បញ្ញវន្តខ្មែរនៅក្រៅស្រុកអះអាងថា ការបើកពិធីទទួលតំណក់ប្រេងនៅវិមានឈ្នះឈ្នះ គឺជាអត្ថន័យនយោបាយមួយសម្រាប់កម្ពុជា-វៀតណាម ផងដែរថា កម្ពុជា នៅតែអាចសម្បទានភោគទ្រព្យរបស់ខ្លួនបន្ថែមទៀតតាមរយៈរដ្ឋាភិបាលដែលដឹកនាំដោយក្រុមបក្ខសែស្រឡាយលោក ហ៊ុន សែន បើវៀតណាម នៅតែជួយជ្រោមជ្រែងឲ្យពួកគេបន្តកាន់កាប់អំណាចបន្ថែមទៀតនោះ។
ប្រធានក្រុមប្រឹក្សាឃ្លាំមើលកម្ពុជា និងជាប្រធានក្រុមប្រឹក្សាភិបាលនៃចលនានិស្សិតដើម្បីលទ្ធិប្រជាធិបតេយ្យ លោក ម៉ែន ណាត បានប្រាប់សារព័ត៌មាន The Cambodia Daily នៅថ្ងៃទី៩ ខែមិថុនា នេះថា ការបើកពិធីទទួលតំណក់ប្រេងរបស់កម្ពុជា នៅវិមានឈ្នះឈ្នះ គឺធ្វើឡើងក្នុងន័យឃោសនានយោបាយរបស់បក្សកាន់អំណាច ជាជាងការផ្សព្វផ្សាយពីការបោះជំហានថ្មីនៃវិស័យឧស្សាហកម្មប្រេងកាតសម្រាប់អនាគតរបស់ខ្លួន។
លោកអះអាងថា ការលើកឡើងរបស់រដ្ឋមន្ត្រីក្រសួងការពារជាតិ លោក ទៀ បាញ់ ក្នុងពិធីទទួលតំណក់ប្រេងនៅថ្ងៃនេះ គឺមិនបានបង្ហាញពីយុទ្ធសាស្ត្រនៃការស្ដារសេដ្ឋកិច្ចជាតិឲ្យងើបឡើងវិញលើ វិស័យឧស្សាហកម្មប្រេងកាតមួយនេះ ថាតើកម្ពុជា នឹងប្តូរមុខមាត់បែបណានោះទេ ក្រោយសេដ្ឋកិច្ចរបស់ខ្លួនរងការខូចខាតដោយជំងឺរាតត្បាតសកលកន្លងមក។
លោក ម៉ែន ណាត បញ្ជាក់ថា ជំនួសឲ្យការបង្ហាញពីសមិទ្ធផលជាតិ លោក ទៀ បាញ់ បានឆ្លៀតឱកាសអួតពីគុណសម្បត្តិរបស់គណបក្សកាន់អំណាច ជាពិសេសគឺលោក ហ៊ុន សែន ដែលជាវិធីបំភ័ន្តភ្នែកមហាជនថា តំណក់ប្រេងនេះ គឺកើតឡើងដោយសារតែមេដឹកនាំកម្ពុជាបច្ចុប្បន្ននេះប៉ុណ្ណោះ ខណៈក្តីសង្ឃឹមថាផលប្រយោជន៍ដែលបានពីប្រេងនេះនឹងក្លាយជាចំណូលជាតិពិតប្រាកដនោះ គ្មានពលរដ្ឋខ្មែរណាម្នាក់ហ៊ានសង្ឃឹមនៅឡើយទេ។
ការអះអាងនេះ ធ្វើឡើងបន្ទាប់ពីរដ្ឋាភិបាលកម្ពុជា ប្រកាសពិធីប្រគល់តំណក់ប្រេងលើកដំបូងដែលបានប្រារព្ធនៅឯវិមានឈ្នះឈ្នះ នៅថ្ងៃពុធ សប្តាហ៍នេះ។
នៅថ្ងៃទី៩ ខែមិថុនា ឆ្នាំ២០២១ នេះ រដ្ឋមន្ត្រីក្រសួងរ៉ែ និងថាមពល លោក ស៊ុយ សែម បានប្រកាសពិធីប្រគល់តំណក់ប្រេងលើកដំបូងនៅវិមានឈ្នះឈ្នះដែលកម្ពុជាទទួលបានកាលពីថ្ងៃទី២៩ ខែធ្នូ ឆ្នាំ២០២០ កន្លងទៅថា ជាសមិទ្ធផលប្រវត្តិសាស្ត្រមួយសម្រាប់កម្ពុជា ក្រោមការដឹកនាំរបស់លោក ហ៊ុន សែន។
ចំណែករដ្ឋមន្ត្រីក្រសួងការពារជាតិ លោក ទៀ បាញ់ អះអាងថា ក្រោមនយោបាយឈ្នះឈ្នះរបស់នាយករដ្ឋមន្ត្រីកម្ពុជា តំណក់ប្រេងនេះបានបង្កើតនូវសមត្ថភាពជាតិ និងខឿនឧស្សាហកម្មប្រេងកាតដែលនាំមកនូវចំណូលជាតិយ៉ាងច្រើនសន្ធឹកសន្ធាប់នាពេលអនាគត ហើយក៏ជាភស្តុតាងឆ្លុះបញ្ចាំងពីសមត្ថភាពដឹកនាំរបស់ប្រមុខរដ្ឋាភិបាលកម្ពុជាផងដែរ។
យ៉ាងណាក៏ដោយ ស្របពេលនៃការបើកពិធីប្រគល់តំណក់ប្រេងនេះ រដ្ឋលេខាធិការក្រសួងរ៉ែ និងថាមពល លោក ម៉េង សក្តិធារ៉ា បានសរសេរលើគណនី Facebook របស់ខ្លួន នៅថ្ងៃទី៩ ខែមិថុនា ឆ្នាំ២០២១ នេះថា ក្រុមហ៊ុន KrisEnergy ដែលបានប្រកាសក្ស័យធនកាលពីពេលកន្លងទៅ នឹងចេញមុខបកស្រាយពីនីតិវិធីបន្តគម្រោង និងកិច្ចព្រមព្រៀងប្រេងកាតនៅប្លុក A រវាងក្រុមហ៊ុន និងរដ្ឋាភិបាលកម្ពុជា នាពេលខាងមុខ។
បញ្ហានេះ បានធ្វើឲ្យប្រតិបត្តិការប្រេងកាតនៅប្លុក A របស់កម្ពុជា ជួបបញ្ហាប្រឈម និងត្រូវផ្អាកគម្រោងផែនការធំៗមួយចំនួនផងដែរ។
កាលពីខែមិថុនា ឆ្នាំ២០១៩ រដ្ឋមន្ត្រីក្រសួងរ៉ែ និងថាមពល លោក ស៊ុយ សែម បានអះអាងក្នុងវិមានរដ្ឋសភា លើសេចក្តីព្រាងច្បាប់លើការគ្រប់គ្រងប្រេង និងផលិតផលប្រេងកាតនៅកម្ពុជាថា កម្ពុជាមានប្លុកប្រេងកាតសរុបចំនួន ២៥កន្លែងទូទាំងប្រទេសទាំងដែនសមុទ្រ និងដីគោក ដែលអាចផលិតប្រេងបានចំនួន ៥លានតោនក្នុងមួយឆ្នាំៗ។
លោក ស៊ុយ សែម បញ្ជាក់ថា នៅដែនសមុទ្រមាន ៦ គឺប្លុក A.B.C.D.E និងប្លុក F រីឯដែនគោកមានចំនួន ១៩ប្លុក និង ៤តំបន់ទៀត គឺនៅត្រួតគ្នារវាងប្រទេសកម្ពុជា និងប្រទេសថៃ។ ដោយឡែកប្លុក A មានចម្ងាយត្រឹមតែ ១៦០គីឡូម៉ែត្រប៉ុណ្ណោះពីខេត្តព្រះសីហនុ ហើយមានចម្ងាយ ៣៣៥គីឡូម៉ែត្រពីប្រទេសថៃ និងប្រវែង ៣៥០គីឡូម៉ែត្រពីប្រទេសឡាវ។
កាលពីថ្ងៃទី២៩ ខែធ្នូ ឆ្នាំ២០២០ ប្រមុខរដ្ឋាភិបាលកម្ពុជា បានប្រកាសបើកឲ្យដំណើរការជាផ្លូវការនៃតំណក់ប្រេងលើកដំបូងនៅកម្ពុជា ហើយលោកបញ្ជាក់ថា តំណក់ប្រេងនេះមិនមែនជាបណ្តាសាទេ តែគឺជាពរជ័យសម្រាប់ប្រជាជនកម្ពុជាទាំងមូល។
បែបនេះក្តី ក្រុមអ្នកឃ្លាំមើលសង្គម ជំរុញឲ្យរដ្ឋាភិបាលកម្ពុជា អនុវត្តការប្រើប្រាស់សាច់ប្រាក់ដែលទទួលបានពីការបូមប្រេងទាំងនោះឲ្យមានគណនេយ្យភាព ប្រសិទ្ធភាព និងមានតម្លាភាពខ្ពស់ បើមិនដូច្នោះទេ តំណក់ប្រេងនេះគ្រាន់តែជាពរជ័យសម្រាប់បក្ខពួក និងក្រុមគ្រួសារលោក ហ៊ុន សែន តែប៉ុណ្ណោះ ប៉ុន្តែវាជាបណ្តាសាយ៉ាងព្រៃផ្សៃសម្រាប់ប្រជាពលរដ្ឋខ្មែរទូទាំងប្រទេសទៅវិញ៕