ជនជាតិដើមភាគតិចមួយគ្រួសារនៅខេត្តមណ្ឌលគិរី បារម្ភខ្លាចបាត់បង់ដីធ្លីធ្វើស្រែចម្ការរបស់ខ្លួន ក្រោយពីអតីតនគរបាលម្នាក់បានគំរាម និងប្ដឹងទៅអាជ្ញាធរខេត្ត ខណៈគ្រួសាររបស់គាត់មិនព្រមលក់ដី និងមិនព្រមទទួលប្រាក់។
ជនជាតិដើមភាគតិចពូនង អ្នកស្រី តែ រ៉ានី បានប្រាប់សារព័ត៌មាន The Cambodia Daily នៅថ្ងៃចន្ទ ទី១៦ សីហា ថា ដីធ្លីទំហំ ១០ហិកតារគឺគ្រួសាររបស់គាត់បានដាំដំឡូង ធ្វើស្រែ និងដាំផ្លែឈើផ្សេងទៀតតាំងពីដូនតាមកម្ល៉េះ។ អ្នកស្រីថា បើគិតជារយៈពេលនោះ អ្នកស្រីថាជិត ៤០ឆ្នាំមកហើយ ប៉ុន្តែនៅពេលថ្មីៗនេះ បែរជាលោក សាន សូត្រ ជានគរបាលមកប្រាប់ថា អ្នកស្រីកាន់កាប់ដីរបស់ខ្លួនទៅវិញ។
លោក សាន សូត្រ ជាអតីតមន្ត្រីនគរបាល និងបច្ចុប្បន្នជាឈ្មួញដីធំជាងគេប្រចាំនៅក្នុងខេត្តមណ្ឌលគិរី។ លោកបានដាក់ពាក្យបណ្ដឹងមួយចុះថ្ងៃទី៨ ខែសីហា ឆ្នាំ២០២១ ទៅអភិបាលខេត្តមណ្ឌលគិរី ដើម្បីសុំកិច្ចអន្តរាគមន៍ ដោយលើកឡើងថា ផ្ទៃដីទំហំ ១០ហិកតារស្ថិតនៅភូមិពូទ្រូ ឃុំសែនមនោរម្យ ស្រុកអូររាំង ខេត្តមណ្ឌលគិរី ដែលអ្នកស្រី តែ រ៉ានី ជាជនជាតិដើមភាគតិចពូនង កំពុងកាន់កាប់ និងអាស្រ័យផលបច្ចុប្បន្នជាដីរបស់ខ្លួនដែលបានទិញពីពលរដ្ឋកាលពីឆ្នាំ២០០៧ ដោយមានលិខិតបញ្ជាក់ពីអាជ្ញាធរ។
លិខិតប្ដឹងនោះ លោកស្នើឱ្យអាជ្ញាធរខេត្តមណ្ឌលគិរី ឱ្យជួយអន្តរាគមន៍ដោះស្រាយ និងសម្របសម្រួលជាមួយគ្រួសាររបស់អ្នកស្រី តែ រ៉ានី ក្រោយពីអ្នកស្រីមិនព្រមទទួលយកប្រាក់របស់ខ្លួន ហើយចាកចេញពីដីបច្ចុប្បន្ន។
សារព័ត៌មាន The Cambodia Daily មិនអាចសុំការបញ្ជាក់ពីអភិបាលខេត្តមណ្ឌលគិរី លោក ស្វាយ សំអ៊ាង បានទេនៅថ្ងៃដដែលនេះ ខណៈលោក សាន សូត្រ មិនទាន់អាចស្វែងរកទាក់ទងបានដែរ។
អ្នកស្រី តែ រ៉ានី ដែលរងបណ្ដឹងរបស់លោក សាន សូត្រ ជានគរបាលនោះ បានឲ្យដឹងថា ដីនេះអ្នកស្រីមិនដែលលក់ដូរឱ្យទៅបុគ្គលណាម្នាក់ឡើយ បើទោះបីជាកន្លងមកមានអ្នកផ្សេងៗបានមករកទិញក៏ដោយ ខណៈអ្នកដែលមានដីនៅជិតៗគាត់មួយចំនួន បានលក់ឱ្យលោក សាន សូត្រ អស់។
ក្រោយពីដីនៅជាប់ៗនោះត្រូវបានលក់អស់ អ្នកស្រីបញ្ជាក់ថា នៅខែកក្កដា ឆ្នាំ២០២១ កន្លងទៅ លោក សាន សូត្រ បានបង្ខំឱ្យអ្នកស្រី និងគ្រួសារលក់ដីធ្លីនោះ និងបានគំរាមកំហែងបើមិនទទួលយកលុយ និងមិនព្រមលក់ទេ ពួកគាត់នឹងមិនបានអ្វីទាំងអស់។
អ្នកស្រី តែ រ៉ានី បន្តថា មូលហេតុដែលគាត់មិនព្រមលក់ដីនេះ ដោយសារជីវភាពគ្រួសាររបស់គាត់ពឹងផ្អែកទៅលើដីចម្ការនោះ ហើយបើគ្មានដីទេ ពួកគាត់ក៏មិនដឹងទៅប្រកបមុខរបរអ្វីដែរ។
ជនជាតិដើមភាគតិចរូបនេះបន្តថា បច្ចុប្បន្នគាត់បារម្ភខ្លាចបាត់បង់ដីចម្ការដែលធ្លាប់អាស្រ័យផលជិត ៤០ឆ្នាំមកនេះ បន្ទាប់ពីលោក សាន សូត្រ បានគំរាម និងប្ដឹងគ្រួសាររបស់គាត់ទៅអាជ្ញាធរខេត្ត ហើយនឹងបន្តប្ដឹងអ្នកស្រីទៅតុលាការទៀតក្រោយពីអ្នកស្រីមិនព្រមលក់ដីធ្លីឱ្យខ្លួន។
អ្នកសម្របសម្រួលផ្នែកសិទ្ធិមនុស្ស ដីធ្លី និងព្រៃឈើនៃបណ្ដាញសហគមន៍ជនជាតិដើមភាគតិចខេត្តមណ្ឌលគិរី លោក គ្រើង តុលា លើកឡើងថា អ្នកស្រី តែ រ៉ានី បានរស់នៅ និងអាស្រ័យផលនៅលើដីទំហំ ១០ហិកតារតាំងពីដូនតាមកម្ល៉េះ ប៉ុន្តែបែរជាលោក សាន សូត្រ ប្ដឹងគាត់ដែលជាម្ចាស់ដីទៅវិញ។
លោកចាត់ទុកការប្ដឹងពលរដ្ឋទៅអាជ្ញាធរ និងតុលាការនេះ ថាជាការគំរាមកំហែងប្រជាពលរដ្ឋក្រោយពីពួកគាត់មិនព្រមធ្វើតាមខ្លួន។
បច្ចុប្បន្ន ជនជាតិដើមភាគតិចកំពុងប្រឈមនឹងការបាត់ដីធ្លី អត្តសញ្ញាណ ដោយសារដីធ្លីដែលពួកគាត់ធ្លាប់អាស្រ័យផលពីដូនតាមក ត្រូវបានក្រុមឈ្មួញ និងអ្នកមានអំណាចរំលោភយកធ្វើជាកម្មសិទ្ធិ ដោយមានការឃុបឃិតគ្នាជាមួយអាជ្ញាធរដើម្បីធ្វើប្លង់៕