សកម្មជននយោបាយគណបក្សសង្គ្រោះជាតិ នៅប្រទេសកូរ៉េខាងត្បូង លើកឡើងថា ស្ថានភាពនយោបាយអតីតមេដឹកនាំបក្សប្រឆាំង លោក សម រង្ស៊ី នៅពេលនេះ គឺដូចជាទូកកំពុងតែកល់លើថ្ម ទៅមុខមិនរួច ថយក្រោយមិនបានដូច្នោះដែរ។
យុវជនគណបក្សសង្គ្រោះជាតិ ប្រចាំប្រទេសកូរ៉េខាងត្បូង លោក មាស ពិសាល បានសរសេរលើគណនី Facebook របស់លោកនៅថ្ងៃទី២៧ ខែកក្កដា ឆ្នាំ២០២១ ថា កាលពីមុន អន្តរជាតិតែងគាំទ្រនយោបាយរបស់អតីតប្រធានគណបក្សសង្គ្រោះជាតិ លោក សម រង្ស៊ី ខ្លាំងណាស់ ប៉ុន្តែក្រោយពីមេដឹកនាំបក្សប្រឆាំងរូបនេះចេះតែប្រមាថព្រះមហាក្សត្រខ្មែរឥតឈប់ឈរ ដូច្នេះអន្តរជាតិមួយចំនួនបានដកខ្លួនលែងគាំទ្រសកម្មភាពនយោបាយរបស់លោកជាបន្តបន្ទាប់។
លោកអះអាងថា បន្ទាប់ពីអន្តរជាតិលែងគាំទ្រ លោក សម រង្ស៊ី បានព្យាយាមបង្កើតព្រឹត្តិការណ៍នយោបាយផ្សេងៗតាមរយៈនៃការបង្កើតក្រុមផ្សព្វផ្សាយដើម្បីបំផុសបំផុលព្រឹត្តិការណ៍របស់លោក និងការចេញផ្សាយផ្ទាល់ដោយខ្លួនឯង ក្នុងបំណងដើម្បីស្ដារប្រជាប្រិយភាពរបស់ខ្លួនឡើងវិញ បើទោះបីជាគាត់ដឹងថាការធ្វើបែបនេះ នាំឲ្យមានការធ្វើទុក្ខបុកម្នេញដល់សកម្មជនរបស់ខ្លួនពីសំណាក់រដ្ឋាភិបាលលោក ហ៊ុន សែន ក៏ដោយ។
លោកចោទសួរថា តើនរណាអាចជួយទូកកល់លើថ្មរបស់អតីតមេដឹកនាំបក្សប្រឆាំងរូបនេះបាន?
សកម្មជននយោបាយគណបក្សសង្គ្រោះជាតិរូបនេះបញ្ជាក់ថា កន្លងមកនយោបាយទាល់ច្រករបស់លោក សម រង្ស៊ី តែងមានបុរសជិះសេះខ្មៅលាបថ្នាំពណ៌សមកជួយជានិច្ច តែត្រូវមានកិច្ចសន្យាជួយស្រែកថា សេះដែលពួកគេជិះនេះ គឺជាសេះស តែរាល់ពេលដែលម្ចាស់សេះលែងត្រូវការហើយនោះ គេតែងដេញលោក សម រង្ស៊ី ឲ្យចុះពីសេះនោះតែម្តង។
លោកសង្កត់ធ្ងន់ថា ការទាល់ច្រកនយោបាយម្តងនេះ តើម្ចាស់សេះខ្មៅលាបថ្នាំពណ៌ស នឹងមកជួយលោក សម រង្ស៊ី ទៀតទេ? ប្រសិនបើគេមកជួយទៀតនោះ វាសនាលោក សម រង្ស៊ី បានត្រឹមតែចូលរួមលេងល្បែងនយោបាយកំដរឆាករបស់គេប៉ុណ្ណោះ។
ការលើកឡើងរបស់អតីតយុវជនគណបក្សសង្គ្រោះជាតិ នៅកូរ៉េខាងត្បូងនេះ រិះគន់ចំៗទៅអតីតមេបក្សប្រឆាំង គឺលោក សម រង្ស៊ី ដែលកំពុងរកផ្លូវបន្តជីវិតនយោបាយរបស់ខ្លួនឡើងវិញ ស្របពេលដែលមន្ត្រីការទូតប្រទេសលោកសេរីហាក់មិនបានបង្ហាញការចាប់អារម្មណ៍លើសកម្មភាពនយោបាយរបស់លោកទៀតទេនៅពេលនេះ។
ក្នុងរយៈពេលចុងក្រោយនេះ ត្រូវគេមើលឃើញថា អតីតមេដឹកនាំបក្សប្រឆាំង លោក សម រង្ស៊ី ហាក់អស់ឥទ្ធិពលនយោបាយការទូតរបស់ខ្លួនក្នុងការស្វះស្វែងការអន្តរាគមន៍ពីអន្តរជាតិដើម្បីឲ្យលោកអាចវិលត្រឡប់ទៅកម្ពុជាវិញ ដើម្បីបន្តជីវិតនយោបាយរបស់លោកបន្តទៀត ខណៈផែនការនយោបាយដែលលោកធ្វើកន្លងមក បានរងការរិះគន់ និងត្រូវរងការបង្ក្រាបពីរដ្ឋាភិបាលលោក ហ៊ុន សែន ជាបន្តបន្ទាប់។
កាលពីឆ្នាំ២០១៩ អតីតមេបក្សប្រឆាំង លោក សម រង្ស៊ី ធ្លាប់បានប្រកាសឲ្យប្រជាពលរដ្ឋ មន្ត្រីរាជការ ជាពិសេសសកម្មជនបក្សប្រឆាំងឲ្យនាំគ្នាចូលរួមយុទ្ធនាការមាតុភូមិនិវត្តន៍របស់លោក កាលពីថ្ងៃទី៩ ខែវិច្ឆិកា ឆ្នាំ២០១៩ ដើម្បីផ្ដួលរំលំរដ្ឋាភិបាលលោក ហ៊ុន សែន ប៉ុន្តែផែនការមាតុភូមិនិវត្តន៍នេះត្រូវបរាជ័យទាំងស្រុង។
ជុំវិញផែនការផ្ដួលរំលំនេះ អ្នករាយការណ៍ពិសេសរបស់អង្គការសហប្រជាជាតិ អ្នកស្រី Rhona Smith ធ្លាប់បានថ្កោលទោសលោក សម រង្ស៊ី ក្នុងការផ្ដួលរំលំរដ្ឋាភិបាលលោក ហ៊ុន សែន នៅក្នុងកិច្ចប្រជុំអង្គការសហប្រជាជាតិ ក្នុងទីក្រុងហ្សឺណែវ កាលពីថ្ងៃទី២៥ ខែកញ្ញា ឆ្នាំ២០១៩ ផងដែរ។ អ្នកស្រី Rhona Smith ថាផែនការនេះគឺជាការរំលោភបទដ្ឋានអន្តរជាតិស្ដីពីដំណោះស្រាយដោយសន្តិវិធី និងអហិង្សាយ៉ាងធ្ងន់ធ្ងរ។
យ៉ាងណាក៏ដោយ កាលពីថ្ងៃទី១៩ ខែកក្កដា ឆ្នាំ២០២១ អតីតប្រធានគណបក្សសង្គ្រោះជាតិ លោក សម រង្ស៊ី បានអំពាវនាវឲ្យប្រជាពលរដ្ឋ និងកងកម្លាំងប្រដាប់អាវុធត្រៀមខ្លួនម្តងទៀតដើម្បីចូលរួមបង្កើតរដ្ឋាភិបាលបង្រួបបង្រួមជាតិនៅកម្ពុជាជាមួយលោក ប៉ុន្តែក្រោយការអំពាវនាវនេះបាន ៣ថ្ងៃ អតីតមេឃុំគណបក្សសង្គ្រោះជាតិត្រូវអាជ្ញាធរកម្ពុជាចាប់ខ្លួនភ្លាមៗ។
ក្រុមអ្នកឃ្លាំមើលសង្គម លើកឡើងថា សកម្មភាពនយោបាយរបស់អតីតមេដឹកនាំបក្សប្រឆាំង លោក សម រង្ស៊ី សព្វថ្ងៃនេះហាក់ពុំទទួលបានការគាំទ្រពីអន្តរជាតិនោះទេ ជាក់ស្តែងមន្ត្រីការទូតដែលចង់ឲ្យមានការផ្សះផ្សាដើម្បីបញ្ចប់វិបត្តិជាប់គាំងនយោបាយនៅកម្ពុជា តែងនាំគ្នាបង្ហាញពីការចាប់អារម្មណ៍លើការតស៊ូនយោបាយតាមបែបអហិង្សារបស់ប្រធានគណបក្សសង្គ្រោះជាតិ លោក កឹម សុខា ជំនួសវិញ។
ចាប់តាំងពីដើមខែឧសភា ឆ្នាំ២០២០ ប្រធានបក្សប្រឆាំងដែលមិនទាន់មានសេរីភាពពេញលេញ លោក កឹម សុខា បានជួបបណ្តាអង្គទូតតំណាងប្រទេសលោកសេរីប្រមាណជា ៣០លើកហើយ ក្នុងនោះរួមមានសហរដ្ឋអាមេរិក សហគមន៍អឺរ៉ុប និងប្រទេសអង់គ្លេស ជាដើម ខណៈអង្គទូតទាំងនោះមិនបានបង្ហាញការចាប់អារម្មណ៍លើសកម្មភាពនយោបាយអតីតមេដឹកនាំប្រឆាំង លោក សម រង្ស៊ី ទាល់តែសោះ៕