សាធារណរដ្ឋសហព័ន្ធអាល្លឺម៉ង់ បានចាប់ផ្ដើមបញ្ជូននាវាចម្បាំងរបស់ខ្លួនទៅកាន់សមុទ្រចិនខាងត្បូង នៅថ្ងៃទី៣ កក្កដា ខណៈនាវាចម្បាំងរបស់អង់គ្លេស និងអាមេរិក រង់ចាំនៅទីនោះដើម្បីធ្វើសមយុទ្ធរួមគ្នា។
ក្នុងអំឡុងប៉ុន្មានខែចុងក្រោយនេះ សមុទ្រចិនខាងត្បូងបានក្លាយទៅជាទីលានកម្ដៅសាច់ដុំនៃកងកម្លាំងទ័ពជើងទឹកមហាអំណាចធំៗនៅលើពិភពលោក។ សហរដ្ឋអាមេរិកបានសម្រេចបញ្ជូននាវាផ្ទុកយន្តហោះ និងនាវាចម្បាំងជាច្រើនគ្រឿងទៅកាន់ទីនោះ គឺរយៈពេលពីរឆ្នាំមកហើយ។
ស្របពេលជាមួយគ្នានេះ ចិនដែលកំពុងពង្រីកឥទ្ធិពលរបស់ខ្លួនជាមួយនឹងការពង្រាយនាវាផ្ទុកយន្តហោះ និងនាវាចម្បាំងរបស់ខ្លួនរាប់សិបគ្រឿងនៅទីនោះ ខណៈមហាអំណាចអង់គ្លេសបានបញ្ជូននាវាផ្ទុកយន្តហោះ HMS អមដោយនាវាពិឃាតចំនួន ១៨គ្រឿង គឺកំពុងស្ថិតនៅទីនោះជាស្រេចហើយដែរ ក្នុងការធ្វើសមយុទ្ធជាមួយនឹងក្រុមនាវាទី៧ របស់សហរដ្ឋអាមេរិក។
ក្នុងស្ថានភាពដែលកំពុងតានតឹងស្រាប់ហើយនេះ ស្រាប់តែប្រទេសដែលមានថាមពលខ្លាំងនៅអឺរ៉ុបមួយទៀត គឺអាល្លឺម៉ង់ បានបញ្ជូននាវាពិឃាតដ៏ទំនើបរបស់ខ្លួនទៅកាន់សមុទ្រចិនខាងត្បូងនៅថ្ងៃនេះ ដែលមើលទៅគឺជាការរៀបចំកម្លាំងសម្ពន្ធភាពជាមួយនឹងអាមេរិក និងអង់គ្លេសទប់ទល់នឹងឥទ្ធិពលរបស់ចិន។
សេចក្ដីរាយការណ៍របស់សារព័ត៌មានអាល្លឺម៉ង់ DW បានចុះផ្សាយថា នាវា Bayern គឺជានាវាពិឃាតដំបូងគេរបស់អាល្លឺម៉ង់ បានទៅដល់សមុទ្រចិនខាងត្បូងនៅរយៈពេលប៉ុន្មានថ្ងៃទៀតខាងមុខនេះ។ នាវានេះ បានធ្វើដំណើរចាកចេញពីមូលដ្ឋានទ័ព Wilhelm-shaven កាលពីថ្ងៃទី០២ ខែសីហា។
ក្រសួងការពារជាតិអាល្លឺម៉ង់ បានចេញសេចក្ដីថ្លែងការណ៍ថា អាល្លឺម៉ង់ចង់បង្ហាញពីវត្តមានរបស់ខ្លួននៅតំបន់ឥណ្ឌូប៉ាស៊ីហ្វិក។ អាមេរិក និងប្រទេសដទៃទៀតរួមមាន បារាំង ជប៉ុន អូស្ត្រាលី និងនូវែលហ្សេឡង់ បានបង្កើនសកម្មភាពថ្មីៗនៅដែនទឹកប៉ាស៊ីហ្វិក។ ក្នុងមហាសមុទ្រប៉ាស៊ីហ្វិកនេះ សមុទ្រចិនខាងត្បូងត្រូវបានចិនអះអាងថាដែនទឹកទំហំ ៣លានគីឡូម៉ែត្រការ៉េជារបស់ខ្លួនទាំងស្រុង។
នាវាពិឃាត Bayern របស់អាល្លឺម៉ង់ នឹងបំពេញទស្សនកិច្ចរបស់ខ្លួន ៦ខែនៅជុំវិញពិភពលោក។ នាវានេះនឹងចូលចតនៅកំពង់ផែចំនួន១២ ក្នុងនោះមានទាំង Djibouti, Guam រួមទាំង Shanghai របស់ចិនផងដែរ។
ចិនអះអាងថា យ៉ាងហោចណាស់នាវារបស់អាល្លឺម៉ង់គោរពម្ចាស់តំបន់ ដោយសារតែសំចតនៅកំពង់ផែសៀងហៃ ប្រទេសចិន។ ប៉ុន្តែអ្នកសង្កេតការណ៍មើលឃើញថា ទោះបីជាអាល្លឺម៉ង់ចូលចតនៅសៀងហៃក៏ដោយ ប៉ុន្តែអាល្លឺម៉ង់បញ្ជូននាវាចម្បាំងរបស់ខ្លួនចូលសមុទ្រចិនខាងត្បូង គឺមកដើម្បីប្រាប់ចិនថា លំហសមុទ្រអន្តរជាតិនេះពុំអាចក្លាយទៅជាកម្មសិទ្ធិរបស់ប្រទេសណាមួយផ្ដាច់មុខឡើយ ហើយវត្តមាននាវាអាល្លឺម៉ង់មកសមុទ្រចិនខាងត្បូងជាលើកទីមួយនេះ គឺមកសម្ដែងអំណាចរបស់ខ្លួនចូលពាក់ព័ន្ធជាមួយនឹងអាមេរិក ដែលជាសម្ពន្ធមិត្តនៃអង្គការយោធាដ៏មានថាមពល និងឥទ្ធិពលនៅអឺរ៉ុប គឺអង្គការណាតូ (NATO) ដែលមាន ៣០ប្រទេស មិនទាន់ប្រកាសថាចូលពាក់ព័ន្ធក្នុងជម្លោះសមុទ្រចិនខាងត្បូងនោះទេ ប៉ុន្តែសមាជិកអង្គការនេះដែលមានថាមពលខ្លាំងផ្នែកយោធា គឺអង់គ្លេស បារាំង អាល្លឺម៉ង់ ហូឡង់ កាណាដា ចាប់ផ្ដើមចូលពាក់ព័ន្ធ និងសហការជាមួយអាមេរិកក្នុងការប្រជែងកម្លាំងយោធាជាមួយនឹងមហាយក្សចិន នៅអាស៊ី៕