បទល្មើសចូលទន្ទ្រានកាន់កាប់តំបន់ការពារព្រៃកោងកាង និងព្រៃលិចទឹកនៅស្រុកព្រៃនប់ ខេត្តព្រះសីហនុ ធ្វើជាកម្មសិទ្ធិខុសច្បាប់ បានកើតឡើងយ៉ាងអនាធិបតេយ្យ ប៉ុន្តែមិនមានអាជ្ញាធរចុះបង្ក្រាបទេ ដោយទុកឲ្យជនល្មើសធ្វើសកម្មភាពកាប់រានស្រេចតែអំពើចិត្ត។
ពលរដ្ឋរស់នៅស្រុកព្រៃនប់ បានឲ្យដឹងថា បទល្មើសទន្ទ្រានដីព្រៃកោងកាង និងព្រៃលិចទឹកនៅចំណុចភូមិជម្ពូខ្មៅ ឃុំទួលទទឹង រាល់ថ្ងៃនេះ គឺមិនឃើញមានអាជ្ញាធរមានវិធានការបង្ក្រាបឲ្យមានប្រសិទ្ធភាពទេ។ សកម្មភាពទន្ទ្រានដីព្រៃលិចទឹករបស់ជនទុច្ចរិតទាំងនោះ គឺបានធ្វើឲ្យប៉ះពាល់ដល់ការប្រកបរបរធ្វើនេសាទសមុទ្ររបស់ពលរដ្ឋ ដែលអាស្រ័យផលពីព្រៃកោងកាង និងព្រៃលិចទឹកទាំងនោះយ៉ាងធ្ងន់ធ្ងរ។
ប្រធានសហគមន៍នេសាទជម្ពូខ្មៅ លោក ទេព កុសល បានបង្ហាញការព្រួយបារម្ភថា បទល្មើសកាប់រានដីព្រៃលិចទឹកខាងលើនេះ រូបលោក និងប្រជានេសាទសមុទ្ររស់នៅឃុំទួលទទឹង ធ្លាប់បានស្នើសុំកិច្ចអន្តរាគមន៍ពីអាជ្ញាធរស្ថាប័នពាក់ព័ន្ធឲ្យជួយទប់ស្កាត់ជាបន្តបន្ទាប់ដែរ ប៉ុន្តែបទល្មើសទាំងនេះនៅតែបន្តកើតមានដដែល។
ទាក់ទិនបញ្ហានេះ ក្រុមអ្នកឃ្លាំមើលផែនការអភិវឌ្ឍន៍សង្គមប្រចាំខេត្តព្រះសីហនុ បានអះអាងថា ព្រៃកោងកាងសហគមន៍នេសាទជម្ពូខ្មៅ ឃុំទួលទទឹង ស្រុកព្រៃនប់ ពិតជារងការកាប់បំផ្លាញជាបន្តបន្ទាប់ពីជនទុច្ចរិត។ ចំណែកឯសកម្មភាពចុះបង្ក្រាប ឬទប់ស្កាត់របស់មន្ត្រីជំនាញរដ្ឋបាលជលផលនៃមន្ទីរកសិកម្ម រុក្ខាប្រមាញ់ និងនេសាទខេត្តព្រះសីហនុ មិនមានប្រសិទ្ធភាពឡើយ។
ប្រជានេសាទសមុទ្រ បានស្នើដល់អាជ្ញាធរស្ថាប័នពាក់ព័ន្ធ មានវិធានការទប់ស្កាត់សកម្មភាពរបស់ជនទុច្ចរិតមួយចំនួនដែលជួលកម្មករកាប់ព្រៃកោងកាង និងព្រៃលិចទឹក ដើម្បីរានដីធ្វើកម្មសិទ្ធិខុសច្បាប់ឲ្យបានទាន់ពេល និងនាំខ្លួនជនល្មើសមកផ្ដន្ទាទោសឲ្យបានធ្ងន់ធ្ងរ។
សារព័ត៌មាន The Cambodia Daily នៅមិនទាន់អាចមានប្រភពទាក់ទងលោក ឯម ភា នាយរងខណ្ឌរដ្ឋបាលជលផល ទទួលបន្ទុកក្ដាប់រួមខណ្ឌរដ្ឋបាលជលផលកំពង់សោម និងលោក គួច ចំរើន អភិបាលខេត្តព្រះសីហនុ ដើម្បីបំភ្លឺជុំវិញបទល្មើសបំផ្លាញព្រៃកោងកាង និងព្រៃលិចទឹក នៅស្រុកព្រៃនប់ បានទេនៅថ្ងៃទី៣០ ខែមិថុនា ឆ្នាំ២០២១។ ចំណែកឯលោក សរ កក្កដា អភិបាលស្រុកព្រៃនប់ ក៏មិនអាចទាក់ទងបានដែរ។
មេភូមិជម្ពូខ្មៅ លោក ផុង រិទ្ធិ បានឲ្យដឹងថា សកម្មភាពកាប់បំផ្លាញព្រៃកោងកាង និងព្រៃលិចទឹកខុសច្បាប់នៅមូលដ្ឋាននេះ ភាគច្រើនជាមនុស្សមកពីខេត្តផ្សេងៗចូលមកស៊ីឈ្នួលកាប់រានព្រៃកោងកាង ឬព្រៃលិចទឹកទាំងនោះ ឲ្យជនទុច្ចរិតដែលជាអ្នកមានលុយ និងមានអំណាច។ ករណីនេះ រូបលោកជាអាជ្ញាធរថ្នាក់ភូមិ គឺមិនមានសមត្ថភាពចុះហាមឃាត់បទល្មើសទាំងនេះទេ។
តាមច្បាប់ជលផលស្ដីពីការថែរក្សាអភិរក្សព្រៃកោងកាង និងព្រៃលិចទឹក មាត្រា៩៨ ចែងថា បុគ្គល ដែលកាប់ទន្ទ្រានព្រៃកោងកាង និងព្រៃលិចទឹក នឹងត្រូវផ្ដន្ទាទោសជាប់ពន្ធនាគារចាប់ពី ៣ឆ្នាំទៅ ៥ឆ្នាំ និងពិន័យជាប្រាក់ទៅតាមស្ថានភាពនៃបទល្មើស។ ជាមួយគ្នានេះ ចំពោះមន្ត្រីអាជ្ញាធរដែនដីក៏មានការទទួលខុសត្រូវ និងមានទោសទណ្ឌដូចគ្នាដែរ ចំពោះបទល្មើសបំផ្លាញព្រៃលិចទឹក និងព្រៃកោងកាង នៅក្នុងមូលដ្ឋានរបស់ខ្លួន។
មាត្រា១០២ សរសេរថា ចំពោះសកម្មភាពទាំងឡាយណាដែលធ្វើឡើងដោយមន្ត្រីអាជ្ញាធរដែនដី មន្ត្រីនគរបាល មន្ត្រីកងយោធពលខេមរភូមិន្ទ ឬមន្ត្រីអាជ្ញាធរផ្សេងៗទៀត ដើម្បីធ្វើអន្តរាគមន៍ផ្ដល់ការអនុញ្ញាតដោយផ្ទាល់ ឬដោយប្រយោលជួយដល់អាជីវកម្មជលផល និងជួយធ្វើសកម្មភាពគ្រប់បែបយ៉ាងផ្ទុយពីបញ្ញត្តិច្បាប់នេះ ឬធ្វើការគំរាមកំហែងដល់មន្ត្រីរដ្ឋបាលជលផល ឬរាំងស្ទះដល់ការបំពេញភារកិច្ចរបស់មន្ត្រីរដ្ឋបាលជលផល និងកិច្ចប្រតិបត្តិការរបស់មន្ត្រីរដ្ឋបាលជលផល ត្រូវចាត់ទុកជាបទល្មើស ដែលត្រូវផ្ដន្ទាទោសដាក់ពន្ធនាគារពី ១ឆ្នាំទៅ ៣ឆ្នាំ ឬពិន័យជាប្រាក់ពី ៥លានទៅ ៥០លានរៀល៕