បញ្ជាការដ្ឋានយោធភូមិភាគទី៤ បានប្រគល់វត្ថុបុរាណចំនួន៥ ដែលបញ្ជាការដ្ឋានយោធភូមិភាគទី៤ បានរកឃើញនាពេលកន្លងមក ប្រគល់ជូនដល់អាជ្ញាធរជាតិអប្សរា ដើម្បីថែរក្សា និងអភិរក្សបន្តទៀតកាលពីដើមខែមិថុនា ថ្មីៗកន្លងមកនេះ។
អាជ្ញាធរជាតិអប្សរា បានផ្សព្វផ្សាយលើបណ្ដាញសង្គមរបស់ខ្លួនថា ការប្រគល់ទទួលវត្ថុបុរាណទាំង ៥ប្រភេទនេះ ត្រូវបានធ្វើឡើងដោយផ្ទាល់រវាងលោក ហង់ ពៅ អគ្គនាយកអាជ្ញាធរជាតិអប្សរា និងសហការី ក្នុងឱកាសអញ្ជើញចូលរួមពិធីប្រគល់ និងដាំកូនឈើនាបញ្ជាការដ្ឋានយោធភូមិភាគទី៤ កាលពីថ្ងៃទី០១ ខែមិថុនា ឆ្នាំ២០២១។
ប្រភពដដែលបានបញ្ជាក់ទៀតថា វត្ថុបុរាណដែលអាជ្ញាធរជាតិអប្សរាបានទទួលនោះរួមមាន៖
- ទី១ សសរពេជ្រ មួយកំណាត់តូច
- ទី២ កំពូលប្រាសាទតាមជ្រុងនៃប្រាសាទធំ
- ទី៣ ឆ្នាំងថ្នាំមួយ
- ទី៤ ដុំហោជាងផ្នែកខាងលើ មានកំណាត់ព្រះសិរ រូបព្រះមួយផ្នែក
- ទី៥ បង្គោលព្រះទិសមួយដុំ។
អាជ្ញាធរជាតិអប្សរា បានឱ្យដឹងដែរថា ការប្រគល់វត្ថុបុរាណនេះ គឺមិនមែនជាលើកទី១ទេដែលអាជ្ញាធរជាតិអប្សរាបានទទួលពីស្ថាប័នពាក់ព័ន្ធ និងប្រជាពលរដ្ឋ ដែលបានប្រទះឃើញ និងស្ម័គ្រប្រគល់ជូនអាជ្ញាធរជាតិអប្សរា ថែរក្សា និងអភិរក្ស ដើម្បីសម្រាប់កូនចៅជំនាន់ក្រោយបានឃើញ៕