ក្រុមអ្នកតស៊ូមតិនៅក្រៅស្រុក អះអាងថា ការដែលលោក ហ៊ុន សែន ចូលទៅក្នុងកិច្ចប្រជុំសម្ងាត់ជាមួយលោក ឡុង រី និងសមាជិកបក្សប្រឆាំងដទៃទៀតនៃភាគីលោក សម រង្ស៊ី កាលពីពេលថ្មីៗនេះ គ្រាន់តែចង់អួតអាងថា ទោះជាក្រុមប្រឆាំងធ្វើអ្វី សម្ងាត់ប៉ុនណា ក៏មិនអាចលាក់នឹងលោកបានដែរ។
អ្នកវិភាគនយោបាយ សង្គម និងជាអនុប្រធានក្រុមប្រឹក្សាភិបាលនៃចលនានិស្សិតដើម្បីលទ្ធិប្រជាធិបតេយ្យ លោក គឹម សុខ បានប្រាប់សារព័ត៌មាន The Cambodia Daily នៅថ្ងៃទី១៤ ខែកញ្ញា ឆ្នាំ២០២១ ថា ការជ្រើសរើសលេងល្បែងកំប៉ិកកំប៉ុករបស់លោក ហ៊ុន សែន នេះ គ្រាន់តែជាល្បែងនយោបាយឥតខ្លឹមសារមួយប៉ុណ្ណោះ ហើយរឿងនេះមានតែអតីតមេដឹកនាំប្រឆាំង លោក សម រង្ស៊ី តែប៉ុណ្ណោះដែលយល់ពីរឿងនេះច្បាស់ជាងនរណាៗទាំងអស់។
លោក គឹម សុខ បញ្ជាក់ថា ក្រោយបែកធ្លាយវីដេអូសម្ងាត់នេះ អាចនឹងត្រូវគេគិតថាប្រហែលជានឹងមានជំនួបចរចាដោះស្រាយវិបត្តិនយោបាយរវាងលោក ហ៊ុន សែន និងលោក សម រង្ស៊ី ណាមួយកើតឡើង ប៉ុន្តែទំនោរទៅរកការចរចាមានតួលេខទាបណាស់ ព្រោះលោក ហ៊ុន សែន កំពុងតែកាន់សន្លឹកបៀធំៗនៅក្នុងដៃមិនទាន់ដល់ដំណាក់កាលរកផ្លូវចរចាជាមួយក្រុមប្រឆាំងនៅឡើយទេ។
ក្រុមអ្នកគាំទ្ររដ្ឋាភិបាលក្រុងភ្នំពេញ បានទម្លាយវីដេអូប្រវែងជាង ១៣នាទីអំពីកិច្ចប្រជុំសម្ងាត់ពង្រឹងបណ្ដាញក្នុងស្រុកតាមប្រព័ន្ធអនឡាញ ក្នុងកម្មវិធីឈ្មោះ Zoom របស់ក្រុមប្រឆាំងដឹកនាំដោយមន្ត្រីជាន់ខ្ពស់បក្សប្រឆាំង លោក ឡុង រី អតីតប្រធានអង្គរក្សរបស់លោក សម រង្ស៊ី ត្រូវបានលោក ហ៊ុន សែន ចូលទៅកាត់សង្វាក់ទាំងកណ្តាលទីក្នុងពេលលោក ឡុង រី កំពុងជជែកអំពីការរៀបចំយុទ្ធសាស្ត្រនយោបាយជាមួយក្រុមរបស់លោក។
ក្រោយទទួលបានលេខកូដសម្ងាត់ ឬ link ចូលទៅក្នុងកិច្ចប្រជុំតាមប្រព័ន្ធអនឡាញ Zoom នោះ លោក ហ៊ុន សែន បានហៅចំឈ្មោះលោក ឡុង រី និងប្រាប់ឱ្យមន្ត្រីជាន់ខ្ពស់បក្សប្រឆាំងរូបនេះបញ្ឈប់នូវការជេរប្រមាថ និងការលាបពណ៌លើរូបលោកបន្តទៀត ក្នុងនោះលោក ហ៊ុន សែន ក៏បានរិះគន់លោក សម រង្ស៊ី ផងដែរអំពីការមិនព្យាយាមរកការផ្សះផ្សានយោបាយ បើទោះបីជាលោកធ្លាប់បានលើកលែងទោសឱ្យម្តងជាពីរដងទៅហើយក្តី។
ជុំវិញបញ្ហានេះ មន្ត្រីជាន់ខ្ពស់គណបក្សសង្គ្រោះជាតិ លោក មាជ សុវណ្ណារ៉ា បានសរសេរលើគណនី Facebook របស់លោកនៅថ្ងៃទី១៤ ខែកញ្ញា ឆ្នាំ២០២១ ថា រឿងលោក ហ៊ុន សែន ចូលក្នុងកិច្ចប្រជុំតាមប្រព័ន្ធអនឡាញ ZOOM របស់ក្រុមប្រឆាំង គឺជាយុទ្ធសាស្ត្រនយោបាយព្រួញមួយបាញ់បានសត្វពីរ។ ព្រួញទី១ គឺជាការកាត់ផ្ដាច់ចរន្តទំនាក់ទំនងសកម្មជនក្នុងស្រុកជាមួយមន្ត្រីសង្គ្រោះជាតិនៅក្រៅស្រុកផង ហើយព្រួញទី២ គឺជាការបង្ហាញថា បក្សប្រឆាំងមានរនុកក្នុងដើម្បីកុំឱ្យក្រុមនេះមានការទុកចិត្តគ្នាតទៅទៀត។
មន្ត្រីបក្សប្រឆាំងរូបនេះអះអាងថា វីដេអូបែកធ្លាយនេះក៏ជាការព្រួយបារម្ភបំផុតមួយចំពោះសុវត្ថិភាព និងអាយុជីវិតរបស់សកម្មជននយោបាយស្លូតត្រង់នៅឯមូលដ្ឋានរបស់គណបក្សសង្គ្រោះជាតិផងដែរ ដែលកំពុងទំនាក់ទំនងជាមួយមន្ត្រីរបស់បក្សនេះនៅក្រៅស្រុក ដែលពួកគេអាចនឹងរងការចោទប្រកាន់ ឬចាប់ខ្លួនពីបទផ្សេងៗចំពោះទំនាក់ទំនងនេះ។
កាលពីចុងខែវិច្ឆិកា ឆ្នាំ២០២១ លោក ហ៊ុន សែន ក្នុងពិធីជួបជាមួយមេធាវីស្ម័គ្រចិត្តនៅវិមានសន្តិភាព បានអះអាងថា ក្រុមមួយដែលមានមនុស្សចាប់ពីប្រាំនាក់ឡើងទៅ គឺមានមនុស្សរបស់លោកនៅជាមួយជានិច្ច ហើយពួកគេមានតួនាទីត្រូវតាមយកការណ៍ពីខាងបក្សប្រឆាំងជាប់រហូត និងនៅគ្រប់ទីកន្លែង។
ជុំវិញនៃការតាមដានក្រុមប្រឆាំងនេះ កាលពីចុងឆ្នាំ២០១៩ សកម្មជនបក្សប្រឆាំងនៅមូលដ្ឋានជាច្រើនត្រូវបានអាជ្ញាធរក្រុងភ្នំពេញចាប់ខ្លួនដាក់ពន្ធនាគារ និងចោទប្រកាន់ពីបទសមគំនិតផ្តួលរំលំរដ្ឋាភិបាលកម្ពុជាបច្ចុប្បន្ន បន្ទាប់ពីអ្នកទាំងនោះចូលរួមក្នុងយុទ្ធនាការមាតុភូមិនិវត្តន៍ ៩ វិច្ឆិកា របស់អតីតមេដឹកនាំប្រឆាំង លោក សម រង្ស៊ី នៅពេលនោះ៕