ក្រុមអ្នកតស៊ូមតិរិះគន់ថា ក្រុមប្រឆាំងនៅក្រៅស្រុកកំពុងទាល់ច្រកអស់ផ្លូវដើរ ហើយក៏នាំគ្នាងាកមកស្រែកពាក្យ «ផ្សះផ្សាជាតិ» ខណៈបណ្ឌិតបញ្ញវន្តមួយចំនួននាំគ្នាចាំធ្វើសេចក្ដីសន្និដ្ឋានសរសើរល្ខោនរបស់ក្រុមអ្នកនយោបាយអស់ផ្លូវទាំងនោះ ដែលប្រឹងកុហកភូតភរប្រជាពលរដ្ឋខ្មែរបន្តទៀតនៅពេលនេះ។
ការរិះគន់នេះ ធ្វើឡើងបន្ទាប់ពីប្រមុខរដ្ឋាភិបាលកម្ពុជា លោក ហ៊ុន សែន ត្រូវបានគេអនុញ្ញាតឲ្យចូលទៅក្នុងកិច្ចប្រជុំសម្ងាត់របស់មន្ត្រីបក្សប្រឆាំងតាមប្រព័ន្ធអនឡាញ Zoom ដែលត្រូវគេទម្លាយកាលពីពេលថ្មីៗនេះ ហើយត្រូវបានគេសន្និដ្ឋានថាជាសញ្ញាវិជ្ជមានសម្រាប់ក្រុមប្រឆាំងក្នុងការរកការចរចានយោបាយសម្រាប់កម្ពុជា។
អ្នកវិភាគនយោបាយ សង្គម និងជាអនុប្រធានក្រុមប្រឹក្សាភិបាលនៃចលនានិស្សិតដើម្បីលទ្ធិប្រជាធិបតេយ្យ លោក គឹម សុខ បានសរសេរលើគណនី Facebook របស់លោក កាលពីម្សិលមិញ ដោយលោករំឭកសម្ដីរបស់លោកតាំងពីមុនព្រឹត្តិការណ៍ «៩ វិច្ឆិកា ២០១៩» កន្លងទៅថា អ្នកនយោបាយប្រឆាំងនៅក្រៅស្រុកនឹងនាំគ្នាសូត្រពាក្យ «ផ្សះផ្សាជាតិ» ពេលពួកគេអស់ល្បែងនយោបាយធំៗដើម្បីកុហកពលរដ្ឋបន្តទៀត។
លោកអះអាងថា ក្រោយព្រឹត្តិការណ៍ ៩ វិច្ឆិកា លោកក៏ធ្លាប់ផ្តល់យោបល់ជាញឹកញាប់ផងដែរថា បើពិតជាចង់ឈ្នះបក្សកាន់អំណាចមែន គួរចេះដាក់ខ្លួនផ្សះផ្សាផ្ទៃក្នុង និងប្រកាសរកការផ្សះផ្សាជាតិជាចំហប្រកបដោយការអត់ធ្មត់ ប៉ុន្តែមេដឹកនាំកំពូលៗរបស់បក្សប្រឆាំងបានបដិសេធនូវការលើកឡើងរបស់លោកទាំងស្រុង ដោយអះអាងថា មិនចាំបាច់ផ្សះផ្សាផ្ទៃក្នុងទេ ហើយក៏មិនចាំបាច់ផ្សះផ្សាជាតិអ្វីនោះដែរ គឺមានតែវិធីចូលចាប់ ចូលចង ចូលផ្ដួលរំលំប៉ុណ្ណោះ។
លោក គឹម សុខ ធ្លាប់អះអាងថា យុទ្ធសាស្ត្រផ្សះផ្សា គឺជាផ្លូវស្របច្បាប់ និងជាយុទ្ធសាស្ត្រនយោបាយមិនទាល់ក្រឡា ទាំងនយោបាយផ្ទៃក្នុងជាតិ និងនយោបាយការទូតលើឆាកអន្តរជាតិ ពីព្រោះការដឹកនាំដើម្បីផ្សះផ្សាជាតិនេះ គឺជាជំហានឆ្ពោះទៅរកការសង្គ្រោះប្រជាធិបតេយ្យយ៉ាងពិតប្រាកដ គ្មានអ្នកឈ្នះ គ្មានអ្នកចាញ់ តែបានផលប្រយោជន៍សម្រាប់ខ្មែរទាំងអស់គ្នា។
កាលពីថ្ងៃទី៩ ខែវិច្ឆិកា ឆ្នាំ២០១៩ អតីតមេដឹកនាំបក្សប្រឆាំង លោក សម រង្ស៊ី បានប្រកាសធ្វើមាតុភូមិនិវត្តន៍ដោយអំពាវនាវឲ្យមន្ត្រីរាជការ កងកម្លាំងប្រដាប់អាវុធ និងពលរដ្ឋ ជាពិសេសសមាជិកគណបក្សសង្គ្រោះជាតិ ឲ្យចូលរួមជាមួយនឹងលោក ដើម្បីផ្ដួលរំលំរដ្ឋាភិបាលកម្ពុជា ប៉ុន្តែផែនការនេះត្រូវបរាជ័យទាំងស្រុង។
ទាក់ទិននឹងបញ្ហានេះ កាលពីដើមខែមីនា ឆ្នាំ២០២១ សាលាដំបូងរាជធានីភ្នំពេញ បានប្រកាសសាលក្រមកាត់ទោសលោក សម រង្ស៊ី កំបាំងមុខឱ្យជាប់ពន្ធនាគាររយៈពេល ២៥ឆ្នាំ ពីបទប៉ុនប៉ងផ្ដួលរំលំរដ្ឋាភិបាលកម្ពុជាបច្ចុប្បន្នផងដែរ ហើយនិងត្រូវដកហូតសិទ្ធិបោះឆ្នោត និងឈរឈ្មោះឲ្យគេបោះឆ្នោតឲ្យថែមទៀត។
ចំណែកឯអនុប្រធានបក្សប្រឆាំង អ្នកស្រី មូរ សុខហួរ ក៏បានប្រកាសកាលពីថ្ងៃទី១ ខែធ្នូ ឆ្នាំ២០២០ ធ្វើយុទ្ធនាការប្រមូលសកម្មជន និងអតីតមន្ត្រីគណបក្សរបស់ខ្លួនដើម្បីធ្វើមាតុភូមិនិវត្តន៍ទៅប្រទេសកម្ពុជាជាថ្មីម្ដងទៀត ដើម្បីរកការចរចាបញ្ចប់វិបត្តិនយោបាយជាមួយប្រមុខរដ្ឋាភិបាល លោក ហ៊ុន សែន ប៉ុន្តែយុទ្ធនាការនេះក៏ត្រូវបរាជ័យដូចមុនដែរ។
យ៉ាងណាក៏ដោយ កាលពីថ្ងៃទី២៩ ខែធ្នូ ឆ្នាំ២០២០ កន្លងទៅ លោក ហ៊ុន សែន បានប្រតិកម្មក្នុងកម្មវិធីផ្សាយផ្ទាល់ពិសេសស្ដីពីការបិទបញ្ចប់ព្រឹត្តិការណ៍សហគមន៍ ២៨ ខែវិច្ឆិកា ថា លោកនឹងមិនចរចាជាមួយអ្នកនយោបាយណាទេ ត្បិតលោកមិនមានជម្លោះជាមួយអ្នកទាំងនោះឡើយ តែផ្ទុយទៅវិញ អ្នកទាំងនោះមានជម្លោះជាមួយផ្លូវច្បាប់តែប៉ុណ្ណោះ។ ជាងនេះទៀត លោកបញ្ជាក់ថា លោកនឹងមិនលើកលែងឱ្យអ្នកដែលចោទកូនប្រុសរបស់លោកថា កូនមេដឹកនាំវៀតណាមជាដាច់ខាតផងដែរ។
មកទល់ពេលនេះ ពន្លឺនៃកិច្ចចរចារកដំណោះស្រាយវិបត្តិនយោបាយនៅកម្ពុជា នៅមិនទាន់កើតមាននៅឡើយទេ បន្ទាប់ពីប្រមុខរដ្ឋាភិបាលលោក ហ៊ុន សែន ធ្លាប់អះអាងថា លោកគ្មានអ្វីត្រូវចរចាជាមួយអ្នកណាឡើយ ហើយលោកថែមទាំងហាមមិនឱ្យបរទេសជួយសម្របសម្រួលរឿងនេះថែមទៀត បើទោះបីជាមានការអំពាវនាវពីសហគមន៍អន្តរជាតិឱ្យអ្នកនយោបាយខ្មែររកការស្រុះស្រួលគ្នាដើម្បីដោះស្រាយវិបត្តិសម្រាប់ពលរដ្ឋខ្លួនឯងក៏ដោយ៕