អនុប្រធានគណបក្សសង្គ្រោះជាតិភាគីលោក សមរ ង្ស៊ី បង្ហាញជំហរគាំទ្រ និងសម្តែងមោទកភាពចំពោះគណបក្សបេះដូងជាតិ ជាសាធារណៈ។
ការអះអាងរបស់អ្នកស្រី មូរ សុខហួរ ធ្វើឡើងក្នុងកម្មវិធីទទួលទានអាហារសាមគ្គីកូនខ្មែរក្នុងទីក្រុង Atlanta នៃរដ្ឋ Georgia សហរដ្ឋអាមេរិក កាលពីថ្ងៃទី០៥ ខែកក្កដា ឆ្នាំ២០២១។
អ្នកស្រីបានថ្លែងទៅកាន់អ្នកគាំទ្ររបស់ខ្លួននៅពេលនោះថា បើបង្កើតគណបក្សហើយមិនធ្វើសកម្មភាព មិនចាំបាច់បង្កើតមកទេ ព្រោះថាបើបើកបក្សហើយមិនហ៊ានតតាំងជាមួយបក្សកាន់អំណាច គឺដើរចូលក្នុងល្បែងលោក ហ៊ុន សែន ប៉ុណ្ណោះ។
ទោះជាយ៉ាងណាក៏ដោយ មន្ត្រីជាន់ខ្ពស់បក្សប្រឆាំង លោក មាជ សុវណ្ណារ៉ា បានប្រាប់សារព័ត៌មាន The Cambodia daily នៅថ្ងៃទី៩ ខែកក្កដា ឆ្នាំ២០២១ ថា មន្ត្រីជាន់ខ្ពស់បក្សសង្គ្រោះជាតិភាគីលោក សម រង្ស៊ី ដូចជាលោក អេង ឆៃអ៊ាង អ្នកស្រី មូរ សុខហួរ និងមនុស្សមួយចំនួនទៀត បានផ្ដួចផ្ដើម និងជួយជ្រោមជ្រែងការបង្កើតគណបក្សបេះដូងជាតិ នេះយ៉ាងពេញទំហឹង។
មន្ត្រីបក្សប្រឆាំងរូបនេះអះអាងថា ចំពោះការបែកបាក់របស់គណបក្សសង្គ្រោះជាតិ គឺមានតែខាត ព្រោះថាកម្លាំងនៃការចូលរួមរបស់ពលរដ្ឋដែលបានផ្តុំគ្នាជាងកន្លះនគរនាពេលកន្លងមក ត្រូវបានមេដឹកនាំនយោបាយរបស់ខ្លួនហែកច្រៀកកម្លាំងប្រឆាំងទាំងនោះរៀងៗខ្លួន ទោះបីជាមន្ត្រីទាំងនោះអួតថាការបើកបក្សថ្មីនោះដើម្បីជ្រោងដួងព្រលឹងសង្គ្រោះជាតិក៏ដោយ។
លោកចោទសួរថា ហេតុអ្វីពួកគេមិនឆ្ងល់ថា បើនោះជាការជួយជ្រោមជ្រែងដួងព្រលឹងសង្គ្រោះជាតិ ហេតុអ្វីលោក ហ៊ុន សែន ជួយជ្រោមជ្រែងសុំសិទ្ធិធ្វើនយោបាយពីព្រះមហាក្សត្រឲ្យពួកគេខ្លាំងម្ល៉េះ? លោកថា បើបានសិទ្ធិធ្វើនយោបាយហើយ ហេតុអ្វីមិនចូលរួមគ្នាបើកគណបក្សតែមួយដើម្បីប្រកួតប្រជែង ចុះចាំបាច់បង្កើតបក្សខុសគ្នាធ្វើអ្វី? តាមពិត នោះគ្រាន់តែជាការចូលរួមលេងល្បែងបក្សកាន់អំណាចតែប៉ុណ្ណោះ។
លោក មាជ សុវណ្ណារ៉ា បញ្ជាក់ថា ម្ចាស់ឆ្នោតប្រាកដជាដឹងច្បាស់ថា នរណាគឺមនុស្សដែលក្បត់ដួងព្រលឹងសង្គ្រោះជាតិ ព្រោះថាអំឡុងពេលដែលមេបក្សរបស់ខ្លួនកំពុងជាប់បម្រាមនយោបាយ ហើយក៏កំពុងតែធ្វើការតស៊ូនយោបាយតាមរយៈការទូតយ៉ាងស្វិតស្វាញ បែរជាមន្ត្រីជាន់ខ្ពស់ភាគីលោក សម រង្ស៊ី នាំគ្នាទៅលួចបង្កើតបក្សថ្មីចោលដៃគូរបស់ខ្លួនទៅវិញ។
លោកសង្កត់ធ្ងន់ថា សកម្មភាពពួកគេក៏អាចបញ្ជាក់បានយ៉ាងច្បាស់ផងដែរថា ការលើកស្ទួយដួងព្រលឹងសង្គ្រោះជាតិ គឺត្រូវធ្លាក់ទៅលើលោក កឹម សុខា ទាំងស្រុង ខណៈពួកគេព្យាយាមបំបែកដួងព្រលឹងនេះតាមវិធីសាស្ត្រពួកគេរៀងៗខ្លួនទៅហើយនោះ។
ទាក់ទងនឹងការបង្កើតគណបក្សថ្មីៗនេះ លោកនាយករដ្ឋមន្ត្រី ហ៊ុន សែន កាលពីចុងខែឧសភា ឆ្នាំ២០២១ បានអះអាងថា កម្ពុជាកំពុងតែអនុវត្តលទ្ធិប្រជាធិបតេយ្យសេរីពហុបក្សបានយ៉ាងល្អ ទោះបីគ្មានអតីតបក្សសង្គ្រោះជាតិក៏ដោយ ព្រោះថាមន្ត្រីបក្សប្រឆាំងដែលបានសុំសិទ្ធិធ្វើនយោបាយឡើងវិញ បាននាំគ្នាទៅបង្កើតបក្សថ្មីៗព្រោងព្រាត ដើម្បីចូលរួមប្រកួតប្រជែងក្នុងការបោះឆ្នោតជ្រើសរើសក្រុមប្រឹក្សាឃុំ-សង្កាត់ក្នុងឆ្នាំ២០២២ ខាងមុខនេះ។
យ៉ាងណាក៏ដោយ អតីតអគ្គលេខាធិការគណបក្សសង្គ្រោះជាតិក្រៅប្រទេស CNRP-O លោក ប៉ុន សៅរី ធ្លាប់បានអះអាងថា ក្នុងនាមលោកជាអ្នកគាំទ្រគណបក្សសង្គ្រោះជាតិមួយរូបដែលបានចូលរួមការពារ និងពង្រីកការគាំទ្រទាំងក្នុងសហគមន៍ខ្មែរ និងសហគមន៍អន្តរជាតិ នឹងមិនបណ្តោយឲ្យអតីតថ្នាក់ដឹកនាំទាំងនេះរួមដៃជាមួយនឹងលោក ហ៊ុន សែន បំផ្លាញគណបក្សសង្គ្រោះជាតិ និងបំផ្លាញនូវសេចក្តីសង្ឃឹមប្រជាធិបតេយ្យនៅកម្ពុជាបានឡើយ។
ក្រុមអ្នកសង្កេតការណ៍អះអាងថា សកម្មជនជាន់ខ្ពស់នៅមូលដ្ឋានភាគីលោក សម រង្ស៊ី ដូចជាអតីតមេឃុំអូរចារ កញ្ញា ស៊ីន ចាន់ពៅរ៉ូស្សិត និងសកម្មជនផ្សេងទៀតដែលតែងរិះគន់មន្ត្រីបក្សប្រឆាំងភាគីលោក កឹម សុខា ដែលបានចេញទៅបង្កើតបក្សថ្មីថា អ្នកទាំងនោះបានក្បត់ឆន្ទៈពលរដ្ឋ ខណៈលោក សៀម ភ្លុក អតីតមន្ត្រីនយោបាយគណបក្ស សម រង្ស៊ី ចេញទៅបង្កើតគណបក្សបេះដូងជាតិ ពួកគេមិនដែលរិះគន់អ្វីទាល់តែសោះ ប៉ុន្តែតែងការពារ និងលើកទឹកចិត្តទៅវិញ។
រហូតមកទល់ពេលនេះ គណបក្សដែលបង្កើតឡើងដោយមន្ត្រីជាន់ខ្ពស់គណបក្សសង្គ្រោះជាតិ មានចំនួន ៥គណបក្សហើយ ក្នុងនោះរួមមាន៖
- គណបក្សខ្មែរស្រឡាញ់ជាតិ
- គណបក្សខ្មែរអភិរក្ស
- គណបក្សឆន្ទៈខ្មែរ
- គណបក្សកែទម្រង់កម្ពុជា
- គណបក្សបេះដូងជាតិ។
យ៉ាងណាក៏ដោយ អតីតប្រធានគណបក្សសង្គ្រោះជាតិ លោក សម រង្ស៊ី ធ្លាប់បានអះអាងកាលពីចុងឆ្នាំ២០២០ ថា មន្ត្រីបក្សប្រឆាំងដែលបានសុំសិទ្ធិធ្វើនយោបាយឡើងវិញទាំងនោះ បើមិនចាញ់បោក ក៏លក់ខ្លួនឲ្យលោក ហ៊ុន សែន ដែរ ដូច្នេះដើម្បីយកឈ្នះគណបក្សកាន់អំណាច ត្រូវតែនាំគ្នារង់ចាំគណបក្សសង្គ្រោះជាតិ រស់ឡើងវិញទាំងអស់គ្នា។
ទោះជាយ៉ាងណាក៏ដោយ ក្រុមសង្កេតការណ៍អះអាងថា ពួកគេមិនទាន់ទៅណាទេ ហើយនៅបន្តរង់ចាំមើលតទៅទៀត ថាតើភាពប្ដេជ្ញាចិត្តរបស់លោក សម រង្ស៊ី និងភាពស្មោះត្រង់របស់លោកក្នុងការតស៊ូដើម្បីសេរីភាព និងប្រជាធិបតេយ្យពិតប្រាកដនោះ អាចនៅស្ថិតស្ថេរត្រឹមកម្រិតណា៕