គណៈកម្មាធិការជាតិគ្រប់គ្រងគ្រោះមហន្តរាយ បានឲ្យដឹងថា ក្នុងរយៈពេល ៨ខែក្នុងឆ្នាំ២០២១ នេះ គ្រោះមហន្តរាយធម្មជាតិបានបណ្ដាលឲ្យមនុស្សស្លាប់ចំនួន ៩៤នាក់ និងរបួស ១៥៨នាក់។
របាយការណ៍គណៈកម្មាធិការជាតិគ្រប់គ្រងគ្រោះមហន្តរាយ បានឲ្យដឹងថា ចាប់ពីខែមករា ដល់ខែសីហា ឆ្នាំ២០២១ មានករណីគ្រោះធម្មជាតិខ្យល់កន្ត្រាក់ និងរន្ទះបាញ់កើតឡើងចំនួន ២៦៤លើក បណ្តាលឲ្យមនុស្សស្លាប់ ៧២នាក់ និងរងរបួស ១០៩នាក់។
ប្រភពដដែលបានឲ្យដឹងថា ខ្យល់កន្ត្រាក់បានកើតឡើង ១៧៩លើក រលំផ្ទះ ៨៣៧ខ្នង និងរបើកដំបូលជាង ៦៥០០ខ្នង និងស្លាប់មនុស្ស ៥នាក់ និងរបួស ៦៧នាក់ ចំណែកឯគ្រោះធម្មជាតិរន្ទះបាញ់ កើតឡើង ៨៥លើក ស្លាប់មនុស្ស ៦៧នាក់ និងរបួស ៤២នាក់ ងាប់គោក្របី ៤០ក្បាល។
ករណីអគ្គិភ័យវិញ បានកើតឡើង ៣៦៦លើក ដោយភាគច្រើននៅភ្នំពេញ ហើយសម្លាប់មនុស្សសរុប ២២នាក់ និងមានមនុស្សរងរបួសចំនួន ៤៩នាក់ ព្រមទាំងបង្កការខូចខាត និងបាត់បង់ផ្ទះ ៤២៦ខ្នង តូបផ្សារចំនួន២០៣ ឃ្លាំងទំនិញ១៨ សាលារៀន ៣ខ្នង រោងចក្រសិប្បកម្ម ១២កន្លែង អគាររដ្ឋបាល ១៩កន្លែង រួមទាំងចម្ការ និងព្រៃមួយចំនួនផងដែរ។
គ្រោះមហន្តរាយនឹងនៅកើតមានឡើងបន្តទៀត ដោយសារតែការប្រែប្រួលអាកាសធាតុ និងការទទួលរងឥទ្ធិពលប្រែប្រួលអាកាសធាតុជាសកល និងប្រទេសជិតខាងផងដែរ។
ក្រសួងធនធានទឹក និងឧតុនិយម បានប្រកាសឲ្យដឹងដែរថា នៅសប្ដាហ៍នេះ កម្ពុជានឹងទទួលឥទ្ធិពលខ្យល់សមុទ្រ (Sea Breeze) និងជ្រលងសម្ពាធទាបឥណ្ឌា ព្រមទាំងប្រព័ន្ធសម្ពាធទាប (ITCZ) ដែលអូសបន្លាយពីប្រទេសភូមា កាត់ប្រទេសថៃ ឡាវ និងវៀតណាម រួមនឹងចុះបន្តិចមកលើប្រទេសកម្ពុជា។ ស្ថានភាពនេះ នឹងធ្វើឲ្យខេត្តនៅវាលទំនាបកណ្ដាលមានភ្លៀងធ្លាក់លាយឡំនឹងផ្គររន្ទះ ខ្យល់កន្ត្រាក់ ដែលបណ្ដាលឲ្យខេត្តខ្លះមានជំនន់ទឹកភ្លៀងផងដេរ។
ទោះយ៉ាងណា ក្រសួងធនធានទឹក និងឧតុនិយម បានប្រកាសឲ្យពលរដ្ឋបង្កើនការប្រុងប្រយ័ត្នចំពោះបាតុភូតធម្មជាតិនេះ៕