សមត្ថកិច្ចបាននាំខ្លួនលោកឧកញ៉ាគិត ធាងម្ចាស់ក្លឹបកម្សាន្តRockពាក់ព័ន្ធនឹងបញ្ហាជួញដូរគ្រឿងញៀនតាមដីការបស់តុលាការ។
ប្រព័ន្ធផ្សព្វផ្សាយ Fresh Newsរបស់លោកហ៊ុន សែនបានដកស្រង់សម្តីលោកឧត្តមសេនីយ៍នេត សាវឿនចុះផ្សាយកាលពីប៉ុន្មានម៉ោងមុននេះថា កម្លាំងនៃអគ្គស្នងការដ្ឋាននគរបាលជាតិបានអនុវត្តតាមដីការបស់តុលាការក្នុងការនាំខ្លួនលោកឧកញ៉ាគិត ធាងទៅកាន់ស្នងការដ្ឋាននគរបាលរាជធានីភ្នំពេញដើម្បីសាកសួរពាក់ព័ន្ធគ្រឿងញៀននៅមជ្ឈមណ្ឌលកម្សាន្តRock។ លោកបន្តថានៅពេលនេះ លោកឧកញ៉ាគិត ធាងកំពុងត្រូវបានសាកសួរនៅស្នងការដ្ឋាននគរបាលរាជធានីភ្នំពេញ។
ការនាំខ្លួនលោកឧកញ៉ាគិត ធេងធ្វើឡើងភ្លាមៗក្រោយពីលោកហ៊ុន សែនកាលពីព្រឹកមិញ បានបញ្ជាឲ្យចាប់ខ្លួនមេខ្លោងជួញដូរគ្រឿងញៀន នៅក្លឹបកម្សាន្តRock បន្ទាប់ពីសមត្ថកិច្ចបានបង្ក្រាបនឹងរឹបអូសគ្រឿងជាច្រើនកាលពីខែមុន។
លោក ហ៊ុន សែន អះអាងថា ក្រសួងមហាផ្ទៃនឹងបន្តចាត់វិធានការលើបញ្ហានេះហើយតុលាការត្រូវតែប្រាកដថា ក្លឹបកម្សាន្តមួយនេះនឹងមិនអាចបើកដំណើរការឡើងវិញបានឡើយ។ លោកបន្តថា សម្រាប់ក្លឹបកម្សាន្តមួយនេះត្រូវមានការដាក់ទោសទណ្ឌឲ្យបានធ្ងន់ធ្ងរ ហើយត្រូវស្វែងរកមេខ្លោងដែលនៅក្រោយនៃការជួញដូរគ្រឿងញៀនទាំងនេះ។
បទបញ្ជារបស់លោកហ៊ុន សែនធ្វើឡើងនៅក្នុងពិធីចែកសញ្ញាប័ត្រដល់និស្សិតទើបបញ្ចប់ការសិក្សាក្នុងទីក្រុងភ្នំពេញកាលពីព្រឹកមិញ។
កាលពីថ្ងៃទី២៣ ខែកុម្ភៈ សមត្ថកិច្ចបានបង្ក្រាបយ៉ាងចាស់ដៃទៅលើ ក្លឹបកម្សាន្ត Rock ដោយបានឃាត់ខ្លួនមនុស្សដល់ទៅជាង៣០០នាក់ និងរឹបអូសគ្រឿងញៀនបានជាង៥០គីឡូក្រាម។ ក្លឹបកម្សាន្តRock ជាកម្មសិទ្ធិរបស់លោកលោកឧកញ៉ាគិត ធាងដែលជាបងប្រុសរបស់លោកឧកញ៉ាគិត ម៉េង ប្រធានក្រុមហ៊ុនRoyal Group ដែលក្តោបក្តាប់លើក្រុមហ៊ុនទូរស័ព្ទដៃMobitel ក្រុមហ៊ុនទូរទស្សន៍ CTN ទូរទស្សន៍CNC ទូរទស្សន៍MyTV ទូរទស្សន៍One TV និងក្រុមហ៊ុនជាច្រើនទៀត៕