ទឹកដីកម្ពុជា និងពលរដ្ឋខ្មែរមានប្រវត្តិជូរចត់ដោយសារការរំលោភបំពានពីបរទេសជិតខាងជាច្រើនសម័យកាល ជាពិសេសប្រទេសវៀតណាម តាំងពីដូនតារហូតមកដល់ពេលបច្ចុប្បន្ននេះ ពួកគេបានឈ្លានពានកម្ពុជាគ្រប់រូបភាព បើទោះបីជាសកម្មភាពទាំងនោះត្រូវគេមើលឃើញថាជាការធ្វើទំនាក់ទំនងការទូត ការជួយឧបត្ថម្ភ ឬការចងសម្ព័ន្ធមិត្តយ៉ាងណាក៏ដោយ គឺគ្រាន់តែជាការលាក់មហិច្ឆតាដើម្បីទន្ទ្រាន និងរំលោភទឹកដីរបស់ខ្មែរប៉ុណ្ណោះ។
ក្រុមអ្នកឃ្លាំមើលរិះគន់ថា ក្រោយពេលលោក ហ៊ុន សែន ត្រូវបានរដ្ឋាភិបាលវៀតណាម លើកបន្តុបជានាយករដ្ឋមន្ត្រីខ្មែរនៅឆ្នាំ១៩៨៥ ក្រោយមកកម្ពុជាបានផុងខ្លួនបន្តិចម្តងៗចូលក្នុងការគ្រប់គ្រងរបស់វៀតណាម ទាំងវិស័យនយោបាយ និងយោធា ដែលធ្វើឲ្យកម្ពុជាបាត់បង់អធិបតេយ្យភាពរបស់ខ្លួនយ៉ាងធ្ងន់ធ្ងរ ជាពិសេសលើឆាកអន្តរជាតិតែម្តង។
បញ្ហានេះ បានជំរុញឲ្យរដ្ឋាភិបាលកម្ពុជា យល់ព្រមចុះហត្ថលេខាលើកិច្ចព្រមព្រៀង និងសន្ធិសញ្ញាខុសច្បាប់គ្រប់បែបយ៉ាងជាមួយរដ្ឋាភិបាលវៀតណាម ដែលសុទ្ធសឹងតែជាកិច្ចព្រមព្រៀង និងសន្ធិសញ្ញាដែលជាការកាត់ទឹកដីឲ្យបរទេសមួយនេះ ក្នុងនោះរួមមានកិច្ចព្រមព្រៀងស្ដីពីព្រំដែនទឹកឆ្នាំ១៩៨២ សារាចរអនុញ្ញាតឲ្យជនជាតិវៀតណាម អាចចូលកម្ពុជា ទាំងខុសច្បាប់អន្តោប្រវេសន៍របស់ខ្លួនកាលពីឆ្នាំ១៩៨៦ កិច្ចព្រមព្រៀងស្ដីពីលក្ខន្តិកៈព្រំដែនឆ្នាំ១៩៨៣ និងសន្ធិសញ្ញាកំណត់ព្រំដែនរដ្ឋឆ្នាំ១៩៨៥ ជាដើម។
ក្រោមកិច្ចព្រមព្រៀងខុសច្បាប់ទាំងនេះ ប្រទេសវៀតណាមបានកាត់ឆ្វៀលយកទឹកដីខ្មែរជាច្រើនអន្លើ ក្នុងនោះមានកោះត្រល់ ចង្កោមកោះក្រចកសេះ និងគ្រប់គ្រងដែនអាកាស ព្រមទាំងដាក់ផ្ទៃសមុទ្រទំហំ ១ម៉ឺនគីឡូម៉ែត្រក្រឡាដែលជាកម្មសិទ្ធិរបស់កម្ពុជា ឲ្យទៅជាដែនទឹករួមគ្នាជាមួយវៀតណាម ថែមទៀត។
យ៉ាងណាក៏ដោយ នៅអំឡុងឆ្នាំ២០២០ កន្លងទៅនេះ រដ្ឋាភិបាលលោក ហ៊ុន សែន ហាក់បង្ហាញជំហរងាកទៅរកមហាអំណាចចិន ដើម្បីជាខ្នងបង្អែកក្នុងការការពារអំណាចរបស់ខ្លួន ក៏ប្រហែលជាដើម្បីរក្សាអធិបតេយ្យរបស់កម្ពុជាផងដែរ។
ក្នុងនោះ រដ្ឋាភិបាលចិន បានបង្ហាញពីការរឹតចំណងការទូតជាមួយកម្ពុជាយ៉ាងខ្លាំង ស្របពេលដែលវៀតណាម កំពុងព្រួយបារម្ភពីឥទ្ធិពលរបស់ចិនទៅលើកម្ពុជា ដែលនឹងធ្វើឲ្យខូចផែនការឈ្លានពានទឹកដីកម្ពុជារបស់គេ ក៏ដូចជាការព្រួយបារម្ភពីឥទ្ធិពលនយោបាយក្នុងតំបន់របស់ចិន ដែលនឹងធ្វើឲ្យប៉ះពាល់ដល់អធិបតេយ្យភាពរបស់វៀតណាមផងដែរ។
ដើម្បីបញ្ចៀសបញ្ហានេះ រដ្ឋាភិបាលក្រុងហាណូយ មានតែរិះរកវិធីធ្វើឲ្យទំនាក់ទំនងរវាងមហាអំណាចចិន និងកម្ពុជា ត្រូវកាត់ផ្ដាច់ដោយជំនួសមកវិញនូវទំនាក់ទំនង និងការគ្រប់គ្រងដោយវៀតណាមដដែល និងធ្វើឲ្យកម្ពុជាក្លាយជារដ្ឋឯកោមួយដែលមហាអំណាចទាំងអស់លែងយកចិត្តទុកដាក់បន្តទៀត។
ជុំវិញបញ្ហានេះ កាលពីដើមខែមិថុនា ឆ្នាំ២០២១ រដ្ឋាភិបាលកម្ពុជា បានចេញសេចក្តីជូនដំណឹងឲ្យពលរដ្ឋវៀតណាមខុសច្បាប់ចំនួន ១ពាន់គ្រួសារដែលកំពុងរស់នៅលើផ្ទៃទឹកនៃភូមិសាស្ត្ររាជធានីភ្នំពេញ ឲ្យរុះរើផ្ទះបណ្ដែតទឹករបស់ពួកគេចេញពីផ្ទៃទឹករបស់កម្ពុជាជាដាច់ខាត។
ប៉ុន្តែឯកអគ្គរដ្ឋទូតវៀតណាម ប្រចាំនៅកម្ពុជា លោក វូ ក្វាងមិញ កាលពីថ្ងៃទី៤ ខែមិថុនា ឆ្នាំ២០២១ បានប្រតិកម្មថា ការដាក់កំហិតរយៈពេលដ៏ខ្លីឲ្យប្រជាជនវៀតណាមខុសច្បាប់ទាំងនោះចាកចេញពីផ្ទៃទឹករបស់កម្ពុជា គឺជាវិធានការបន្ទាន់ពេក និងមិនអាចអនុវត្តទៅរួចឡើយ។
បន្ថែមពីនេះ ប្រធានសមាគមវៀតណាម លោក ស៊ឹម ជី បានដាក់លិខិតទៅកាន់រដ្ឋបាលរាជធានីភ្នំពេញ ដោយបានស្នើសុំបីចំណុចសំខាន់ៗ៖
- ទី១ ស្នើសុំពន្យារពេលសមស្របបំផុតដើម្បីផ្លាស់ប្ដូរទីតាំង
- ទី២ ស្នើសុំឱ្យរដ្ឋបាលរាជធានីភ្នំពេញ រកទីតាំងថ្មីដែលពួកគេអាចប្រកបរបរចិញ្ចឹមត្រីបានសមរម្យដូចពីមុន
- ទី៣ ស្នើឱ្យមានថវិកាដើម្បីជួយផ្គត់ផ្គង់ឱ្យពួកគេមានលទ្ធភាពរស់នៅពេលពួកគេផ្លាស់ប្ដូរទៅរស់នៅទីតាំងថ្មី។
លើសពីនេះ អ្នកនាំពាក្យក្រសួងការបរទេសវៀតណាម បានលើកឡើងក្នុងសេចក្តីថ្លែងការណ៍មួយកាលពីថ្ងៃទី១០ ខែមិថុនា ឆ្នាំ២០២១ អ្នកស្រី Lê Thị Thu Hằng បានស្នើសុំកម្ពុជារៀបចំឲ្យមានផែនទីបង្ហាញផ្លូវសមស្របសម្រាប់សហគមន៍ពលរដ្ឋវៀតណាម ដើម្បីធានាបាននូវសិទ្ធិ និងសុខុមាលភាពពេញលេញ។
អ្នកស្រីបានបញ្ជាឲ្យកម្ពុជាត្រូវតែរៀបចំទីតាំងថ្មីសម្រាប់ពលរដ្ឋវៀតណាម ដែលត្រូវឈរលើហេតុផលអាចទទួលយកបានជាមួយនឹងការរៀបចំហេដ្ឋារចនាសម្ព័ន្ធចាំបាច់ ដែលធានាឱ្យជីវិតរបស់ពួកគេមានស្ថិរភាព និងការគាំទ្រសុខុមាលភាពពីសង្គមផងដែរ។
ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា បណ្ឌិត គិន ភា បានសរសេរលើគណនី Facebook របស់លោក កាលពីថ្ងៃទី១៣ ខែមិថុនា ថា រដ្ឋាភិបាលវៀតណាម មិនគួរយកបញ្ហាជនអន្តោប្រវេសន៍របស់ខ្លួនបង្កឱ្យមានការឈឺចាប់បន្ថែមទៀតដល់ពលរដ្ឋខ្មែរនោះទេ ហើយវៀតណាម គួររៀបចំផែនការមាតុភូមិនិវត្តន៍សម្រាប់ជនជាតិរបស់ខ្លួនទៅកាន់ប្រទេសកំណើតដើមវិញ និងមិនត្រូវគិតតែពីសុំភាពស្របច្បាប់សម្រាប់ពលរដ្ឋខុសច្បាប់របស់ខ្លួនឲ្យនៅកម្ពុជាបន្តទៀតនោះដែរ។
លោក គិន ភា បន្តថា ពេលនេះល្មមដល់ពេលបញ្ចប់នយោបាយដំណើរឆ្ពោះទៅទិសខាងលិច ដើម្បីរំលោភទឹកដីកម្ពុជាហើយ ត្បិតក្នុងប្រវត្តិសាស្ត្របានបង្ហាញថា កម្ពុជាបានបាត់បង់ទឹកដីច្រើនណាស់ទៅប្រទេសវៀតណាម ដូចជាទឹកដីកម្ពុជាក្រោម និងក្រុងព្រៃនគរ ដែលមានពលរដ្ឋដើមកំណើតខ្មែររាប់លាននាក់រស់នៅទីនោះ ក្នុងនោះក៏មានកោះត្រល់ និងចង្កោមកោះក្រចកសេះ ដែលត្រូវប្រទេសកុម្មុយនីស្តមួយនេះបានគ្រប់គ្រងរហូតដល់សព្វថ្ងៃនេះផងដែរ។
ការអះអាងរបស់ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា បណ្ឌិត គិន ភា ធ្វើឡើងបន្ទាប់ពីឯកអគ្គរដ្ឋទូតវៀតណាម ប្រចាំនៅកម្ពុជា លោក វូ ក្វាងមិញ បានថ្លែងប្រតិកម្មចំពោះវិធានការរបស់រដ្ឋបាលរាជធានីភ្នំពេញ ដែលបានសម្រេចបណ្តេញជនជាតិវៀតណាមខុសច្បាប់រស់នៅតាមដងទន្លេក្នុងទីក្រុងភ្នំពេញ ដើម្បីរៀបចំសណ្ដាប់ធ្នាប់ក្រុងឡើងវិញកាលពីពេលថ្មីៗនេះ។
លោកចាត់ទុកថា សម្ដីរបស់មន្ត្រីទូតវៀតណាមជាការប្រមាថយ៉ាងធ្ងន់ធ្ងរចំពោះឯករាជ្យ និងអធិបតេយ្យរបស់កម្ពុជា ដែលមានន័យបង្កប់យ៉ាងជ្រៅថា រដ្ឋាភិបាលកម្ពុជាស្ថិតក្រោមបង្គាប់វៀតណាម ឬអាយ៉ងវៀតណាម ដែលធ្វើឱ្យប្រជាពលរដ្ឋខ្មែរចងកំហឹង និងស្អប់រដ្ឋាភិបាលខ្លួនឯងយ៉ាងខ្លាំង។
លោកថា សម្ដីទាំងនេះ គឺលេចចេញនូវភាពពិសពុលរបស់វៀតណាម ដែលមានបំណងធ្វើឱ្យប្រជាជាតិខ្មែរបែកបាក់សាមគ្គីជាតិ បង្កើតគម្លាតនៃទំនុកចិត្តរវាងពលរដ្ឋកម្ពុជា និងរដ្ឋាភិបាលរបស់ខ្លួនថែមទៀត។
បណ្ឌិត គិន ភា ប្រតិកម្មថា ការអនុវត្តនូវវិធានផ្ទៃក្នុង ឬច្បាប់ផ្ទៃក្នុងរបស់កម្ពុជា ក៏ដូចជាការកំណត់នយោបាយក្រៅប្រទេស គឺជាសិទ្ធិផ្ដាច់មុខរបស់កម្ពុជា ដែលរដ្ឋបរទេសគ្មានសិទ្ធិមកលូកលាន់កិច្ចការផ្ទៃក្នុងរបស់កម្ពុជានោះទេ។ ជាក់ស្តែងចំណាត់ការរបស់រដ្ឋបាលរាជធានីភ្នំពេញ គឺជាកិច្ចការផ្ទៃក្នុងរបស់កម្ពុជាសុទ្ធសាធ គ្មានពាក់ព័ន្ធអ្វីបន្តិចណាសោះជាមួយនឹងរដ្ឋាភិបាលវៀតណាម។
លោកលើកឡើងទៀតថា ការជួយរបស់កម្ពុជា ដើម្បីបុព្វហេតុបង្រួបបង្រួមទឹកដីវៀតណាម បានធ្វើឱ្យសហរដ្ឋអាមេរិកទម្លាក់គ្រាប់បែករាប់លានតោននៅលើទឹកដីកម្ពុជា និងបានធ្វើឱ្យប្រជាជនកម្ពុជាស្លាប់ និងរងរបួសរាប់សែននាក់ បន្ទាប់រដ្ឋាភិបាលខ្មែរបានជួយជ្រោមជ្រែងកងទ័ពយៀកកុង ឲ្យលាក់ខ្លួននៅក្នុងស្រុកខ្មែរ យកលេសទៅវាយរំដោះវៀតណាមខាងត្បូង ឬកម្ពុជាក្រោមកាលពីអំឡុងទសវត្ស១៩៦០។
លោកលើកឡើងថា ពលរដ្ឋខ្មែរពិតជាមានអារម្មណ៍ចាញ់ប្រៀបវៀតណាមខ្លាំងណាស់ ព្រោះប្រជាជន កម្មាភិបាល និងថ្នាក់ដឹកនាំវៀតណាម មិនបានគិតដល់តម្លៃនៃទំនាក់ទំនង និងមិត្តភាពក្នុងនាមជាអ្នកជិតខាងល្អនោះទេ តែបែរជាព្យាយាមចាក់ទឹកត្រីទៅលើស្នាមរបួសរបស់ខ្មែរ ដែលបណ្តាលឲ្យមានការឈឺចាប់កាន់តែខ្លាំងទៅវិញ។
កាលពីដើមឆ្នាំ១៩៦០ រដ្ឋាភិបាលកម្ពុជា បានអនុញ្ញាតឲ្យវៀតណាមខាងជើងសាងសង់ផ្លូវយុទ្ធសាស្ត្រសង្គ្រាមមួយដែលហៅថា «ផ្លូវលំហូជីមិញ» ក្នុងចម្ងាយដី ១២៧០គីឡូម៉ែត្រ តាមបណ្តោយព្រំដែនខាងកើត ពីខេត្តរតនគិរី រហូតដល់ខេត្តកំពត ដែលជាការជួយជ្រោមជ្រែងដល់កងទ័ពវៀតណាមខាងជើង ឬយៀកកុង ឲ្យមានមូលដ្ឋានរឹងមាំក្នុងការឈរជើងប្រយុទ្ធជាមួយកងទ័ពវៀតណាមសេរីខាងត្បូង ដែលគាំទ្រដោយកងទ័ពអាមេរិក បើទោះបីកម្ពុជានៅពេលនោះប្រកាសជំហរអព្យាក្រឹត្យ មិនចូលបក្សសម្ព័ន្ធណាមួយក៏ដោយ។
ដោយសារការជ្រោមជ្រែងនេះហើយ ទើបវៀតណាម អាចរួបរួមគ្នាទៅជាសាធារណរដ្ឋសង្គមនិយមវៀតណាមដូចសព្វថ្ងៃនេះ។
ប៉ុន្តែបញ្ហានេះ បានរុញឱ្យកម្ពុជាធ្លាក់ក្នុងភ្នក់ភ្លើងសង្គ្រាមដែលត្រូវចំណាយជីវិតពលរដ្ឋខ្មែរជាង ៣លាននាក់ ប៉ុន្តែវៀតណាម មិនដែលរំឭកគុណបំណាច់របស់ខ្មែរនោះឡើយ តែបែរជាមានគំនិតឈ្លានពានទឹកដីខ្មែរគ្រប់ល្បិចកល និងគ្រប់រូបភាព ដូចជាការបង្ហូរជនជាតិរបស់ខ្លួនដោយខុសច្បាប់ឲ្យចូលមករស់នៅលើទឹកដីកម្ពុជារាប់លាននាក់ ជាដើម។
អ្នកកាសែតដែលស្និទ្ធនឹងលោកនាយករដ្ឋមន្ត្រី ហ៊ុន សែន ប្រកាសថា ខ្មែរនៅពេលនេះមិនមែនខ្មែរក្នុងរជ្ជកាលដែលរដ្ឋាភិបាលវៀតណាម មានឥទ្ធិពលអាចគាបសង្កត់បានទៀតនោះទេ។
ការអះអាងនេះ ធ្វើឡើងបន្ទាប់ពីសាលារាជធានីភ្នំពេញបានសម្រេចរុះរើផ្ទះបណ្តែតទឹកជនជាតិវៀតណាមខុសច្បាប់ដែលបានរស់នៅយ៉ាងអណាធិបតេយ្យតាមដងទន្លេ ក្នុងភូមិសាស្ត្ររាជធានីភ្នំពេញ ក្រោយសេចក្តីជូនដំណឹងរបស់ខ្លួនបានផុតកំណត់កាលពីថ្ងៃទី១១ ខែមិថុនា ឆ្នាំ២០២១ កន្លងទៅនោះ។
ចំណែកនាយកមជ្ឈមណ្ឌលសារព័ត៌មានដើមអម្ពិល លោក សយ សុភាព បានសរសេរលើគណនី Facebook របស់លោកកាលពីថ្ងៃទី១៤ ខែមិថុនា ឆ្នាំ២០២១ ថា ពេលនេះដល់វេនអគ្គនាយកដ្ឋានអន្តោប្រវេសន៍ម្តងហើយ ថាតើអគ្គនាយកដ្ឋាននេះហ៊ានអនុវត្តច្បាប់អន្តោប្រវេសន៍លើជនជាតិវៀតណាមខុសច្បាប់ដែរឬទេ ខណៈពលរដ្ឋខ្មែរមួយនគរនាំគ្នាអបអរវិធានការរដ្ឋបាលរាជធានីភ្នំពេញ ដែលបានអនុវត្តកន្លងមកនោះ។
លោកអះអាងថា អគ្គនាយកដ្ឋានអន្តោប្រវេសន៍ត្រូវតែពិនិត្យឲ្យបានហ្មត់ចត់ចំពោះនិគមជនវៀតណាម ដែលធ្លាប់តែរស់នៅ និងបង្កភាពអណាធិបតេយ្យ បំពុលបរិស្ថានតាមដងទន្លេកន្លងមក និងត្រូវដាក់ចេញនូវវិធានការស្រង់ស្ថិតិឲ្យបានលម្អិតថា តើពួកគេចូលមកស្រុកខ្មែរតាំងពីពេលណា និងមានលិខិតឆ្លងដែនឬទេ? បញ្ហានេះ ពលរដ្ឋខ្មែរទូទាំងប្រទេសកំពុងរង់ចាំមើលថា តើអគ្គនាយកដ្ឋានអន្តោប្រវេសន៍ នឹងអនុវត្តកិច្ចការរបស់ខ្លួនបានល្អប្រសើរកម្រិតណាចំពោះជនបរទេសខុសច្បាប់ទាំងនោះក្នុងស្ថានភាពនេះ។
លោក សយ សុភាព បញ្ជាក់ថា បញ្ហាដែលមិនអនុញ្ញាតឲ្យនិគមវៀតណាមរស់នៅលើផ្ទៃទឹក ឬក៏ឡើងគោកក្នុងពេលនេះ គឺជាប្រធានបទសំខាន់ណាស់ ដូច្នេះសូមអគ្គនាយកដ្ឋានអន្តោប្រវេសន៍ត្រូវបង្ហាញពីភាពម៉ឺងម៉ាត់ក្នុងការអនុវត្តច្បាប់ ដោយមិនខ្លាចក្រែងចំពោះឥទ្ធិពលរបស់វៀតណាម តទៅទៀតនោះទេ។
លោកអះអាងថា ប្រទេសថៃ មិនដែលផ្តល់សញ្ជាតិឱ្យនិគមជនវៀតណាម ឬចិន នោះទេ បើទោះបីជាជនជាតិទាំងនោះរស់នៅរហូតជិតស្លាប់ទៅវិញក៏ដោយ។
នាយកមជ្ឈមណ្ឌលសារព័ត៌មានដើមអម្ពិលរូបនេះ បញ្ជាក់ថា ពេលនេះខ្មែរត្រូវការកសាងប្រទេស និងបង្រួបបង្រួមជាតិ បន្ទាប់ពីខ្មែរបានបែកបាក់សាមគ្គីជាតិដោយសារបរទេសឈ្លានពានអស់រាប់ទសវត្សមកហើយនោះ។
ទាក់ទិននឹងបញ្ហានេះ មន្ត្រីជាន់ខ្ពស់បក្សប្រឆាំង លោក មាជ សុវណ្ណារ៉ា បានអះអាងដែរថា សហគមន៍ភូមិអណ្ដែតទឹកកំពង់ហ្លួង មានទីតាំងស្ថិតក្នុងឃុំកំពង់ហ្លួង ស្រុកក្រគរ ខេត្តពោធិ៍សាត់ មានភូមិសរុបចំនួន ១០ ក្នុងនោះពលរដ្ឋខ្មែរធ្វើជាមេភូមិមានចំនួន ៣ភូមិ រីឯជនជាតិវៀតណាម ធ្វើជាមេភូមិមានដល់ទៅ ៧ភូមិឯណោះ។ លើសពីនេះ ពួកគេបានក្លាយជាក្រុមប្រឹក្សាឃុំ-សង្កាត់ទៀតផង។
លោកលើកឡើងថា ជនជាតិវៀតណាមដែលរស់នៅក្នុងតំបន់កំពង់ហ្លួងទាំងនោះ មិនដឹងថាតើពួកគេមានឯកសារត្រឹមត្រូវតាមច្បាប់អន្តោប្រវេសន៍ ឬស្របតាមច្បាប់សញ្ជាតិឬក៏អត់នោះទេ ប៉ុន្តែការរស់នៅរបស់ពួកគេ ហាក់មានឥទ្ធិពលអាងយ៉ាងវាតទីជាងពលរដ្ឋខ្មែរជាម្ចាស់ស្រុកទៅទៀត។
លោក មាជ សុវណ្ណារ៉ា សម្ដែងការព្រួយបារម្ភថា ជនជាតិវៀតណាមទាំងនោះកំពុងទន្ទ្រាន និងកាប់បំផ្លាញព្រៃលិចទឹកដែលជាជម្រកត្រីពង ដើម្បីយកដីកាន់កាប់ជាកម្មសិទ្ធិរបស់ខ្លួន និងបង្កភាពអណាធិបតេយ្យយ៉ាងធ្ងន់ធ្ងរ ដោយការប្រើប្រាស់ឧបករណ៍នេសាទខុសច្បាប់ព្រោងព្រាតមិនកោតញញើតច្បាប់ ឬអាជ្ញាធរខ្មែរនោះឡើយ។
កាលពីឆ្នាំ២០០៣ ព្រះមហាក្សត្រខ្មែរ ព្រះបាទនរោត្តម សីហនុ បានចេញព្រះរាជសារមួយទៅកាន់ជនរួមជាតិខ្មែរ ដោយប្រកាសថា ជនអន្តោប្រវេសន៍វៀតណាមខុសច្បាប់បានចូលទៅរស់នៅលើទឹកដីកម្ពុជា មានចំនួនដល់ទៅរាប់លាននាក់ឯណោះ។
ប្រធានប្រតិបត្តិនៃចលនានិស្សិតដើម្បីលទ្ធិប្រជាធិបតេយ្យ លោក ទូច វិបុល បានសរសេរលើគណនី Facebook របស់លោក កាលពីថ្ងៃទី១៣ ខែមិថុនា ឆ្នាំ២០២១ ថា យុទ្ធសាស្ត្ររបស់វៀតណាមព្យាយាមបង្កភាពវឹកវរនៅកម្ពុជា ហើយទម្លាក់កំហុសទៅឱ្យចិន ដើម្បីទាញសហរដ្ឋអាមេរិក ឲ្យថ្កោលទោសកម្ពុជា និងចិន ព្រមទាំងរុញឲ្យអាមេរិក និងចិន ឈ្លោះគ្នានៅលើទឹកដីកម្ពុជាថែមទៀត។ បញ្ហានេះ អ្នកដែលខាតបង់គឺកម្ពុជា ចំណែកអ្នកដែលចំណេញ គឺវៀតណាម។
លោក ទូច វិបុល បញ្ជាក់ថា នាយករដ្ឋមន្ត្រីកម្ពុជាត្រូវតែចេញសេចក្តីថ្លែងការណ៍ជាសាធារណៈដើម្បីទប់ស្កាត់ និងបញ្ឈប់ការឈ្លានពានរបស់វៀតណាម ដោយការស្នើច្បាប់ទៅសភាជាតិ ដើម្បីធ្វើមោឃភាពរាល់សន្ធិសញ្ញា និងកិច្ចព្រមព្រៀងជាមួយវៀតណាមចោលទាំងអស់។ បន្ទាប់មកត្រូវតែប្រើយន្តការអន្តរជាតិប្តឹងទៅតុលាការអន្តរជាតិក្រុងឡាអេ អំពីការរំលោភដែនអធិបតេយ្យភាពរបស់កម្ពុជាកន្លងមក។
លោកអះអាងថា ដើម្បីបានទឹកដីកម្ពុជាត្រឡប់មកវិញ និងបញ្ឈប់ការឈ្លានពានរបស់វៀតណាម រដ្ឋាភិបាលកម្ពុជាត្រូវតែប្រើប្រាស់កិច្ចព្រមព្រៀងសន្តិភាពទីក្រុងប៉ារីស ២៣ តុលា ឆ្នាំ១៩៩១ ជាដាច់ខាត៕