកគេថតរូបអ្នកប្រើប្រាស់សេវាកម្មរបស់ខ្លួនបានច្បាស់ក្តី តើធ្វើម៉េចយើងដឹងថា ពួកគេនៅទីណា។មានមនុស្សរាប់លាននាក់ប្រើប្រាស់អីុនធើណិត។ វាពិបាកនឹងគ្រប់គ្រងឲ្យបានគ្រប់ជ្រុងជ្រោយណាស់”។
លោក ជួ ឧត្តម នាយកគ្រប់គ្រងនៅក្រុមហ៊ុន Friends Travel and Tours ដែលមានបើកហាងអីុនធើណិតមួយនៅតាមផ្លូវមាត់ទន្លេក្នុងរាជធានីភ្នំពេញ បាននិយាយថាបទបញ្ជាថ្មីនេះនឹងធ្វើឲ្យប៉ះពាល់ដល់អាជីវកម្មរបស់គាត់ ហើយវាពិបាកនឹងអនុវត្តតាមណាស់។
គាត់បានលើកឡើងថា “យើងមិនចំណេញច្រើនប៉ុន្មានទេ ដូច្នេះយើងគ្មានលទ្ធភាពដាក់កាមេរ៉ានោះទេ ហើយប្រសិនបើយើងសុំអត្តសញ្ញាណប័ណ្ណពីភ្ញៀវ ឬត្រូវពិនិត្យមើលឯកសារបន្ថែមទៀតពីពួកគេនោះ ភ្ញៀវនឹងមិនចូលមកហាងរបស់យើងទេ”។
ពេលសួរអំពីអំណាចច្បាប់នៃសារាចរណែនាំនេះ លោក សុក សំអឿន នាយកប្រតិបត្តិក្រុមអ្នកច្បាប់ការពារសិទ្ធិកម្ពុជា
បានមានប្រសាសន៍ថា វាអាស្រ័យថាតើការថតរូបអ្នកប្រើប្រាស់អីុនធើណិតនិងសេវាទូរស័ព្ទសាធារណ:នេះ ត្រូវអនុវត្តដោយចំហ
ឬយ៉ាងណា។
លោកបានមានប្រសាសន៍ថា “ ប្រសិនបើត្រូវធ្វើដូច្នេះមែននោះ ម្ចាស់ហាងត្រូវប្រាប់អតិថិជនទើបបានប៉ុន្តែគេមិនអាចថតដោយសម្ងាត់បានទេ។ប្រសិនបើអតិថិជនយល់ព្រម គេអាចថតបាន។
លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រីបាននិយាយការពារសារាចរនេះ ដោយលើកឡើងថា ការធ្វើបែបនេះមិនមែនជាការរំលោភបំពានភាពឯកជននោះទេ៕
ប្រែសម្រួលដោយ តែមសុខុម