អ្នកឃ្លាំមើលជំរុញឲ្យរដ្ឋាភិបាលកម្ពុជា អនុវត្តច្បាប់អន្តោប្រវេសន៍ដើម្បីដេញជនអន្តោប្រវេសន៍ខុសច្បាប់ចេញពីកម្ពុជា ដោយការអនុវត្តនេះត្រូវធ្វើនៅទូទាំងប្រទេស និងមានកិច្ចសហការជាមួយស្ថាប័នអន្តរជាតិដែលពាក់ព័ន្ធ ដើម្បីកុំឱ្យជាប់ឈ្មោះជាមេដឹកនាំក្បត់ប្រយោជន៍ជាតិខ្មែរ ហើយគិតប្រយោជន៍ជនជាតិវៀតណាមខុសច្បាប់ជាធំ។
ក្រុមអ្នកឃ្លាំមើលបញ្ហាសង្គម និងមន្ត្រីគណបក្សប្រឆាំង ជំរុញឱ្យរដ្ឋាភិបាលកម្ពុជាអនុវត្តច្បាប់អន្តោប្រវេសន៍លើជនអន្តោប្រវេសន៍វៀតណាមខុសច្បាប់ដែលកំពុងរស់នៅក្នុងប្រទេសកម្ពុជា ដើម្បីកុំឱ្យជាប់ឈ្មោះជាមេដឹកនាំដែលតែងគិតប្រយោជន៍ជនបរទេសខុសច្បាប់ជាធំ ជាងពលរដ្ឋម្ចាស់ប្រទេស។
ការលើកឡើងរបស់ក្រុមអ្នកឃ្លាំមើល ធ្វើឡើងបន្ទាប់ពីប្រធានសមាគមវៀតណាម លោក ស៊ឹម ជី បានដាក់លិខិតទៅកាន់រដ្ឋបាលរាជធានីភ្នំពេញ ដើម្បីស្នើសុំពន្យារពេល និងសម្របសម្រួលការផ្លាស់ប្ដូរទីតាំង ព្រមទាំងស្នើសុំថវិកាខ្លះដើម្បីជួយផ្គត់ផ្គង់ឱ្យពួកគេមានលទ្ធភាពចិញ្ចឹមជីវិតនៅពេលចេញទៅវិញជាដើម។
ក្រៅពីសុំពន្យារពេល និងផ្ដល់ថវិកា សមាគមវៀតណាមក៏បានសុំសាលារាជធានីភ្នំពេញជួយរកទីតាំងថ្មីឱ្យជនជាតិវៀតណាម អាចចិញ្ចឹមត្រីបន្តទៀតបាន ខណៈមន្ត្រីការបរទេសវៀតណាម ស្នើមករដ្ឋាភិបាលកម្ពុជាឱ្យធានាអត្ថប្រយោជន៍សុខុមាលភាព និងបន្តផ្ដល់ភាពស្របច្បាប់ដល់ជនជាតិវៀតណាម ដែលកំពុងរស់នៅក្នុងប្រទេសកម្ពុជា បច្ចុប្បន្ននេះ។
ជាងនេះទៅទៀត វៀតណាមក៏ប្រកាសប្រាប់ប្រជាជនខ្លួនដែលកំពុងរស់នៅប្រទេសកម្ពុជា កុំឱ្យត្រឡប់ទៅប្រទេសកំណើតវិញ ក្រោមហេតុផលថាជំងឺ Covid-19 នៅប្រទេសវៀតណាម កំពុងរីករាលដាល។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា ចាត់ទុកការមិនទទួលយកពលរដ្ឋរបស់ខ្លួនពីសំណាក់រដ្ឋាភិបាលវៀតណាម ដោយហេតុផលប្រទេសខ្លួនកំពុងឆ្លង Covid-19 នោះថា ធ្វើឡើងមិនសមហេតុផលឡើយ។ ករណីនេះ លោកថារដ្ឋាភិបាលវៀតណាម គួរតែទទួលយកពលរដ្ឋរបស់ខ្លួន ដោយយកទៅធ្វើចត្តាឡីស័កបាន ខណៈកម្ពុជាក៏បានទទួលពលរដ្ឋខ្មែរពីប្រទេសថៃ និងអាមេរិកកន្លងមកផងដែរ។
មួយវិញទៀត ប្រសិនបើពួកគេមានសញ្ជាតិវិញ លោកថាលុះត្រាតែមានឡាយព្រះហស្តលេខាពីព្រះមហាក្សត្រជាមុនសិន ប៉ុន្តែបើមិនមានព្រះមហាក្សត្រឡាយព្រះហស្តលេខានោះ មានន័យថាការចូលសញ្ជាតិរបស់ពួកគេធ្វើឡើងមិនប្រក្រតីឡើយ។
លោក ស៊ឹង សែនករុណា ជំរុញឲ្យរដ្ឋាភិបាលអនុវត្តទៅតាមច្បាប់អន្តោប្រវេសន៍ទៅលើជនជាតិវៀតណាមទាំងនោះ បើសិនជាពួកគេចូលមកដោយខុសច្បាប់ ដូចជាប្រទេសថៃ វៀតណាម និងប្រទេសផ្សេងទៀតដែលបានអនុវត្ត។
ប្រធានមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស ហៅកាត់ថា សង់ត្រាល់ លោក មឿន តុលា សង្កេតឃើញថា វិធានការរបស់រដ្ឋាភិបាលហាក់ដូចជាកំពុងយកជនជាតិវៀតណាម ដែលរស់នៅក្នុងទឹកមកលើគោក ដោយផ្តល់ឲ្យនូវទីជម្រកត្រឹមត្រូវ ខណៈពួកគេរស់នៅក្នុងទឹកមិនមានស្ថិរភាពនោះ។
លោកជំរុញឲ្យរដ្ឋាភិបាលកម្ពុជា ត្រួតពិនិត្យមើលលើជនអន្តោប្រវេសន៍ទាំងអស់ បើសិនជាពួកគេរស់នៅជាជនអន្តោប្រវេសន៍ស្របច្បាប់ ត្រូវផ្ដល់ជម្រកស្នាក់នៅ និងទទួលបានសេវាធានារ៉ាប់រងពីរដ្ឋ ប៉ុន្តែពួកគេត្រូវបង់ពន្ធចូលរដ្ឋចំពោះតម្លៃសេវាទាំងនោះ។
បន្ថែមពីលើនេះ លោកថារដ្ឋាភិបាលត្រូវពង្រឹងការអនុវត្តច្បាប់អន្តោប្រវេសន៍លើជនបរទេសដែលមកកម្ពុជា ដែលមិនមានឯកសារត្រឹមត្រូវនោះ ត្រូវចាប់បញ្ជូនទៅប្រទេសកំណើតវិញ ខណៈមន្ត្រីដែលអនុញ្ញាតឱ្យជនបរទេសចូលដោយមិនមានឯកសារ ត្រូវដាក់ទោសទៅតាមផ្លូវច្បាប់ជាធរមាន។
បញ្ហាជនអន្តោប្រវេសន៍វៀតណាមខុសច្បាប់រស់នៅ និងប្រកបអាជីវកម្មនានានៅកម្ពុជា គឺជាប្រធានបទធំសម្រាប់ជាតិខ្មែរទាំងមូល ដែលធ្វើឲ្យពលរដ្ឋ និងអ្នកនយោបាយបក្សប្រឆាំងខ្វល់ខ្វាយយ៉ាងខ្លាំងដោយសារតែជនជាតិវៀតណាមទាំងនោះចូលមកខុសច្បាប់ ហើយម្យ៉ាងទៀតមកប្រកបមុខរបរនានាប្រជែងនឹងពលរដ្ឋខ្មែរ។
ក្រុមអ្នករិះគន់បាននាំគ្នាបន្ទោសរដ្ឋាភិបាលខ្មែរថាចាញ់ប្រៀបវៀតណាម ឬអាចហៅម្យ៉ាងទៀតថា ជាអាយ៉ងរបស់វៀតណាម ដែលគេអាចធ្វើអ្វីៗគ្រប់បែបយ៉ាងមកលើកម្ពុជា។
អតីតតំណាងរាស្ត្រគណបក្សសង្គ្រោះជាតិ លោក អ៊ុំ សំអាន បានសរសេរលើទំព័រ Facebook របស់លោកកាលពីដើមសប្តាហ៍កន្លងទៅនេះថា ទូក បែត្រី និងផ្ទះបណ្តែតទឹករបស់វៀតណាម ភាគច្រើនរើពីភ្នំពេញមកនៅត្រឹមព្រែកព្នៅ ហើយការរើចុះរើឡើងរបស់វៀតណាមនេះ នៅតែនៅលើទន្លេខ្មែរដដែល ខណៈប្រធានសមាគមវៀតណាម បញ្ជាក់ថាជនជាតិខ្លួនមួយចំនួននៅកម្ពុជា បានឡើងគោករួចទៅហើយនោះ។
ជាងនេះទៀត លោកថាលោក ហ៊ុន សែន នឹងមិនហ៊ានអនុវត្តច្បាប់អន្តោប្រវេសន៍ដោយបណ្តេញជនជាតិវៀតណាមឱ្យត្រឡប់ទៅស្រុកកំណើតរបស់ខ្លួនវិញនោះទេ ក្រៅពីមិនបញ្ជូនទៅវិញហើយ លោកបារម្ភថាលោក ហ៊ុន សែន អាចផ្ដល់ដីដល់ជនជាតិវៀតណាមទាំងនោះស្នាក់នៅដូចនៅខេត្តកំពង់ឆ្នាំង ទៀតផង។
លោក អ៊ុំ សំអាន ចាត់ទុកសកម្មភាពរបស់អាជ្ញាធរវៀតណាម ថាមានចេតនាចង់លេបត្របាក់កម្ពុជា ទើបបានឱ្យប្រជាជនរបស់ខ្លួនបន្តនៅក្រាញននៀលនៅកម្ពុជា ដោយមិនអនុញ្ញាតឱ្យចូលប្រទេសវិញ ទាំងដែលពួកគេបានធ្វើដំណើរឆ្លងកាត់ខេត្តកណ្តាល និងខេត្តព្រៃវែង ទៅដល់ព្រំដែនជាមួយវៀតណាម ហើយនោះ។
កាលពីឆ្នាំ២០១៨ រដ្ឋាភិបាលកម្ពុជា បានផ្ដល់ដី ៤០ហិកតារនៅខេត្តកំពង់ឆ្នាំង ក្រោយពីបានផ្លាស់ទីអ្នកដែលរស់នៅលើផ្ទះបណ្ដែតទឹកក្នុងទន្លេនៃខេត្តនេះឱ្យមករស់នៅលើគោកវិញ ហើយអ្នកដែលត្រូវផ្លាស់ទីមកលើគោកនោះ ក៏មានជនជាតិវៀតណាម ដែរ។
ក្នុងកិច្ចប្រជុំបូកសរុបលទ្ធផលការងារប្រចាំឆមាសទី១ និងលើកទិសដៅការងារនៅឆមាសទី២ ឆ្នាំ២០២០ កាលពីថ្ងៃទី១៧ ខែកក្កដា ឆ្នាំ២០២០ អគ្គនាយកអគ្គនាយកដ្ឋានអន្តោប្រវេសន៍នៃក្រសួងមហាផ្ទៃ លោក គៀត ច័ន្ទថារិទ្ធ បានលើកឡើងថា ក្នុងរយៈពេល ៦ខែឆ្នាំ២០២០ មានជនបរទេសប្រមាណជា ១៦ម៉ឺននាក់ បានចុះបញ្ជីតាមប្រព័ន្ធព័ត៌មានវិទ្យាដើម្បីសុំស្នាក់នៅក្នុងប្រទេសកម្ពុជា។
បើតាមសេចក្តីបំភ្លឺរបស់ក្រសួងមហាផ្ទៃ ឱ្យដឹងថា កាលពីខែមិថុនា ឆ្នាំ២០១៩ ក្រសួងបានដកហូតឯកសារមិនប្រក្រតីពីជនបរទេសរស់នៅកម្ពុជា ជិត ៧ម៉ឺននាក់ (៦៩៩៥៧នាក់) ក្នុងនោះស្ទើរតែទាំងអស់ជាជនជាតិវៀតណាម ខណៈជិត ៩ម៉ឺននាក់ (៨៩៧៨៦នាក់) កំពុងរស់នៅកម្ពុជាដោយមានប័ណ្ណស្នាក់នៅជាអចិន្ត្រៃយ៍ក្នុងនាមជាជនអន្តោប្រវេសន៍ ដែលក្នុងនោះស្ទើរតែទាំងអស់ជាជនជាតិវៀតណាម។
អ្នកវិភាគនយោបាយ សង្គម និងជាអនុប្រធានក្រុមប្រឹក្សាភិបាលនៃចលនានិស្សិតដើម្បីលទ្ធិប្រជាធិបតេយ្យ លោក គឹម សុខ លើកឡើងថា សម្ដីរបស់អ្នកនាំពាក្យក្រសួងការបរទេសវៀតណាម និងប្រធានសមាគមវៀតណាម ដែលទាមទារឱ្យរដ្ឋាភិបាលកម្ពុជា ផ្ដល់ភាពស្របច្បាប់ដល់ពលរដ្ឋខ្លួននោះ វាឆ្លុះបញ្ចាំឱ្យឃើញថា វៀតណាមកំពុងព្យាយាមបង្ហាញឥទ្ធិពលទៅលើលោក ហ៊ុន សែន។
លោកបន្តថា សំណើរបស់ភាគីវៀតណាម គឺមិនខុសនោះទេ ប៉ុន្តែចំណុចដែលខុសធំនោះនៅត្រង់វៀតណាម ហាក់ដូចជាបង្ខំឱ្យលោក ហ៊ុន សែន ធ្វើតាមសំណើរបស់ខ្លួន ដោយមិនបញ្ជាក់អំពីចេតនាសហការរបស់ជនជាតិវៀតណាមជាមួយរដ្ឋាភិបាលលោក ហ៊ុន សែន នៅកម្ពុជានោះឡើយ។
លោក គឹម សុខ ចាត់ទុកសំណើរបស់វៀតណាម ថាខ្វះហេតុផលផ្លូវច្បាប់ និងមិនគោរពពលរដ្ឋខ្មែរដែលជាម្ចាស់ផ្ទះ ទោះបីដឹងថាជនជាតិវៀតណាមទាំងនោះចូលមកកម្ពុជា ដោយការលួចចូលខុសច្បាប់ក៏ដោយ។
មួយវិញទៀត លោកថាដើម្បីចៀសវាងអំពើហិង្សា លោក ហ៊ុន សែន គួរប្រមូលជនជាតិវៀតណាមទាំងនោះដាក់មួយកន្លែង ហើយផ្ដល់ស្បៀងអាហារដល់ពួកគេមួយរយៈសិន រួចពិនិត្យ និងអនុវត្តទៅតាមច្បាប់អន្តោប្រវេសន៍ដោយបញ្ជូនពួកគេទៅប្រទេសវៀតណាមវិញ។
អ្នកវិភាគរូបនេះបន្តថា ពុំមានប្រទេសណាមួយដែលឱបក្រសោបជនអន្តោប្រវេសន៍ខុសច្បាប់ និងឱ្យពួកគេមានសិទ្ធិតវ៉ាគ្រប់យ៉ាងនោះទេ ប៉ុន្តែបើសិនជនអន្តោប្រវេសន៍ខុសច្បាប់ធ្វើការតវ៉ានោះ លោកថាគឺបើមិនជាប់គុក ក៏ត្រូវដាក់ក្នុងកន្លែងរឹតត្បិតសេរីភាព មុននឹងមានដំណោះស្រាយតាមផ្លូវច្បាប់។
អ្នកវិភាគនយោបាយ សង្គម និងជាអនុប្រធានក្រុមប្រឹក្សាភិបាលនៃចលនានិស្សិតដើម្បីលទ្ធិប្រជាធិបតេយ្យ លោក គឹម សុខ ជំរុញឱ្យលោក ហ៊ុន សែន ចាត់វិធានការជនអន្តោប្រវេសន៍ខុសច្បាប់នាពេលនេះទៅតាមច្បាប់អន្តោប្រវេសន៍កម្ពុជា ដើម្បីបញ្ជាក់ថាលោកនៅមានសតិជាខ្មែរដែរ ដោយកុំធ្វើបន្លំភ្នែកពលរដ្ឋខ្មែរដើម្បីឱ្យភ្លេចព្រឹត្តិការណ៍ជាតិធំៗផ្សេងទៀត។
ប៉ុន្តែបើលោក ហ៊ុន សែន នៅតែធ្វើតាមសំណើរបស់ភាគីវៀតណាម ដោយមិនព្រមបញ្ជូនទៅប្រទេសកំណើត ហើយបន្តផ្ដល់ភាពស្របច្បាប់ដល់ជនជាតិវៀតណាមទៀតនោះ លោកថាលោក ហ៊ុន សែន នឹងអស់ឱកាសរើខ្លួនពីបក្សកុម្មុយនិស្តយួន ហើយជាប់ឈ្មោះជាមេដឹកនាំបន្តក្បត់ប្រយោជន៍ជាតិខ្មែរ ដោយគិតប្រយោជន៍ជនជាតិវៀតណាមខុសច្បាប់ជាធំទៀតផង៕