សមត្ថកិច្ចទីក្រុងភ្នំពេញបានចាប់ខ្លួនអតីតសកម្មជន និងមន្ត្រីគណបក្សសង្រ្គោះជាតិ ៤រូបបន្ថែមទៀត ក្រោយពីមានការតវ៉ាទាមទារឱ្យដោះលែងសមាជិកក្រុមប្រឹក្សាឃ្លាំមើលកម្ពុជា លោក រ៉ុង ឈុន។សារព័ត៌មានសំឡេងប្រជាធិបតេយ្យVOD បានស្រង់សម្តីលោក សំ សុគង់ មេធាវីការពារក្តីឱ្យពួកគេទាំង៤នាក់នោះចុះផ្សាយ កាលពីថ្ងៃម្សិលមិញថា សកម្មជនបក្សប្រឆាំងទាំង៤រូបនោះ រួមមាន លោក អ៊ុក សំអូន អ្នកស្រី ឈិន សុ វណ្ណា លោក ឈួ ផេង និងលោក ជុំ ពុទ្ធី ត្រូវសមត្ថកិច្ចរាជធានីភ្នំពេញចាប់ខ្លួនបន្តបន្ទាប់ចាប់ពីថ្ងៃទី៤ ទី៥ និងទី៦ ខែសីហា។
មេធាវីដដែលបន្តថា ការចាប់ខ្លួននេះធ្វើឡើងក្នុងខណ្ឌចំការមន រាជធានីភ្នំពេញ ខណៈពួកគេព្យាយាមជួបព្រះសង្ឃ៨អង្គដែលអាជ្ញាធរនាំព្រះកាយមកវត្តថាន់ឱ្យចុះកិច្ចសន្យាឈប់តវ៉ាទាមទារឱ្យដោះលែងលោក រ៉ុង ឈុន បន្តទៀត។សារព័ត៌មានដដែលក៏បានស្រង់សម្តីរបស់ ស្នងការនគរបាលរាជធានីភ្នំពេញ លោក ស ថេត ដោយអះអាងថា ជនសង្ស័យ៤នាក់ដែលបានចាប់ខ្លួន នោះគឺ ពីរនាក់ត្រូវអប់រំ និងដោះលែងវិញ ហើយពីរនាក់ទៀតត្រូវបញ្ជូនទៅតុលាការ។សកម្មជនបក្សប្រឆាំងពីរនាក់ដែលត្រូវបញ្ជូនទៅតុលាការរួមមាន លោក ឈួ ផេង និងលោក ជុំ ពុទ្ធី ដោយសមត្ថកិច្ចចោទពីបទ ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខជាតិ។
យ៉ាងនេះក្តីក្រុមគ្រួសារអ្នកទាំងពីរ អះអាងថា ពួកគេទាំងពីររូបពុំបានធ្វើខុសដូចការចោទប្រកាន់ឡើយ ដោយគ្រាន់តែមានបំណងទាមទារឱ្យដោះលែងមនុស្សដែលគ្មានកំហុសតែប៉ុណ្ណោះ។សមត្ថកិច្ចបានចាប់ខ្លួន ប្រធានសហភាពសហជីពកម្ពុជា និងជាសមាជិកឃ្លាំមើលកម្ពុជា លោក រ៉ុង ឈុន កាលពីយប់ថ្ងៃទី៣១ ខែកក្កដា។ មួយថ្ងៃបន្ទាប់ ចៅក្រមសាលាដំបូងរាជធានីភ្នំពេញបានចោទប្រកាន់លោក ពីបទញុះញង់ឱ្យប្រព្រឹត្តបទល្មើសជាអាទិ៍ពាក់ព័ន្ធការលើកឡើងពីបញ្ហាព្រំដែនកម្ពុជាវៀតណាមក្នុងខេត្តត្បូងឃ្មុំ និងបង្គាប់ឱ្យឃុំខ្លួននៅពន្ធនាគារព្រៃសរបណ្តោះអាសន្ន ។
ការបន្តចាប់ខ្លួនសកម្មជនសិទ្ធិមនុស្ស និងសិទ្ធិការងារលោក រ៉ុង ឈុន ព្រមទាំងចាបើខ្លួនអតីតសកម្មជនបក្សប្រឆាំងបន្ថែមទៀត ស្របពេលដែលកម្ពុជា នៅសល់តែពេល៥ថ្ងៃទៀតប៉ុណ្ណោះ ក្នុងការបង្ហាញឆន្ទៈពិតប្រាកដមួយ ដើម្បីរក្សាបាននូវប្រព័ន្ធអនុគ្រោះពន្ធ EBA ២០%របស់អឺរ៉ុបឱ្យនៅគង់វង្សបាន។សហភាពអឺរ៉ុបបានសម្រេចព្យួរប្រព័ន្ធអនុគ្រោះពន្ធ EBA ២០% ជាវិធានការដំបូងមកលើកម្ពុជា កាលពីថ្ងៃទី១២ ខែកុម្ភៈ ក្រោយពេលពួកគេរកឃើញថារដ្ឋាភិបាលលោកហ៊ុន សែន បានបំផ្លាញមូលដ្ឋានគ្រឹះលទ្ធិប្រជាធិបតេយ្យ និងរំលោភសិទ្ធិមនុស្ស សិទ្ធិការងារជាប្រព័ន្ធ។ បន្ថែមពីនេះ ការសម្រេចនោះធ្វើឡើងក្រោយពេលរដ្ឋាភិបាលកម្ពុជាមិនបានធ្វើឱ្យប្រសើរនោះឡើយ នូវស្ថានភាពនយោបាយ ស្ថានភាពគោរពសិទ្ធិមនុស្ស តាមការទាមទាររបស់ខ្លួន។
សហភាពអឺរ៉ុបប្រកាសថា នីតិវិធីដកប្រព័ន្ធអនុគ្រោះពន្ធ EBA ២០%នឹងធ្វើឡើងជាផ្លូវការនៅថ្ងៃទី១២ ខែសីហា ហើយប្រសិនបើនីតិវិធីនេះចូលជាធរមានកម្ពុជា នោះកម្ពុជានឹងត្រូវបង់ពន្ធក្នុងការនាំទំនិញទៅអឺរ៉ុប៤០ប្រភេទ ក្នុងទំហំបង់ពន្ធប្រមាណ១០០លានដុល្លារអាមេរិកក្នុងមួយឆ្នាំៗ។យ៉ាងនេះក្តីប្រមុខរដ្ឋាភិបាលលោក ហ៊ុន សែន ធ្លាប់ប្រកាសហើយថាកម្ពុជានឹងបង់ពន្ធទៅអឺរ៉ុបតាមការដាក់ទណ្ឌកម្មនេះ ប៉ុន្តែកម្ពុជានឹងមិនអោនក្បាលចំពោះបរទេសជាថ្នូរនឹងប្រព័ន្ធអនុគ្រោះពន្ធមួយនេះឡើយ។
លោក ហ៊ុន សែន ក៏ធ្លាប់ព្រមានលោក រ៉ុង ឈុន ម្តងរួចមកហើយឱ្យបញ្ឈប់ការទាមទារប្រព័ន្ធអនុគ្រោះពន្ធ EBA ២០ភាគរយនេះទៀត ត្បិតរដ្ឋាភិបាលគ្មានថ្ងៃអោនក្បាលនោះទេ។ទោះបីជាយ៉ាងណាក៏ដោយសមាគមរោងចក្រកាត់ដេរនៅកម្ពុជាហៅកាត់ថា GMAC បានផ្ញើលិខិតទៅសហភាពអឺរ៉ុបចំនួន៣លើករួចមកហើយ ដោយស្នើឱ្យពន្យារពេលក្នុងការអនុវត្តនីតិវិធីដកប្រព័ន្ធអនុគ្រោះពន្ធEBA ២០ភាគរយមកលើកម្ពុជា។GMAC បញ្ជាក់ថាប្រសិនបើអឺរ៉ុបសម្រេចអនុវត្តនីតិវិធីការដកប្រព័ន្ធអនុគ្រោះពន្ធនេះ នឹងធ្វើឱ្យវិស័យឧស្សាហកម្មកាត់ដេរនៅកម្ពុជានឹងត្រូវបំផ្លាញ ហើយវាសនាកម្មករនិយោជិតរាប់សិបម៉ឺននាក់ដែលទទួលផលដោយផ្ទាល់ និងវាសនាពលរដ្ឋរាប់លាននាក់ទៀតដែលទទួលផលដោយប្រោយជន៍នឹងជួបគ្រោះអាសន្នជាក់ជាមិនខាន៕