ប្រភពដែលគួរឲ្យទុកចិត្តបាន ថ្លែងថា ក្រុមលោក ថាច់ សេដ្ឋា កំពុងដំណើរការបង្កើតគណបក្សបេះដូងជាតិ មានឈ្មោះ សៀម ភ្លុក ដែលតែងតែចោទអ្នកនយោបាយមួយចំនួនថាជាអាយ៉ងរបស់គណបក្សប្រជាជនកម្ពុជា នោះ ជាអ្នកចេញមុខស្នើទៅក្រសួងមហាផ្ទៃ។
លិខិតរបស់ក្រសួងមហាផ្ទៃ ចេញកាលពីថ្ងៃទី៩ ខែមិថុនា ឆ្នាំ២០២១ ដែលកាសែត The Cambodia Daily ទទួលបាននៅល្ងាចមិញនេះ បានសរសេរតបទៅលោក សៀម ភ្លុក ជាស្ថាបនិកគណបក្សបេះដូងជាតិ ឲ្យបំពេញលក្ខខណ្ឌមួយចំនួនដូចជាសញ្ញាសម្គាល់គណបក្ស ដោយអនុលោមតាមការកំណត់ក្នុងបញ្ញត្តិមាត្រា១១ថ្មី ត្រង់កថាខណ្ឌទី៣ នៃច្បាប់ស្ដីពីគណបក្សនយោបាយ រួចហើយត្រូវផ្ញើជូនក្រសួងមហាផ្ទៃ ជាកំណត់។
អ្នកឃ្លាំមើលបញ្ហាសង្គម បានចោទជាសំណួរថា តើគណបក្សបង្កើតថ្មីនេះមានការគាំទ្រពីភាគីលោក សម រង្ស៊ី ដែរឬទេ? ហើយរដ្ឋាភិបាលរបស់លោក ហ៊ុន សែន មានវិធានការយ៉ាងណាដែរ ប្រសិនបើគណបក្សថ្មីនេះមានជាប់ពាក់ព័ន្ធនឹងអ្នកនយោបាយដែលត្រូវតុលាការលោក ហ៊ុន សែន កំពុងតាមចាប់ខ្លួន?
សកម្មជនគណបក្សសង្គ្រោះជាតិ ដែលស្និទ្ធនឹងលោក កឹម សុខា គឺលោក ហ៊ុន កុសល បានសរសេរក្នុងបណ្ដាញសង្គម Facebook របស់លោកថា តាមរយៈមន្ត្រីមូលដ្ឋានគណបក្សសង្គ្រោះជាតិ ប្រាប់មកថា សមាសភាពដឹកនាំគណបក្សបេះដូងជាតិ ដែលបង្កើតឡើងថ្មីនេះមានលោក ថាច់ សេដ្ឋា និងកញ្ញា ស៊ីន ចាន់ពៅរ៉ូស្សិត ជាសមាសភាពដឹកនាំបក្ស។
លោក ហ៊ុន កុសល បានលើកឡើងទៀតថា បញ្ហានៅត្រង់ថា តើគណបក្សនេះបង្កើតឡើងដោយមានការបើកភ្លើងខៀវពីលោក សម រង្ស៊ី និងលោក អេង ឆៃអ៊ាង ឬយ៉ាងណា? បើមិនមានការបើកភ្លើងខៀវទេ ប្រជាជនខ្មែរត្រូវតាមដានមើលថា តើនឹងមានការថ្កោលទោសពីភាគីក្រុមលោក សម រង្ស៊ី និងលោក អេង ឆៃអ៊ាង ឬទេ? ព្រោះរហូតមក ក្រោយការរំលាយគណបក្សសង្គ្រោះជាតិ លោក សម រង្ស៊ី ឬមនុស្សជំនិតៗរបស់គាត់តែងវាយប្រហារ ថ្កោលទោសមិនសំចៃមាត់អ្នកចេញសុំសិទ្ធិនយោបាយបែកចេញពីគណបក្សសង្គ្រោះជាតិ ទៅបង្កើតគណបក្សថ្មីតាមការអំពាវនាវរបស់លោក ហ៊ុន សែន។
ប្រភពដដែលបញ្ជាក់ទៀតថា បើមានការបើកភ្លើងខៀវពីលោក សម រង្ស៊ី និងលោក អេង ឆៃអ៊ាង មែននោះ តាមច្បាប់គណបក្សនយោបាយកម្ពុជា ដែលគណបក្សប្រជាជនកម្ពុជា បង្កើតសម្រាប់ចងគណបក្សសង្គ្រោះជាតិនោះ មិនថាអង្គការ សមាគម ឬគណបក្សនយោបាយទេ គឺមិនអាចភ្ជាប់ជាមួយនឹងទណ្ឌិតបានឡើយ ដូច្នេះបើរដ្ឋាភិបាលដឹកនាំដោយគណបក្សប្រជាជនកម្ពុជា ធ្វើមិនដឹង មិនខ្វល់ខ្វាយ មិនអនុវត្តច្បាប់បក្សនយោបាយទេនោះ បានន័យថា គណបក្សប្រជាជនកម្ពុជា និងភាគីលោក សម រង្ស៊ី កំពុងស្រាក់ដៃជើងគ្នាដើម្បីបំផ្លាញស្មារតីគណបក្សសង្គ្រោះជាតិ តាមរយៈបង្កើតបក្សឲ្យបានច្រើនសម្រាប់ហែហមកំដរអំណាចគណបក្សប្រជាជនកម្ពុជា ក្នុងការបោះឆ្នោតជ្រើសរើសក្រុមប្រឹក្សាឃុំ-សង្កាត់ឆ្នាំ២០២២ ខាងមុខនេះ៕