ក្រោយពីអង្គការសហប្រជាជាតិថ្កោលទោស សហភាពអឺរ៉ុបសម្រេចបន្ថែមទណ្ឌកម្មលើរបបសឹកប្រទេសភូមានេះថែមទៀត។ សហគមន៍អឺរ៉ុប ដែលមាន ២៧ប្រទេសនេះ បានដាក់ទណ្ឌកម្មលើរដ្ឋមន្ត្រី និងឧត្តមសេនីយ៍យោធាភូមា ចំនួន ៨រូបថែមទៀត រួមទាំងក្រុមហ៊ុនចំនួន៤ ដែលមានទំនាក់ទំនងរកស៊ីជាមួយរបបសឹកមួយនេះ។
មិនខុសពីលើកមុនៗនោះទេ គឺទណ្ឌកម្មនេះធ្វើឡើងក្រោមហេតុផលដើម្បីឆ្លើយតបនឹងការបង្ក្រាបលើក្រុមបាតុករ និងការធ្វើរដ្ឋប្រហារកាលពីថ្ងៃទី១ កុម្ភៈ។
នៅក្នុងសេចក្ដីថ្លែងការណ៍របស់ខ្លួន សហភាពអឺរ៉ុបបានសម្រេចបង្កកទ្រព្យសម្បត្តិ និងហាមឃាត់ការផ្តល់ទិដ្ឋាការចូលទៅក្នុងទឹកដីអឺរ៉ុប។ ទណ្ឌកម្មលើកនេះដាក់ទៅលើរដ្ឋមន្ត្រីមហាផ្ទៃ រដ្ឋមន្ត្រីសន្តិសុខ រដ្ឋមន្ត្រីហិរញ្ញវត្ថុ រដ្ឋមន្ត្រីធនធានធម្មជាតិ រដ្ឋមន្ត្រីដឹកជញ្ជូន និងឧត្តមសេនីយ៍ជាន់ខ្ពស់ ៣រូបផ្សេងទៀតនៃរបបសឹក។
ចំពោះក្រុមហ៊ុនចំនួន៤ ដែលពាក់ព័ន្ធជាមួយរបបយោធា ក្នុងនោះមានដូចជាក្រុមហ៊ុនត្បូង និងសហគ្រាសឈើ ក៏ត្រូវបានដាក់ទណ្ឌកម្មដែរ។ មកទល់ពេលនេះ សហភាពអឺរ៉ុប បានដាក់ទណ្ឌកម្មលើបុគ្គល និងក្រុមហ៊ុនចំនួន៣៥។
ទណ្ឌកម្មចុងក្រោយរបស់សហភាពអឺរ៉ុប បានដាក់ចេញក្នុងថ្ងៃដែលប្រទេសអង់គ្លេស បានដាក់លើក្រុមហ៊ុន និងមន្ត្រីក្នុងរបបសឹកនេះមួយចំនួនទៀតផងដែរ។ ក្រុមអ្នកឃ្លាំមើលសិទ្ធិមនុស្ស បានគាំទ្រចំណាត់ការថ្មីនេះ តែបានជំរុញឱ្យដាក់ទណ្ឌកម្មបន្ថែមទៀតក្នុងការរឹតបន្តឹងប្រាក់ចំណូលរបស់ពួកយោធា។
ការដាក់ទណ្ឌកម្មរបស់សហភាពអឺរ៉ុប និងអង់គ្លេស បន្ទាប់ពីមហាសន្និបាតអង្គការសហប្រជាជាតិកាលពីថ្ងៃទី១៨ ខែមិថុនា បានអនុម័តថ្កោលទោសរដ្ឋប្រហាររបស់ពួកយោធា។ មហាសន្និបាតក៏បោះឆ្នោតគាំទ្ររដ្ឋាភិបាលជាប់ឆ្នោតរបស់គណបក្សសម្ព័ន្ធជាតិប្រជាធិបតេយ្យ ដឹកនាំដោយអ្នកស្រី អ៊ុងសាន ស៊ូជី។
មហាសន្និបាត ក៏បានអំពាវនាវដល់បណ្ដាប្រទេសដែលធ្លាប់ផ្គត់ផ្គង់អាវុធទៅឱ្យប្រទេសភូមា ឱ្យបញ្ឈប់ការលក់អាវុធឱ្យប្រទេសនេះ។ មហាសន្និបាតមិនបានសំដៅទៅលើប្រទេសណានោះទេ ប៉ុន្តែចំពោះប្រទេសរុស្ស៊ី ចិន និងឥណ្ឌា គឺជាប្រភពធំជាងគេលក់អាវុធទៅប្រទេសភូមា ជាពិសេសប្រទេសរុស្ស៊ី។
ទណ្ឌកម្មរបស់សហភាពអឺរ៉ុប និងអង់គ្លេស ក៏បានធ្វើឡើងស្របពេលមេរដ្ឋប្រហារឧត្តមសេនីយ៍ មីន អ៊ុងឡាំង ទៅចូលរួមកិច្ចប្រជុំសន្តិសុខអន្តរជាតិមួយនៅក្នុងប្រទេសរុស្ស៊ី។ ក្នុងអំឡុងនោះ មេដឹកនាំយោធាភូមា និងលេខាធិការក្រុមប្រឹក្សាសន្តិសុខរុស្ស៊ី បានប្ដេជ្ញារឹតចំណងទំនាក់ទំនងទ្វេភាគីថែមទៀត។
ចាប់តាំងពីមានរដ្ឋប្រហារមក របបសឹកភូមា បានរងទណ្ឌកម្មជាច្រើនពីអាមេរិក សហភាពអឺរ៉ុប អង់គ្លេស កាណាដា កូរ៉េខាងត្បូង ជប៉ុន អូស្ត្រាលី និងប្រទេសផ្សេងទៀត។ ដោយសារតែរដ្ឋប្រហារ ប្រទេសភូមា បានធ្លាក់ក្នុងសង្គ្រាមស៊ីវិលទៅហើយ ដោយកម្លាំងជាតិនិយម និងក្រុមសម្ព័ន្ធជនជាតិដើមភាគតិចជាង ១០ក្រុម បានងើបឡើងធ្វើសង្គ្រាមប្រឆាំងនឹងរបបសឹកនេះ ខណៈនៅបណ្ដាទីប្រជុំជនធំៗបានផ្ទុះហិង្សាជារៀងរាល់ថ្ងៃ។
បើតាមសមាគមជំនួយដើម្បីអ្នកទោសនយោបាយភូមា មនុស្សជាង ៨៧០នាក់បានស្លាប់ និងជិត ៥០០០នាក់ត្រូវបានពួកយោធាចាប់ខ្លួន៕