 លើកឡើងថា ពលរដ្ឋខ្មែរនៅពេលនេះមិនត្រឹមតែត្រូវការការពារសុវត្ថិភាពសុខភាពតែម្យ៉ាងនោះទេ ប៉ុន្តែបញ្ហាសេដ្ឋកិច្ចក៏ជាកត្តាចម្បងសម្រាប់ពួកគាត់ដែរ ក្រោយការអូសបន្លាយអស់រយៈពេលប្រមាណជាង ១ឆ្នាំនៃការរីករាលដាលជំងឺ Covid-19 នេះ។){kind=link}
មន្ត្រីជាន់ខ្ពស់គណបក្សប្រជាធិបតេយ្យមូលដ្ឋាន (GDP) លើកឡើងថា ពលរដ្ឋខ្មែរនៅពេលនេះមិនត្រឹមតែត្រូវការការពារសុវត្ថិភាពសុខភាពតែម្យ៉ាងនោះទេ ប៉ុន្តែបញ្ហាសេដ្ឋកិច្ចក៏ជាកត្តាចម្បងសម្រាប់ពួកគាត់ដែរ ក្រោយការអូសបន្លាយអស់រយៈពេលប្រមាណជាង ១ឆ្នាំនៃការរីករាលដាលជំងឺ Covid-19 នេះ។
ការអះអាងនេះ ធ្វើឡើងបន្ទាប់ពីប្រមុខរដ្ឋាភិបាលកម្ពុជា សម្រេចបញ្ឈប់ការបញ្ចេញវ៉ាក់សាំងទៅតាមបណ្តាខេត្តដែលមន្ត្រីរបស់ខ្លួនធ្លាប់បានស្នើសុំកន្លងមក ថាជាការប្រើខុសយុទ្ធសាស្ត្រ និងគ្មានប្រសិទ្ធភាព។
ប្រធានគណៈកម្មាធិការនាយកគណបក្សប្រជាធិបតេយ្យមូលដ្ឋាន បណ្ឌិត យ៉ង សាំងកុមារ បានប្រាប់សារព័ត៌មាន The Cambodia Daily នៅថ្ងៃទី៣១ ខែឧសភា ឆ្នាំ២០២១ នេះថា ការអូសបន្លាយពេលនៃវីរុសCovid-19 នៅកម្ពុជា បណ្តាលឲ្យពលរដ្ឋខ្មែរជួបវិបត្តិសេដ្ឋកិច្ចយ៉ាងធ្ងន់ធ្ងរ ស្របពេលដែលពួកគាត់ក៏មិនអាចទទួលជំនួយសង្គមទាន់ពេលវេលា និងតាមតម្រូវការនៅឡើយ។ ដូច្នេះ ការចាក់ថ្នាំបង្ការជំងឺ Covid-19 ត្រូវធ្វើឡើងទាំងការការពារសុខមាលភាពពលរដ្ឋផង និងការស្ដារសេដ្ឋកិច្ចរបស់ពួកគេឡើងវិញផងដែរ។
លោកអះអាងថា ការចាក់វ៉ាក់សាំងដើម្បីស្ដារសេដ្ឋកិច្ច និងការធានានូវសុខភាពសាធារណៈ គឺត្រូវធ្វើឡើងជាបន្ទាន់ក្នុងតំបន់ដែលមានហានិភ័យខ្ពស់ ដូចជាតំបន់ក្រហម តាមទីផ្សារលក់ដូរ តំបន់រោងចក្រ និងវិស័យទេសចរណ៍ ជាដើម។
បណ្ឌិត យ៉ង សាំងកុមារ បញ្ជាក់ថា ការស្រោចវ៉ាក់សាំងប្រឆាំងវីរុសCovid-19 ក្នុងផែនការបែបនេះ នឹងមានប្រសិទ្ធភាពខ្លាំងដើម្បីធានានូវប្រសិទ្ធភាពក្នុងការទប់ស្កាត់ការឆ្លងវីរុស Covid-19 ផង និងជួយស្ដារសេដ្ឋកិច្ចគ្រួសាររបស់ពលរដ្ឋផង ខណៈជំនួយសង្គមរបស់រដ្ឋាភិបាលបច្ចុប្បន្នហាក់មានភាពយឺតយ៉ាវសម្រាប់ពួកគាត់ទៅហើយនោះ។
កាលពីថ្ងៃទី២៩ ខែឧសភា ឆ្នាំ២០២១ ប្រមុខរដ្ឋាភិបាលកម្ពុជា បានចេញខ្សែអាត់សំឡេងប្រវែងជាង ១៤នាទី ណែនាំទៅមន្ត្រីថ្នាក់ក្រោមរបស់ខ្លួនថា រដ្ឋាភិបាលនឹងមិនអនុញ្ញាតឱ្យមានការស្នើវ៉ាក់សាំងបន្តទៀតនោះទេ ព្រោះថារដ្ឋាភិបាលមានផែនការមេក្នុងការចាក់វ៉ាក់សាំងជូនពលរដ្ឋតាមផែនការបែបផ្ការីកពីក្នុងទៅក្រៅ ដែលមានប្រសិទ្ធភាពខ្ពស់ក្នុងការគ្រប់គ្រងការឆ្លងនៃវីរុសCovid-19។ លោក ហ៊ុន សែន បញ្ជាក់ថា ការស្នើវ៉ាក់សាំងយកទៅចាក់ទៅកន្លែងនេះបន្តិច ឬកន្លែងនោះបន្តិច មិនមែនជាវិធីល្អទេ ព្រោះថាការប្រើវ៉ាក់សាំងបែបនេះ នឹងមិនមានសុវត្ថិភាពក្នុងការទប់ស្កាត់ការឆ្លងវីរុស Covid-19 ឡើយ ត្បិតការប្រើវ៉ាក់សាំងត្រូវធ្វើឡើងដើម្បីឱ្យមានភាពស៊ាំសម្រាប់ទីតាំងនីមួយៗ ដូច្នេះការប្រើវ៉ាក់សាំងខុសពីផែនការមេរបស់រដ្ឋាភិបាល គឺមិនត្រូវបានអនុញ្ញាតបន្តទៀតជាដាច់ខាត។
ជុំវិញបញ្ហានេះ ក្រសួងសុខាភិបាល កាលពីថ្ងៃទី៣០ ខែឧសភា ឆ្នាំ២០២១ នេះ បានបង្ហាញរបាយការណ៍ស្ដីពីការចាក់វ៉ាក់សាំងថា គិតត្រឹមថ្ងៃទី៣០ ខែឧសភា ក្រសួងបានចាក់វ៉ាក់សាំងជូនប្រជាជនដូសទី១ សរុបប្រមាណជាង ២លាន ៥សែននាក់ហើយ រីឯពលរដ្ឋដែលបានចាក់ដូសទី២ មានចំនួន ១លាន ៩សែននាក់ ខណៈអ្នកដែលក្រុមគ្រូពេទ្យមិនអនុញ្ញាតឱ្យចាក់ មានចំនួនជាង ៥ម៉ឺន ២ពាន់នាក់។
នៅថ្ងៃទី៣១ ខែឧសភា ឆ្នាំ២០២១ នេះ ក្រសួងសុខាភិបាលកម្ពុជា បានអះអាងថា រកឃើញអ្នកវិជ្ជមានវីរុស Covid-19 ថ្មីចំនួន ៦៩០នាក់ ខណៈអ្នកជាសះស្បើយថ្មីមានចំនួន ៤៤៨នាក់ និងមានអ្នកស្លាប់ថ្មីចំនួន ៥នាក់។ ក្រសួងបញ្ជាក់ថា អ្នកឆ្លងវីរុសCovid-19 សរុបបានកើនឡើងជាង ៣ម៉ឺននាក់ហើយ រីឯអ្នកជាសះស្បើយសរុបមានចំនួនជាង ២ម៉ឺន ២ពាន់នាក់ ចំណែកអ្នកស្លាប់បានកើនឡើងដល់ ២១៤នាក់៕