លោកសមរង្ស៊ីប្រធានស្តីទីគណបក្សសង្រ្គោះជាតិព្រមានអ្នកវិនិយោគនិងជនជាតិចិនអំពីហានិភ័យនៃការប្តូររបបលោកហ៊ុនសែននៅឆ្នាំ២០១៩។
ប្រធានស្តីទីគណបក្សប្រឆាំងរូបនេះបានសរសេរនៅលើគណនីហ្វេសប៊ុករបស់លោកថា អ្នកវិនិយោគនិងជនជាតិចិនដែលមានវត្តមាននៅស្រុកខ្មែរត្រូវដឹងថាស្ថានការណ៍នយោបាយនៅទីនោះនឹងកាន់តែតានតឹងឡើងៗចាប់ពីពេលនេះតទៅ។លោកអះអាងថា ព្រឹត្តិការណ៍ថ្មីនឹងអាចកើតមានឡើងគ្រប់ពេលវេលាក្នុងឆ្នាំ២០១៩នេះដោយសារតែប្រជារាស្ត្រខ្មែរមានបំណងចង់ប្តូររបបហ៊ុនសែនចេញ។
លោកបានប្រាប់ក្រុមអ្នកវិនិយោគនិងជនជាតិចិនថា ត្រូវតែពិនិត្យឡើងវិញរាល់សកម្មភាពនិងគម្រោងទាំងឡាយរបស់ពួកគេហើយត្រូវដោះស្រាយបញ្ហាទាំងឡាយដែលពួកគេបានបង្កឲ្យពលរដ្ឋខ្មែរក្លាយជាជនរងគ្រោះនិងធ្វើឱ្យពលរដ្ឋខ្មែរកាន់តែក្តៅក្រហាយ។ជាងនេះទៅទៀត លោកជំរុញជនជាតិចិនត្រូវតែប្រគល់សងឲ្យម្ចាស់ដើមវិញនូវដីធ្លីដែលពួកគេបានឃុបឃិតជាមួយអាជ្ញាធរផ្តាច់ការនិងពុករលួយហើយត្រូវតែបិទបនល្បែងស៊ីសងដែលពួកគេកំពុងបើកព្រោងព្រាតនៅខ្មែរ។
លោកសមរង្ស៊ីបានណែនាំទៅជនជាតិចិនទាំងនោះឱ្យពួកគេឈប់បំពានមកលើជនជាតិខ្មែរនិងគោរពជនជាតិខ្មែរដែលជាម្ចាស់ស្រុកបើមិនដូច្នោះទេពួកជនជាតិចិនទាំងនោះអាចប្រឈមមុខពីការផ្ទុះកំហឹងពីសំណាក់ជនជាតិខ្មែរជាម្ចាស់ស្រុកនៅពេលដែលព្រឹត្តិការណ៍នយោបាយថ្មីកើតមានឡើងក្នុងឆ្នាំ២០១៩នេះ។
ប៉ុន្តែអ្នកនាំពាក្យគណបក្សប្រជាជនកម្ពុជាលោកសុខឥសានចាត់ទុកការព្រមានរបស់មេដឹកនាំបក្សប្រឆាំងរូបនេះថាមានលក្ខណៈនយោបាយនិងបំផ្លាញផលប្រយោជន៍ជាតិយ៉ាងធ្ងន់ធ្ងរផងដែរ។
ជាងនេះទៅទៀតលោកហ៊ុន សែនធ្លាប់បានបញ្ជាក់យ៉ាងច្បាស់ថា ប្រទេសចិនជាដៃគូរបស់កម្ពុជាមិនអាចខ្វះបានទាំងដៃគូយុទ្ធសាស្ត្រនយោបាយនិងសេដ្ឋកិច្ច។
លោកហ៊ុនសែនអះអាងថាទំហំពាណិជ្ជកម្មទ្វេភាគីកម្ពុជា-ចិនមានតម្លៃដល់ទៅ៥,៦ពាន់លានដុល្លារកាលពីឆ្នាំ២០១៨ប៉ុន្តែមេដឹកនាំនៃប្រទេសទាំងពីរប្ដេជ្ញាថា នឹងជំរុញទំហំពាណិជ្ជកម្មទ្វេភាគីឲ្យកើនឡើងដល់ចំនួន១០ពាន់លានដុល្លារនៅត្រឹមឆ្នាំ២០២៣ខាងមុខ៕