ប្រធានអង្គភាពប្រឆាំងអំពើពុករលួយរបស់រដ្ឋាភិបាល (ACU) បាននិយាយកាលពីថ្ងៃច័ន្ទថា ខ្លួននឹងស៊ើបអង្កេតថាតើ អតីតប្រធានតុលាការក្រុងភ្នំពេញដែលរបូតតំណែងយ៉ាងទាន់ហន់កាលពីសប្តាហ៍មុននោះ បានទទួលសំណូកទាក់ទិននឹងរឿងក្តីឃាតកម្មដ៏ធំមួយឬយ៉ាងណា។
លោក អាំង មាលតី ត្រូវបានដកចេញជាផ្លូវការពីតំណែងប្រធានតុលាការក្រុងកាលពីថ្ងៃទី១៧ខែកុម្ភៈ មួយថ្ងៃបន្ទាប់ពីលោកនាយករដ្ឋមន្ត្រី ហ៊ុន សែន បានមានប្រសាសន៍ក្នុងសុន្ទរកថាថា តុលាការក្រុងប្រហែលបានទទួលប្រាក់រាប់លានដុល្លារក្នុងការប្រែក្រឡាសសេចក្តីសម្រេចសុំនៅក្រៅឃុំ។
ក្នុងសុន្ទរកថានោះ លោក ហ៊ុន សែន បានលើកឡើងថា ល្បឿនដែលតុលាការប្រែក្រឡាសសេចក្តីសម្រេចបដិសេធការសុំនៅក្រៅឃុំរបស់ឪពុកម្តាយឧត្តមសេនីយ៍ទោ ថោង សារ៉ាត់ ដែលជាប់ចោទថាបានរៀបចំធ្វើឃាតឧកញ៉ា អុឹង ម៉េងជឺ កាលពីខែវិច្ឆិកានោះ គឺលឿនពេកហើយ។
ឪពុកម្តាយរបស់ឧត្តមសេនីយ៍ទោ សារ៉ាត់ គឺលោក ថោង ចំរើន និង អ្នកស្រី កែវ សារី ជាប់ចោទពីបទកាន់កាប់អាវុធខុសច្បាប់ បន្ទាប់ពីប៉ូលិសឆ្មក់ចូលភូមិគ្រឹះនៅក្រុងភ្នំពេញរបស់គ្រួសារពួកគេកាលពីខែធ្នូ។ អ្នកទាំងពីរត្រូវបានចាប់ខ្លួនសាជាថ្មីនៅថ្ងៃទី១៥ខែកុម្ភៈ ខណៈដែលពួកគេព្យាយាមភៀសខ្លួនទៅប្រទេសវៀតណាម ក្រោយពីបាននៅក្រៅឃុំនោះ។
ថ្លែងទៅកាន់អ្នកកាសែតនៅទីស្នាក់ការក្រុងភ្នំពេញរបស់អង្គភាពប្រឆាំងអំពើពុករលួយកាលពីថ្ងៃច័ន្ទ លោក ឱម យ៉ិនទៀង ប្រធានអង្គភាពនេះ បានមានប្រសាសន៍ថា ការស៊ើបអង្កេតនឹងចាប់ផ្តើមលើក្រុមហ៊ុនអភិវឌ្ឍន៍លំនៅដ្ឋានរបស់ឧត្តមសេនីយ៍ទោរូបនេះ គឺបុរី៩៩៩។
សំដៅលើបុរី៩៩៩ លោក ឱម យ៉ិនទៀង បានមានប្រសាសន៍ថា “ខ្ញុំចង់ទៅក្រុមហ៊ុនរបស់ ថោង សារ៉ាត់ និងពិនិត្យមើលបង្កាន់ដៃទាំងអស់”។
ដោយប្រើពាក្យសម្រាលមានន័យថាការបង់ប្រាក់ លោកបានបន្ថែមថា “បន្ទាប់ពីការស៊ើបអង្កេត ខ្ញុំគិតថា ពេជ្រ ព្រហ្មមុន្នី និង អាំង មាលតី នឹងឆ្លើយសំណួររបស់ខ្ញុំថាតើ ពួកគេបានទទួល ‘សេវាត្រឹមត្រូវ’ ឬទេ”។
កាលពីថ្ងៃព្រហស្បតិ៍ កម្លាំងរាជអាវុធហត្ថនៅខេត្តតាកែវបានចាប់ខ្លួនឧត្តមសេនីយ៍ត្រី ព្រហ្មមុន្នី ជាមន្ត្រីយោធាក្នុងជួរកងខេមរភូមិន្ទ ដែលជាផ្នែកមួយនៃសន្តិសុខរបស់លោក មាលតី។
លោក ខេង ទីតូ អ្នកនាំពាក្យកងរាជអាវុធហត្ថលើផ្ទៃប្រទេសបានមានប្រសាសន៍កាលពីសប្តាហ៍មុនថា ការចាប់ខ្លួនមន្ត្រីយោធានេះទាក់ទិននឹងការដោះលែងឪពុកម្តាយរបស់ឧត្តមសេនីយ៍ សារ៉ាត់។ ឧត្តមសេនីយ៍ត្រី ព្រហ្មមុន្នី ជាប់ចោទកាលពីថ្ងៃសៅរ៍ពីបទជ្រៀតជ្រែកក្នុងកិច្ចការមន្ត្រី និងការប្រើប្រាស់រថយន្តមានស្លាកលេខប៉ូលិស ឬ ខ.ម.ដោយខុសច្បាប់។
លោក ឱម យ៉ិនទៀង បាននិយាយថា អង្គភាពប្រឆាំងអំពើពុករលួយនឹងសួរម្តាយរបស់ឧត្តមសេនីយ៍ទោ សារ៉ាត់ គឺអ្នកស្រី សារី ភរិយាទី២ ទាវ ធីតា និង មេធាវី រស់ ផល្លា ផងដែរ។
ថ្លែងនៅថ្ងៃច័ន្ទក្នុងពិធីចែកសញ្ញាបត្រក្នុងក្រុងភ្នំពេញ លោក ហ៊ុន សែន បានការពារខ្លួនលោកទៅនឹងអ្នករិះគន់មិនចេញឈ្មោះ ដែលបាននិយាយថា សុន្ទរកថាថ្ងៃទី១៧ខែកុម្ភៈរបស់លោកមានឥទ្ធិពលផ្ទាល់លើតុលាការ គឺជាការរំលោភអំណាច។
លោក ហ៊ុន សែន បានមានប្រសាសន៍ថា “មានអ្នកខ្លះគេថា ខ្ញុំល្អទៅ ខ្លះថា បំពានអំណាចហើយ។ ខ្ញុំមិនបានបំពានអំណាចទេ។ ប៉ុន្តែសូមឲ្យពិនិត្យទំនាក់ទំនងអង្គទាំងបី ដែលមានអង្គនីតិបញ្ញត្តិ អង្គនីតិប្រតិបត្តិ និងតុលាការ។ វាអត់អាចនៅដាច់ពីគ្នាទេ”។
លោក ហ៊ុន សែន បានមានប្រសាសន៍ថា គឺក្រុមសង្គមស៊ីវិលទេដែលធ្វើហួសសិទ្ធិរបស់ខ្លួន ដោយប្រាប់រដ្ឋាភិបាលរបស់លោកថាត្រូវគ្រប់គ្រងរបៀបណានោះ។
លោកនាយករដ្ឋមន្ត្រីបានមានប្រសាសន៍ថា “តើអ្នកអត្ថាធិប្បាយទាំងនោះមានតួនាទីអ្វី? កុំអាងខ្លួនជាអង្គការក្រៅរដ្ឋាភិបាលមកអង្គុយលើក្បាលនីតិប្រតិបត្តិឲ្យសោះ។ ស្រុកខ្មែរហាស៎ អង្គការក្រៅរដ្ឋាភិបាលខ្លះដើរតួនាទីធំជាងសភា រដ្ឋាភិបាល និង តុលាការទៅទៀត”៕ និត