អ្នកកាសែតដែលស្និទ្ធនឹងលោក ហ៊ុន សែន ចោទជាសំណួរថា តើរដ្ឋាភិបាលកម្ពុជា ហ៊ាន ឬមិនហ៊ានក្នុងការអនុវត្តច្បាប់អន្តោប្រវេសន៍លើជនជាតិវៀតណាមខុសច្បាប់ដែលកំពុងរស់នៅលើទឹកដីកម្ពុជា យ៉ាងអណាធិបតេយ្យសព្វថ្ងៃនេះ។
ការអះអាងនេះ ធ្វើឡើងបន្ទាប់ពីសាលារាជធានីភ្នំពេញបានចេញសេចក្តីជូនដំណឹងកាលពីដើមខែមិថុនា ឆ្នាំ២០២១ ឲ្យពលរដ្ឋវៀតណាមខុសច្បាប់ដែលកំពុងរស់នៅលើផ្ទៃទឹកនៃភូមិសាស្ត្ររាជធានីភ្នំពេញ រុះរើផ្ទះបណ្ដែតទឹកទៅរស់នៅលើគោកជំនួសវិញ។
នាយកមជ្ឈមណ្ឌលសារព័ត៌មានដើមអម្ពិល លោក សយ សុភាព បានសរសេរលើគណនី Facebook របស់លោកកាលពីថ្ងៃទី១២ ខែមិថុនា ឆ្នាំ២០២១ ថា ករណីជនជាតិវៀតណាមខុសច្បាប់ជាចំណុចដែលមហាជនកំពុងយកចិត្តទុកដាក់តាមដានពីសមត្ថភាពរបស់សាលាក្រុងភ្នំពេញ យ៉ាងខ្លាំងនោះ ថាតើអាជ្ញាធរហ៊ានប្រើច្បាប់អន្តោប្រវេសន៍លើជនជាតិវៀតណាមខុសច្បាប់ទាំងនោះ ដើម្បីបញ្ជូនពួកគេទៅប្រទេសវៀតណាម វិញដែរឬទេ។
លោកអះអាងថា បញ្ហានេះអាជ្ញាធរត្រូវត្រួតពិនិត្យដោយហ្មត់ចត់ជាទីបំផុត ប្រសិនបើអ្នកទាំងនោះជាជនបរទេសដែលកំពុងរស់នៅដោយខុសច្បាប់នៅកម្ពុជា ត្រូវអនុវត្តច្បាប់អន្តោប្រវេសន៍ជាដាច់ខាត ដោយចៀសវាងការបណ្តេញជនជាតិវៀតណាមខុសច្បាប់ទាំងនោះពីរាជធានីភ្នំពេញ ប៉ុន្តែពួកគេត្រូវបានអនុញ្ញាតឲ្យរស់នៅតាមបណ្តាខេត្តនានា ដូចជាខេត្តកំពង់ឆ្នាំង និងខេត្តកណ្តាល ជាដើម ដូចដែលធ្លាប់មាននាពេលកន្លងមក។
លោក សយ សុភាព បញ្ជាក់ថា ដើម្បីដោះស្រាយលំនៅឋានបណ្តែតទឹកតាមដងទន្លេទាំងនោះ អាជ្ញាធរអាចប្រើវិធានការដូចជាការទិញត្រីទាំងអស់ពីបែចិញ្ចឹមត្រីរបស់ពួកគេ ទិញសម្ភារៈ ឬឧបករណ៍ចិញ្ចឹមត្រីដែលពួកគេមានជាដើម។ លើសពីនេះ បើម្ចាស់ចិញ្ចឹមត្រីជាជនជាតិខ្មែរ ត្រូវរកដីសម្បទានសង្គមកិច្ចឲ្យពួកគេជាបន្ទាន់។
ទាក់ទិននឹងបញ្ហានេះ នាយកប្រតិបត្តិមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM) លោក ប៉ា ងួនទៀង បានសរសេរលើគណនី Facebook របស់លោក កាលពីថ្ងៃទី១៣ ខែមិថុនា ឆ្នាំ២០២១ ថា បើលោក ហ៊ុន សែន ពិតជាមានឆន្ទៈមែន រដ្ឋាភិបាលរបស់លោកគួរតែអនុវត្តច្បាប់របស់កម្ពុជាដែលកំពុងមានសុពលភាពលើបញ្ហាអន្តោប្រវេសន៍ទាំងនោះ។
លោកបញ្ជាក់ថា ការអនុវត្តច្បាប់នេះគួរតែអនុវត្តចំពោះជនបរទេសខុសច្បាប់ទាំងអស់ ដោយរួមទាំងវៀតណាម និងចិន ជាដើម។ លើសពីនេះ រដ្ឋាភិបាលត្រូវតែអនុវត្តជាប្រព័ន្ធ និងជាប្រចាំ មិនមែនធ្វើតាមតែចិត្តនឹកឃើញម្តងម្កាល ឬធ្វើកន្លែងនេះ តែអត់កន្លែងនោះដូចសព្វថ្ងៃនេះទេ។
យ៉ាងណាក៏ដោយ កាលពីថ្ងៃទី១០ ខែកក្កដា ឆ្នាំ២០២០ ក្រសួងមហាផ្ទៃ បានចេញលិខិតមួយស្ដីពីការគ្រប់គ្រងជនបរទេសអន្តោប្រវេសន៍នៅកម្ពុជា ថាការដោះស្រាយអំពីបញ្ហាជនអន្តោប្រវេសន៍ត្រូវបានអូសបន្លាយ និងរាំងស្ទះដោយសារតែហេតុផលនយោបាយរបស់កម្ពុជា នាពេលបច្ចុប្បន្ន។
ទាក់ទិននឹងបញ្ហានេះ សារព័ត៌មាន Vietnam News បានចុះផ្សាយកាលពីពេលថ្មីៗនេះថា អ្នកនាំពាក្យការបរទេសវៀតណាម អ្នកស្រី Lê Thị Thu Hằng ជឿជាក់ថា រដ្ឋាភិបាលកម្ពុជានឹងមានការរៀបចំទីតាំងថ្មីសម្រាប់ជនជាតិវៀតណាមទាំងនោះ ដោយឈរលើហេតុផលអាចទទួលយកបាន ជាមួយនឹងការរៀបចំហេដ្ឋារចនាសម្ព័ន្ធចាំបាច់ដែលអាចធានាឲ្យជីវិតរបស់ពួកគេមានស្ថិរភាព និងការគាំទ្រសុខុមាលភាពពីសង្គម។
កាលពីអំឡុងឆ្នាំ២០១៨ រដ្ឋាភិបាលកម្ពុជា បានសម្រេចផ្តល់ដីប្រមាណ ៤០ហិកតារ ស្ថិតនៅឃុំស្វាយជ្រុំ ស្រុករលាប្អៀ ខេត្តកំពង់ឆ្នាំង ដើម្បីរៀបចំកន្លែងរស់នៅថ្មីសម្រាប់ជនជាតិវៀតណាម និងជនជាតិអ៊ីស្លាម ដែលកំពុងរស់នៅលើបឹងទន្លេសាបមានចំនួនប្រមាណជិត ៥ពាន់គ្រួសារ។ ក្នុងនោះ ជនអន្តោប្រវេសន៍វៀតណាម មានចំនួនជាង ២៣០០គ្រួសារ ដែលស្មើនឹងចំនួនប្រជាជនជាង ១ម៉ឺននាក់។
អ្នកសង្កេតការណ៍ រិះគន់ថា ជនជាតិវៀតណាមខុសច្បាប់បានហូរចូលមកកម្ពុជាកាន់តែច្រើនឡើងៗ បន្ទាប់ពីលោក ហ៊ុន សែន ត្រូវបានរដ្ឋាភិបាលវៀតណាម លើកបន្តុបជានាយករដ្ឋមន្ត្រីខ្មែរកាលពីឆ្នាំ១៩៨៥ មក។ ពួកគេរិះគន់ថា សម័យស្តេចជ័យជេដ្ឋាទី២ គ្រាន់តែឲ្យដីវៀតណាម ខ្ចីប៉ុណ្ណោះ តែសម័យលោក ហ៊ុន សែន ហៅវៀតណាម ឲ្យចូលស្រុកខ្មែរ ហើយកាត់ដីឲ្យពួកគេរស់នៅថែមទៀត។
កាលពីឆ្នាំ១៩៨៦ លោក ហ៊ុន សែន បានចេញសារាចរណែនាំមួយស្ដីពីការអនុវត្តគោលនយោបាយចំពោះជនជាតិវៀតណាម ដែលបានចូលរស់នៅកម្ពុជា ដោយផ្តល់ដីធ្លី ទីជម្រក ឧបត្ថម្ភផ្តល់អត្តសញ្ញាណប័ណ្ណ ថែរក្សា និងផ្គត់ផ្គង់ ជាដើម ទៅលើជនជាតិវៀតណាមទាំងនោះដោយយកចិត្តទុកដាក់ជាទីបំផុត ដែលសារាចរនេះនៅតែមានសុពលភាពរហូតដល់សព្វថ្ងៃនេះផងដែរ៕