ពលរដ្ឋរស់នៅស្រុកឆ្លូង ខេត្តក្រចេះ ចោទលោកស្រី យ៉ន សុឃិន សមាជិកក្រុមប្រឹក្សាឃុំព្រែកសាម៉ាន់ ថាបានរំលោភយកបរិវេណដីសម្រាប់បម្រុងទុកបញ្ចុះសព ដែលជាកេរដំណែលរួមតាំងពីទសវត្សរ៍ឆ្នាំ១៩៦៥ ដើម្បីធ្វើជាកម្មសិទ្ធិបុគ្គលដោយខុសច្បាប់។
ប្រជាពលរដ្ឋបានឲ្យដឹងថា ទីតាំងដីបញ្ចុះសពដែលលោកស្រី យ៉ន សុឃិន បានឈូសឆាយយកដាំដំណាំធ្វើជាកម្មសិទ្ធិឯកជននេះអស់ ២ហិកតារ ក្នុងទំហំដីសរុបជិត ៤ហិកតារ។ ប្រជាពលរដ្ឋថាពួកគាត់រស់នៅមូលដ្ឋាននេះបានប្រើប្រាស់ដើម្បីបញ្ចុះសពតាំងពីឆ្នាំ១៩៦៥ បន្តរហូតមក។
លោក ហេង សុថា អភិបាលស្រុកឆ្លូង បានឲ្យកាសែតក្នុងស្រុកដឹងថា ទីតាំងមានទំនាស់ដែលប្រជាពលរដ្ឋថាជាទីបញ្ចុះសពនោះ គឺមិនមែនជាទីតាំងសម្រាប់បញ្ចុះសពទេ ព្រោះតំបន់នោះជាប្រភេទដីជម្រាល និងជាវាលទំនាបលិចទឹក។ លោកបន្តថា ទីតាំងដីទំនាស់នេះវាគ្រាន់តែជាការសន្មតតៗរបស់ប្រជាសហគមន៍តែប៉ុណ្ណោះ។
យ៉ាងនេះក្តី លោកអភិបាលស្រុកឆ្លូង រូបនេះ ក៏បានទទួលស្គាល់ដែរថា ទីតាំងទំនាស់នេះមានប្រជាពលរដ្ឋយកសពទៅបញ្ចុះជាង ៧០ផ្នូរផងដែរ។
ករណីនេះបានធ្វើឲ្យប្រជាពលរដ្ឋចោទលោក ហេង សុថា អភិបាលស្រុកឆ្លូង ថាមានជាប់ពាក់ព័ន្ធនឹងសកម្មភាពចូលទៅទន្ទ្រានកាន់កាប់ដីបញ្ចុះសព ដើម្បីរំលោភធ្វើកម្មសិទ្ធិដែរ ព្រោះអភិបាលរូបនេះតែងការពារផលប្រយោជន៍ជូនលោកស្រី យ៉ន សុឃិន ជាបន្តបន្ទាប់មកនេះ។ ជាងនេះទៀត សព្វថ្ងៃនេះថ្នាក់ដឹកនាំចាប់ពីរដ្ឋបាលឃុំបន្តរហូតដល់ថ្នាក់ស្រុក ក៏កំពុងត្រូវរ៉ូវគ្នាលួចធ្វើប្លង់កម្មសិទ្ធិទីតាំងបរិវេណដីសម្រាប់ទុកបញ្ចុះសពនៅស្រុកឆ្លូង ដើម្បីចែកគ្នាថែមទៀតផង។
ដោយឡែកពលរដ្ឋរស់នៅរាជធានីភ្នំពេញ ដែលមានផ្នូរជីដូនជីតា និងឪពុករបស់គាត់ដែលបានបញ្ចុះនៅតំបន់ទំនាស់ខាងលើនេះ ក៏បានអះអាងថា ទីបញ្ចុះសពនេះ គឺពិតជាមានតាំងពីឆ្នាំ១៩៦៥ មកម្ល៉េះ។ លោកថ្លែងហួសចិត្តចំពោះអាជ្ញាធរមូលដ្ឋានចាប់ពីថ្នាក់ឃុំ-ស្រុក ដែលបានឃុបឃិតគ្នារំលោភយកដីសម្រាប់ប្រជាពលរដ្ឋបម្រុងទុកបញ្ចុះសព ដែលមានតាំងពីដូនតារៀងមកនោះ ធ្វើជាសម្បត្តិឯកជនទាំងបំពានបែបនេះ៕