មន្ត្រីជាន់ខ្ពស់គណបក្សប្រជាធិបតេយ្យមូលដ្ឋាន ហៅកាត់ថា GDP ជំរុញឲ្យរដ្ឋាភិបាលកម្ពុជា ដាក់ផែនការចាក់វ៉ាក់សាំងប្រឆាំងវីរុស Covid-19 ទៅតាមទីប្រជុំជន តាមបណ្តាខេត្ត រោងចក្រ និងតំបន់ទេសចរណ៍នានាឲ្យបានលឿន ក្រោយការចាក់វ៉ាក់សាំងបង្កើតភាពស៊ាំក្នុងទីក្រុងភ្នំពេញបានជោគជ័យ។
ការអះអាងនេះ ធ្វើឡើងស្របពេលដែលវ៉ាក់សាំងចំនួន ១លានដូសបានទៅដល់កម្ពុជា នៅថ្ងៃនេះដែលជាជំនួយចិន ផង និងជាកាបញ្ជាទិញរបស់រដ្ឋាភិបាលកម្ពុជាផង ដើម្បីទប់ស្កាត់ចម្លងវីរុស Covid-19 ក្នុងពេលបច្ចុប្បន្ននេះ។
ប្រធានគណៈកម្មាធិការនាយកគណបក្សប្រជាធិបតេយ្យមូលដ្ឋាន បណ្ឌិត យ៉ង សាំងកុមារ បានប្រាប់សារព័ត៌មាន The Cambodia Daily នៅថ្ងៃទី៨ ខែមិថុនា ថា លោកអបអរសាទរដែលកម្ពុជា ទទួលបានវ៉ាក់សាំងជាបន្តបន្ទាប់ដើម្បីចាក់ជូនពលរដ្ឋកម្ពុជា ដែលជាមធ្យោបាយដ៏ចម្បងមួយក្នុងការទប់ស្កាត់ការឆ្លងវីរុស Covid-19 នៅពេលនេះ។
លោកអះអាងថា ស្របពេលដែលកម្ពុជាទទួលបានវ៉ាក់សាំងជាបន្តបន្ទាប់ រដ្ឋាភិបាលគួរតែដាក់ចេញនូវផែនការយុទ្ធសាស្ត្រក្នុងការប្រើវ៉ាក់សាំងដើម្បីការពារសុវត្ថិភាពពលរដ្ឋផង និងដើម្បីបង្កើនសេដ្ឋកិច្ចពលរដ្ឋផងដែរ ព្រោះថាមុខរបរអាជីវកម្ម រោងចក្រ សហគ្រាសមួយចំនួនស្ទើរតែមិនអាចទ្រទ្រង់បានទៅហើយ ខណៈអាជីវកម្មខ្លះទៀតបានសម្រេចបិទទ្វារបណ្តើរៗផងដែរនោះ។
បណ្ឌិត យ៉ង សាំងកុមារ បញ្ជាក់ថា ការស្រោចថ្នាំបង្ការជំងឺ Covid-19 តាមទីប្រជុំជននានា ទៅតាមបណ្តាខេត្ត ដូចជាតាមទីផ្សារលក់ដូរតូចធំ តាមរោងចក្រ និងតាមតំបន់ទេសចរណ៍ធំៗ ដូចជាតំបន់អង្គរជាដើម សុទ្ធតែអាចជួយជំរុញឲ្យមានប្រសិទ្ធភាពវ៉ាក់សាំងកាន់តែលឿន និងអាចស្ដារសេដ្ឋកិច្ចក្នុងស្រុកបានកាន់តែឆាប់ថែមទៀត។
ជុំវិញបញ្ហានេះ ក្រុមមគ្គុទ្ទេសក៍ទេសចរណ៍ជាច្រើននៅកម្ពុជា ជាពិសេសនៅខេត្តសៀមរាប កាលពីដើមខែមិថុនា ឆ្នាំ២០២១ បានបង្ហាញការព្រួយបារម្ភថា មគ្គុទ្ទេសក៍ទេសចរណ៍ គឺជាតួអង្គដ៏សំខាន់មួយនៅក្នុងខេត្តសៀមរាប តែមកទល់នឹងពេលនេះ ពួកគេមិនទាន់បានទទួលវ៉ាក់សាំងប្រឆាំងជំងឺ Covid-19 នៅឡើយទេ។
បញ្ហានេះ ពួកគេរំពឹងថា រដ្ឋាភិបាលកម្ពុជា នឹងពន្លឿនការចាក់វ៉ាក់សាំងដល់អ្នកប្រឈមដោយផ្ទាល់ជាមួយអ្នកទេសចរ ដើម្បីត្រៀមខ្លួនទទួលទេសចរបរទេសនៅត្រីមាសទី៤ ចុងឆ្នាំ២០២១ នេះ។
នៅថ្ងៃទី៨ ខែមិថុនា ឆ្នាំ២០២១ នេះ រដ្ឋលេខាធិការក្រសួងសុខាភិបាល អ្នកស្រី យក់ សម្បត្តិ បានប្រាប់អ្នកសារព័ត៌មាននៅឯព្រលានយន្តហោះអន្តរជាតិពោធិចិនតុង ថា កម្ពុជា បានទទួលវ៉ាក់សាំងប្រឆាំងវីរុស Covid-19 ចំនួន ១លានដូសបន្ថែមទៀតពីប្រទេសចិន ក្នុងនោះ ៥០ម៉ឺនដូស គឺជាជំនួយរដ្ឋាភិបាលចិន ផងដែរ។
បន្ថែមពីនេះ អ្នកស្រី យក់ សម្បត្តិ បញ្ជាក់ថា បើគ្មានការប្រែប្រួលទេ នៅថ្ងៃទី១២ ខែមិថុនា ខាងមុខនេះ កម្ពុជា នឹងទទួលបានវ៉ាក់សាំង ១លានដូសទៀតពីក្រុមហ៊ុន ស៊ីណូហ្វាម និងថ្ងៃទី១៩ ខែមិថុនា នឹងទទួលបាន ១លានដូសទៀតពីក្រុមហ៊ុន ស៊ីណូវ៉ាក់ ដែលរដ្ឋាភិបាលបានបញ្ជាទិញពីក្រុមហ៊ុនទាំងពីរនេះនាពេលកន្លងមក។
គិតចាប់ពីខែកុម្ភៈ ឆ្នាំ២០២១ រហូតមកដល់ថ្ងៃទី៨ ខែមិថុនា ឆ្នាំ២០២១ កម្ពុជា ទទួលបានវ៉ាក់សាំងបានជាង ៧លានដូសហើយ ក្នុងនោះរួមមានវ៉ាក់សាំងស៊ីណូហ្វាម ដែលជាជំនួយចិន មានចំនួន ២លាន ២សែនដូស។
វ៉ាក់សាំងស៊ីណូវ៉ាក់ ដែលរដ្ឋាភិបាលកម្ពុជា បានបញ្ជាទិញពីចិន មានចំនួន ៤លាន ៥០ម៉ឺនដូស និងវ៉ាក់សាំងអាស្ត្រាហ្សេនីកា ជាជំនួយមជ្ឈមណ្ឌលកូវ៉ាក់ តាមរយៈអង្គការសុខភាពពិភពលោក មានចំនួនជាង ៣២ម៉ឺនដូសផងដែរ។
របាយការណ៍ក្រសួងសុខាភិបាល បានអះអាងថា គិតត្រឹមថ្ងៃទី៧ ខែមិថុនា ឆ្នាំ២០២១ នេះ ពលរដ្ឋទូទាំងប្រទេសកម្ពុជា ចំនួនជាង ២លាន ៧សែននាក់ហើយដែលបានទទួលវ៉ាក់សាំងប្រឆាំងវីរុស Covid-19 រួចរាល់។
កាលពីចុងឆ្នាំ២០២០ ប្រមុខរាជរដ្ឋាភិបាល ហ៊ុន សែន បានបញ្ជាក់ថា កម្ពុជា ត្រូវការវ៉ាក់សាំងជាង ២០លានដូសចាក់ជូនប្រជាពលរដ្ឋឱ្យបានជាង ១០លាននាក់ ដើម្បីបង្កើតភាពស៊ាំប្រឆាំងវីរុស Covid-19។
យ៉ាងណាក៏ដោយ ក្រសួងសុខាភិបាល នៅថ្ងៃទី៨ ខែមិថុនា ឆ្នាំ២០២១ បានអះអាងថា ក្រសួងបានរកឃើញអ្នកវិជ្ជមានវីរុស Covid-19 ថ្មីចំនួន ៦៧៨នាក់ ខណៈអ្នកជាសះស្បើយថ្មីមានចំនួន ៥៥៧នាក់ និងមានអ្នកស្លាប់ថ្មី ១២នាក់ផងដែរ។
ក្រសួងបញ្ជាក់ថា អ្នកឆ្លងវីរុស Covid-19 សរុបបានកើនឡើងដល់ជាង ៣ម៉ឺន ៥ពាន់នាក់ហើយ រីឯអ្នកជាសះស្បើយសរុបមានចំនួនជាង ២ម៉ឺន ៨ពាន់នាក់ផងដែរ ចំណែកអ្នកស្លាប់បានកើនឡើងដល់ ២៧៨នាក់៕