ក្រសួងធនធានទឹក និងឧតុនិយម បានអំពាវនាវដល់សាធារណជនឲ្យប្រុងប្រយ័ត្នចំពោះបាតុភូតភ្លៀង រន្ទះ និងខ្យល់កន្ត្រាក់បោកបក់ខ្លាំង ចាប់ពីថ្ងៃទី០៧ ដល់ថ្ងៃទី១៣ ខែកក្កដា ឆ្នាំ២០២១ ដែលកើតមានឡើងនៅតំបន់មួយចំនួនក្នុងប្រទេសកម្ពុជា។
ក្រសួងធនធានទឹក ជូនដំណឹងនៅថ្ងៃទី០៦ ខែកក្កដា ឆ្នាំ២០២១ ថា ប្រព័ន្ធសម្ពាធទាប ITCZ បានកើតឡើងពីភាគខាងជើងប្រទេសថៃ ដោយឥទ្ធិពលសម្ពាធទាបសកម្មមួយនៅលើសមុទ្រចិនខាងត្បូង ហើយឥទ្ធិពលនៃប្រព័ន្ធសម្ពាធទាបនេះ នឹងរំកិលចុះឆ្លងកាត់លើតំបន់ជួរភ្នំដងរែក និងភាគឦសានប្រទេសកម្ពុជា ចាប់ពីថ្ងៃទី០៧ ដល់ថ្ងៃទី១៣ ខែកក្កដា។
ក្រសួងឧតុនិយម បានបញ្ជាក់ទៀតថា ខ្យល់មូសុងនិរតី ក៏នឹងបោកបក់ក្នុងល្បឿនបង្គួរ ហើយចំពោះសម្ពាធទាបសកម្មនៅលើសមុទ្រចិនខាងត្បូងវិញ ក៏នឹងអាចវិវឌ្ឍទៅជាវិសម្ពាធទាបរយៈពេលខ្លី មុននឹងថមថយឥទ្ធិពលពេលដើរចូលដល់ប៉ែកខាងក្រោមនៃភាគខាងជើងប្រទេសវៀតណាម នៅថ្ងៃទី០៨ ខែកក្កដា។
ស្ថានភាពបែបនេះ នឹងធ្វើឲ្យបណ្តាខេត្តនៅតំបន់វាលទំនាបកណ្តាល អាចមានភ្លៀងធ្លាក់ក្នុងកម្រិតពីបង្គួរទៅច្រើន ហើយលាយឡំផ្គរ រន្ទះ និងខ្យល់កន្ត្រាក់បោកបក់ខ្លាំង។
ទន្ទឹងគ្នានេះ ក៏អាចមានផ្នែកមួយចំនួននៃបណ្តាខេត្តនៅក្នុងភូមិសាស្ត្រជាប់ជួរភ្នំក្រវាញ និងជួរភ្នំដងរែក នឹងមានភ្លៀងធ្លាក់ខ្លាំង។ ចំណែកបណ្តាខេត្តជាប់ជួរភ្នំដងរែក និងខ្ពង់រាបឦសាន នឹងអាចមានភ្លៀងធ្លាក់ក្នុងកម្រិតពីបង្គួរទៅខ្លាំង។
រីឯតំបន់មាត់សមុទ្រវិញ នឹងអាចមានភ្លៀងធ្លាក់ពីបង្គួរទៅខ្លាំង ហើយនៅលើផ្ទៃសមុទ្រ នឹងអាចមានភ្លៀង ខ្យល់បោកបក់ខ្លាំង និងរលកសមុទ្រខ្ពស់ៗ។
ករណីខ្យល់កន្ត្រាក់នេះដែរ របាយការណ៍របស់ក្រសួងធនធានទឹក បានឲ្យដឹងថា យ៉ាងហោចមានមនុស្សពីរនាក់បានរងរបួស និងផ្ទះជិត ១០០ខ្នង ត្រូវបានបំផ្លាញដោយសារភ្លៀងធ្លាក់មួយមេធំលាយឡំខ្យល់កន្ត្រាក់បោកបក់ខ្លាំង នៅឃុំសានគរ ស្រុកកំពង់ស្វាយ ខេត្តកំពង់ធំ កាលពីថ្ងៃទី៥ ខែកក្កដា ឆ្នាំ២០២១៕