ចលនានិស្សិតដើម្បីលទ្ធិប្រជាធិបតេយ្យ SMD អះអាងថា ករណីឃាតកម្មលើបណ្ឌិត កែម ឡី កាលពី ៥ឆ្នាំមុនមិនទាន់ត្រូវបានវែកមុខរកឃាតកពិត និងអ្នកពាក់ព័ន្ធយកទៅផ្ដន្ទាទោសតាមផ្លូវច្បាប់នៅឡើយទេ ខណៈលោក អឿត អាង ឬហៅ ជួប សម្លាប់ គ្រាន់តែជាឃាតកសិប្បនិម្មិត និងជាជនរងគ្រោះដែលទុកសម្រាប់ប្រើប្រាស់ក្នុងអំពើឃាតកម្មនោះតែប៉ុណ្ណោះ។
ការលើកឡើងរបស់ចលនានិស្សិតដើម្បីលទ្ធិប្រជាធិបតេយ្យ គឺដើម្បីរំឭកខួប ៥ឆ្នាំនៃព្រឹត្តិការណ៍បាញ់សម្លាប់បណ្ឌិត កែម ឡី នៅកណ្ដាលទីក្រុងភ្នំពេញ និងរិះគន់ការដឹកនាំរបស់ប្រមុខរដ្ឋាភិបាលលោក ហ៊ុន សែន ដែលខកខានក្នុងការតាមវែកមុខឃាតកពិតដែលបានសម្លាប់បណ្ឌិត កែម ឡី ដោយបន្សល់ទុកនូវភាពអយុត្តិធម៌ដល់សាច់ញាតិ និងក្រុមគ្រួសាររបស់លោករហូតដល់សព្វថ្ងៃនេះ។
ចលនានិស្សិតដើម្បីលទ្ធិប្រជាធិបតេយ្យ SMD បានចេញសេចក្តីថ្លែងការណ៍នៅថ្ងៃទី៩ ខែកក្កដា ឆ្នាំ២០២១ ថា ខ្លួននៅតែបន្តទាមទារឲ្យតុលាការកម្ពុជា បង្ហាញរបាយការណ៍ស៊ើបអង្កេតឱ្យបានច្បាស់លាស់ និងជាសាធារណៈទៅតាមអង្គហេតុនៃឃាតកម្មបណ្ឌិត កែម ឡី ដើម្បីជម្រះមន្ទិលសង្ស័យពីមជ្ឈដ្ឋាននានា ទាំងជាតិ និងអន្តរជាតិ ដែលចោទប្រកាន់អំពីការពាក់ព័ន្ធរបស់មន្ត្រីជាន់ខ្ពស់ក្នុងជួររដ្ឋាភិបាលកម្ពុជា។
ប្រភពដដែលអះអាងថា ដើម្បីស្ដារមុខមាត់ប្រព័ន្ធយុត្តិធម៌ និងកិត្តិយសរបស់រដ្ឋាភិបាលកម្ពុជា តុលាការត្រូវតែមានសេចក្តីក្លាហានបង្ហាញអង្គចងចាំនៃប្រព័ន្ធកាមេរ៉ាសុវត្ថិភាពនៅស្តារម៉ាត (Star Mart) ជិតស្តុបបូកគោ ឬ (ស្តុប កែម ឡី) រាជធានីភ្នំពេញ រយៈពេល ២៤ម៉ោង ក្នុងថ្ងៃទី១០ ខែកក្កដា ឆ្នាំ២០១៦ ដែលជាថ្ងៃនៃព្រឹត្តិការណ៍នៃឃាតកម្មលើបណ្ឌិត កែម ឡី នោះតែម្តង។
SMD បានទាមទារយ៉ាងទទូចឲ្យតុលាការកម្ពុជា បើកការស៊ើបអង្កេតឡើងវិញលើសំណុំរឿងឃាតកម្មធំៗដែលរកមុខឃាតកពិតមិនទាន់ឃើញនាពេលកន្លងមកផងដែរ ក្នុងនោះរួមមាន៖
- ឃាតកម្មលើប្រធានអង្គការការពារធនធានធម្មជាតិ លោក ឈុត វុទ្ធី ឆ្នាំ២០១២
- ការសម្លាប់ប្រធានសហជីពសេរីកម្មករនៃព្រះរាជាណាចក្រកម្ពុជា លោក ជា វិជ្ជា ឆ្នាំ២០២៤
- ការបាញ់ប្រហារទៅលើតារាភាពយន្តអ្នកស្រី ពិសិដ្ឋ ពីលិកា ឆ្នាំ១៩៩៩
- អតីតរដ្ឋលេខាធិការនៃក្រសួងមហាផ្ទៃពីខាងគណបក្សហ៊្វុនស៊ិនប៉ិច លោក ហូ សុខ ឆ្នាំ១៩៩៧
- និងមនុស្សជាច្រើនទៀត។
ក្រុមចលនានិស្សិតដើម្បីលទ្ធិប្រជាធិបតេយ្យបញ្ជាក់ថា ដើម្បីឆ្លុះបញ្ចាំងអំពីការអះអាងរបស់រដ្ឋាភិបាលដែលថា កម្ពុជាមានសន្តិភាពនោះ មានតែការផ្តល់យុត្តិធម៌ជូនជនរងគ្រោះប៉ុណ្ណោះ ទើបធ្វើឱ្យពលរដ្ឋខ្មែរជឿជាក់លើការដឹកនាំរបស់ខ្លួន។ ជាងនេះទៀត រដ្ឋាភិបាលកម្ពុជាក៏គួរផ្តល់យុត្តិធម៌ដល់អ្នកទោសមនសិការទាំងអស់ និងដោះលែងពួកគេឲ្យមានសេរីភាពឡើងវិញផងដែរ។
អ្នកវិភាគនយោបាយ និងសង្គម បណ្ឌិត កែម ឡី ត្រូវខ្មាន់កាំភ្លើងបាញ់សម្លាប់នៅហាងស្តារម៉ាតកាល់តិច (Star Mart Caltex) ស្តុបបូកគោកណ្តាលទីក្រុងភ្នំពេញ ក្នុងវ័យ ៥០ឆ្នាំ ដោយបន្សល់នូវភរិយាអាយុ ៣៤ឆ្នាំ គឺអ្នកស្រី ប៊ូ រចនា ដែលមានផ្ទៃពោះ ៥ខែ និងកូនប្រុស ៤នាក់កាលពីថ្ងៃទី១០ ខែកក្កដា ឆ្នាំ២០១៦ កន្លងទៅ។
ជុំវិញបញ្ហានេះ ភរិយាបណ្ឌិត កែម ឡី អ្នកស្រី ប៊ូ រចនា បានលើកឡើងនៅក្នុងកម្មវិធី Idea Talk នៃសារព័ត៌មាន The Cambodia Daily កាលពីថ្ងៃទី៦ ខែកក្កដា ឆ្នាំ២០២១ ថា ចំពោះការបិទសវនាការលើឃាតកម្មប្តីរបស់អ្នកស្រី គឺអ្នកស្រីមិនដែលទទួលស្គាល់នោះទេ ព្រោះថាការបិទបញ្ចប់សវនាការនេះ មិនបង្ហាញពីការស៊ើបអង្កេត និងភស្តុតាងដែលគួរឲ្យទុកចិត្តបានអ្វីទាំងអស់ ក្រៅតែពីការបង្ហាញឃាតកសិប្បនិមិត្តឲ្យទទួលទោសជំនួសប៉ុណ្ណោះនោះ។
ចំណែកអតីតតំណាងរាស្ត្រប្រទេសអូស្ត្រាលីដើមកំណើតខ្មែរប្រចាំរដ្ឋវ៉ិកតូរីយ៉ា លោក ហុង លីម បានអះអាងថា ប្រទេសកម្ពុជាគឺជាប្រទេសមួយក្នុងចំណោមប្រទេស ១១ ផ្សេងទៀតដែលអង្គការសហប្រជាជាតិបានដាក់អ្នករាយការណ៍ពិសេសរបស់គេដើម្បីតាមដានការរំលោភសិទ្ធិមនុស្ស។ លើសពីនេះ ពួកគេក៏បានដាក់ភ្នាក់ងារអង្គការសហប្រជាជាតិប្រឆាំងនឹងឃាតកម្មក្រៅប្រព័ន្ធច្បាប់ផងដែរ ដើម្បីតាមដានឧក្រិដ្ឋកម្មធំៗ និងការសម្លាប់ក្រៅប្រព័ន្ធច្បាប់នៅកម្ពុជា ដូចជាករណីបណ្ឌិត កែម ឡី ជាដើម។
ដោយឡែកប្រធានគណៈកម្មាធិការនាយកគណបក្សប្រជាធិបតេយ្យមូលដ្ឋាន បណ្ឌិត យ៉ង សាំងកុមារ បានប្រាប់សារព័ត៌មាន The Cambodia Daily នៅថ្ងៃទី៩ កក្កដា ថា ក្នុងឱកាសខួប ៥ឆ្នាំនៃមរណភាពបណ្ឌិត កែម ឡី នៅថ្ងៃទី១០ ខែកក្កដា នេះ មន្ត្រីជាន់ខ្ពស់ និងសមាជិកគណបក្ស GDP នឹងធ្វើពិធីចែកទានដល់ចាស់ជរាចំនួន ១០ឃុំ និងធ្វើពិធីបង្សុកូលជូនវិញ្ញាណក្ខន្ធលោកបណ្ឌិត កែម ឡី ផងដែរ។
លោកអះអាងថា សមាជិកគណបក្សប្រជាធិបតេយ្យមូលដ្ឋានទាំងអស់នៅតែគោរពដឹងគុណ និងចាត់ទុកបណ្ឌិត កែម ឡី ជាវីរបុរសដែលតំណាងឲ្យសេរីភាពក្នុងការបញ្ចេញមតិ ហើយគណបក្សនេះនឹងអនុវត្តតាមគោលគំនិតដែលបណ្ឌិត កែម ឡី បានផ្ដួចផ្ដើមជានិច្ច ដូចជាការលើកស្ទួយសេរីភាពបញ្ចេញមតិ មិនប្រកាន់និន្នាការនយោបាយ និងចៀសវាងនូវការជេរប្រមាថ លាបពណ៌ ដែលធ្វើឲ្យបែកបាក់សាមគ្គីជាតិជាដើម។
មុនថ្ងៃខួប ៥ឆ្នាំនៃមរណភាពបណ្ឌិត កែម ឡី គឺនៅថ្ងៃទី៩ ខែកក្កដា ឆ្នាំ២០២១ អ្នកប្រើប្រាស់បណ្ដាញសង្គមហ្វេសប៊ុក បាននាំគ្នាបញ្ចេញមតិយោបល់ទាក់ទិននឹងឃាតកម្មលើបណ្ឌិត កែម ឡី ព្រោងព្រាត ក្នុងនោះស្ថាបនិកអង្គការមាតាធម្មជាតិ លោក អាឡិច ហ្កន់សាឡេដេវិតសុន ថាលោកគឺ កែម ឡី ជានិច្ច។ ចំណែកអ្នកវិភាគនយោបាយ និងសង្គម លោក គឹម សុខ ថាលោកគោរពលោកបណ្ឌិត កែម ឡី ពីព្រោះលោកជាអ្នកហ៊ានវិភាគ និងមិនចាំតែធ្វើសេចក្ដីសន្និដ្ឋានសរសើរអ្នកនយោបាយ។
បន្ថែមពីនេះ លោក ទូច វិបុល ប្រធានចលនានិស្សិតដើម្បីលទ្ធិប្រជាធិបតេយ្យ ថា កែម ទ្បី ទៅឆ្ងាយមិនត្រឡប់ក្រោយ តែនៅជិតបង្កើយជាមួយកូនខ្មែរ ក្រៅពីនេះ ក៏មានអ្នកចូលរួមសម្ដែងមតិយោបល់រាប់ពាន់នាក់ថែមទៀតផងដែរ៕