លោកនាយករដ្ឋមន្ត្រី ហ៊ុន សែន អះអាងថា កម្ពុជាជាប្រទេសមួយក្នុងចំណោមបណ្តាប្រទេសក្នុងតំបន់ដែលសម្រេចបាននូវការចាក់វ៉ាក់សាំងប្រឆាំងវីរុស Covid-19 ជូនប្រជាពលរដ្ឋរបស់ខ្លួនក្នុងកម្រិតខ្ពស់គួរឱ្យកត់សម្គាល់។
ប្រមុខរដ្ឋាភិបាលកម្ពុជាលើកឡើងក្នុងពិធីបើកពិព័រណ៍ចិន-អាស៊ាន លើកទី១៨ នៅថ្ងៃទី១០ ខែកញ្ញា ឆ្នាំ២០២១ ថា លោកសូមអរគុណមិត្តដែកថែបចិន ដែលតែងផ្តល់ការគាំទ្រដល់កម្ពុជាតាមរយៈនៃការផ្តល់ជំនួយគ្រប់រូបភាព ទាំងផ្នែកបច្ចេកទេសព្យាបាលជំងឺ Covid-19 សម្ភារបរិក្ខារពេទ្យ និងជាពិសេសគឺការផ្តល់វ៉ាក់សាំងបង្ការជំងឺ Covid-19 ទាំងជំនួយមនុស្សធម៌ និងការអនុញ្ញាតឱ្យកម្ពុជាបញ្ជាទិញផងដែរ។
លោក ហ៊ុន សែន អះអាងថា ក្នុងរយៈពេលជាង ១ឆ្នាំកន្លងមកនេះ រដ្ឋាភិបាលកម្ពុជាបានប្រយុទ្ធប្រឆាំងយ៉ាងសកម្មជាមួយជំងឺ Covid-19 ដោយដៃម្ខាងអនុវត្តយុទ្ធសាស្ត្រសំខាន់ៗ ដូចជាការទប់ស្កាត់ ការព្យាបាល និងការចាក់វ៉ាក់សាំង ចំណែកដៃម្ខាងទៀតអនុវត្តគោលនយោបាយរក្សាលំនឹងជីវភាពប្រជាពលរដ្ឋ និងធុរកិច្ចលើគ្រប់វិស័យ។
លោកនាយករដ្ឋមន្ត្រី ហ៊ុន សែន បញ្ជាក់ថា ដើម្បីពន្លឿនបើកដំណើរការឡើងវិញនូវសកម្មភាពសង្គមសេដ្ឋកិច្ច ដើម្បីទប់ទល់នូវការវាយលុកដោយមេរោគ Covid-19 ប្រភេទថ្មីៗ រដ្ឋាភិបាលកម្ពុជាបានដាក់ចេញនូវផែនការចាក់វ៉ាក់សាំងជូនប្រជាពលរដ្ឋជាបន្តបន្ទាប់ តាមដំណាក់កាលចាប់ពីកុមាររហូតដល់មនុស្សពេញវ័យ អនុវត្តចាក់ពីដូសទី១ រហូតដល់ដូសទី៣ ដែលកំពុងដំណើរការសព្វថ្ងៃនេះ។
ការអះអាងរបស់មេដឹកនាំកម្ពុជាបែបនេះ ធ្វើឡើងស្របពេលដែលកម្ពុជាបានបើកយុទ្ធនាការចាក់វ៉ាក់សាំងជូនដល់ប្រជាពលរដ្ឋខ្មែរទូទាំងប្រទេសបានជិត ១០០ភាគរយ ហើយក្នុងចំណោមប្រជាជនគោលដៅ ១០លាននាក់។
ជុំវិញការចាក់វ៉ាក់សាំងនេះ ក្រសួងសុខាភិបាលកម្ពុជាបានបង្ហាញរបាយការណ៍របស់ខ្លួនកាលពីថ្ងៃទី៩ ខែកញ្ញា ឆ្នាំ២០២១ ថា ក្រសួងបានចាក់វ៉ាក់សាំង Covid-19 ដល់មនុស្សពេញវ័យដូសទី១ បានជាង ១១លាន ៣សែននាក់ រីឯដូសទី២ បានជាង ៩លាន ២សែននាក់ ចំណែកអ្នកចាក់ដូសទី៣ ចំនួន ៧សែន ២ម៉ឺននាក់ ដោយឡែកកុមារចាក់បានជាង ៨ភាគរយផងដែរ។
រហូតមកដល់ពេលនេះ កម្ពុជាបានទទួលវ៉ាក់សាំងបង្ការជំងឺ Covid-19 សរុបជិត ៣០លានដូសហើយ ដើម្បីចាក់ជូនប្រជាពលរដ្ឋ ក្នុងនោះប្រទេសចិន បានផ្តល់ជំនួយជាវ៉ាក់សាំងយ៉ាងច្រើនដល់កម្ពុជា ក្រៅពីនោះ ជំនួយវ៉ាក់សាំងនេះក៏ទទួលបានពីប្រទេសជប៉ុន អង់គ្លេស សហរដ្ឋអាមេរិក និងតាមរយៈជំនួយមជ្ឈមណ្ឌលកូវ៉ាក់ផងដែរ។
កាលពីថ្ងៃទី០៤ ខែកញ្ញា ឆ្នាំ២០២១ កម្ពុជាទទួលបានវ៉ាក់សាំងបង្ការជំងឺ Covid-19 ប្រភេទស៊ីណូវ៉ាក់ (Sinovac) ចំនួន ២លាន ៥សែនដូស ក្នុងនោះវ៉ាក់សាំងចំនួន ២លានដូសជាការបញ្ជាទិញរបស់រាជរដ្ឋាភិបាលកម្ពុជា និង ៥០ម៉ឺនដូសទៀតជាការបរិច្ចាគរបស់ក្រុមហ៊ុន Sinovac ផ្តល់ជាជំនួយមនុស្សធម៌ដល់កម្ពុជា។
ជុំវិញការចាក់វ៉ាក់សាំងដើម្បីទប់ស្កាត់ការឆ្លងវីរុស Covid-19 នេះ ក្រសួងសុខាភិបាល ក៏បានបង្ហាញរបាយការណ៍អំពីអ្នកឆ្លងវីរុស Covid-19 នៅថ្ងៃទី១០ ខែកញ្ញា ឆ្នាំ២០២១ ថា ក្រសួងនៅតែបន្តរកឃើញអ្នកឆ្លងវីរុស Covid-19 ថ្មីចំនួន ៦៦០នាក់ និងអ្នកជាសះស្បើយថ្មីចំនួន ៤១៧នាក់ ខណៈអ្នកស្លាប់ថ្មីមានចំនួន ១២នាក់។
ក្រសួងបញ្ជាក់ថា មកទល់នឹងពេលនេះ អ្នកឆ្លងវីរុស Covid-19 សរុបបានកើនឡើងដល់ជិត ១សែននាក់ហើយ និងអ្នកដែលជាសះស្បើយសរុបមានចំនួនជាង ៩ម៉ឺន ២ពាន់នាក់ ខណៈអ្នកស្លាប់សរុបបានកើនឡើងចំនួន ២ពាន់ ១៩នាក់ផងដែរ ដោយឡែកអ្នកឆ្លងវីរុស Covid-19 បំប្លែងថ្មីប្រភេទ DELTA មានចំនួនជាង ៣៧០០នាក់ហើយគិតត្រឹមថ្ងៃទី៩ ខែកញ្ញា ឆ្នាំ២០២១៕