គណៈកម្មការទន្លេមេគង្គ ឬហៅកាត់ថា MRC បានជំរុញដល់ប្រទេសតាមដងទន្លេមេគង្គទាំង៦ រួមមានចិន ភូមា ថៃ ឡាវ កម្ពុជា និងវៀតណាម ឱ្យដោះស្រាយបញ្ហាលំហូរទឹកទាបក្នុងតំបន់។ការស្នើនេះ ស្របពេលអាងទន្លេមេគង្គក្រោមប្រឈម នឹងបញ្ហាលំហូរទឹកទាបក្នុងរយៈពេល ២ឆ្នាំបន្តបន្ទាប់គ្នា ជាពិសេសធ្វើឱ្យបឹងទន្លេសាបរបស់កម្ពុជាជួបប្រទះស្ថានភាពស្ងួតខ្លាំងដែលបង្កឱ្យបរិមាណលំហូរត្រឡប់ចូលបឹងធ្លាក់ដល់កម្រិតទាបបំផុតដែលមិនធ្លាប់មានពីមុនមក។
របាយការណ៍របស់គណៈកម្មការទន្លេមេគង្គបានឱ្យដឹងថា អំឡុងពីខែមករា ដល់ខែកក្កដា ឆ្នាំ២០២០ កម្ពុជាមានលំហូរទឹកទាប និងមានគ្រោះរាំងស្ងួតខ្លាំង។ប្រភពដដែលបន្តថា មូលហេតុទាំងនេះ រួមមានបរិមាណភ្លៀងធ្លាក់តិចតួចខុសប្រក្រតីដែលបង្កដោយបាតុភូតអាកាសធាតុ អែល នីណូ (El Nino) ស្ថានភាពលំហូរទាបរយៈពេលយូរដែលបន្តអូសបន្លាយចាប់ពីឆ្នាំ២០១៩ និងលំហូរទឹកកម្រិតទាបជាងមុន ពីដៃទន្លេមេគង្គ។សម្រាប់លំហូរទាបបែបនេះ បានធ្វើឱ្យបឹងទន្លេសាបរបស់ប្រទេសកម្ពុជាជួបប្រទះ “ស្ថានភាពស្ងួតខ្លាំង”ដែល បង្កឱ្យបរិមាណលំហូរទឹកទន្លេត្រឡប់ចូលបឹងធ្លាក់ដល់កម្រិតទាបបំផុតដែលមិនធ្លាប់មានគិតចាប់ពីឆ្នាំ១៩៩៧ មក។
របាយការណ៍ដដែលបន្ថែមថា ប្រតិបត្តិការនៃទំនប់វារីអគ្គិសនីនានាតាមដងទន្លេមេគង្គក្នុងអាងទន្លេមេគង្គផ្នែកខាងលើ និងទំនប់តាមដៃទន្លេផ្សេងៗក្នុងអាងទន្លេមេគង្គក្រោម ក៏អាចនឹងជះឥទ្ធិពលលើស្ថានភាពលំហូរទឹកទាប នាពេលបច្ចុប្បន្នផងដែរ។របាយការណ៍របស់ MRC បានបង្ហាញថា លំហូរទាបនាពេលបច្ចុប្បន្នអាចនឹងជះឥទ្ធិពលធ្ងន់ធ្ងរលើប្រទេសកម្ពុជា ដោយសារការបាត់បង់នូវសក្តានុពលជលផល និងធារាសាស្ត្រ ពិសេសប៉ះពាល់ដល់ពលរដ្ឋ កម្ពុជាដែលអាស្រ័យផលនេសាទក្នុងតំបន់ទន្លេសាប ហើយមានពលរដ្ឋខ្លះស្ទើរដាច់ស្បៀងថែមទៀត។
បឹងទន្លេសាប ជាបឹងធំជាងគេ នៅក្នុងអាស៊ីអាគ្នេយ៍ ហើយ បឹងនេះត្រូវបានចាត់ទុកជាទីជម្រកជីវចម្រុះមួយក្នុងពិភពលោក និងជារោងចក្រត្រីដ៏សំខាន់របស់ទន្លេមេគង្គ។ រៀងរាល់ឆ្នាំលំហូរទឹកទន្លេមេគង្គហូរចូលបឹងទន្លេសាប កើតមានចាប់ពីពាក់កណ្តាលខែឧសភា ដល់ពាក់កណ្តាលខែតុលា។ ប៉ុន្តែនៅឆ្នាំនេះ លំហូរទឹកមានភាពយឺតយ៉ាវខុសប្រក្រតី៕