លោក ហ៊ុន សែន ចំអកថា អ្នកនយោបាយដែលល្ងង់ ហើយស្រួលប្រើបំផុតនោះ គឺអ្នកដែលបានជួយកែរដ្ឋធម្មនុញ្ញពី ២ភាគ៣ ទៅជា ៥០ភាគរយបូក១ ព្រោះថាលោកពិតជាពិបាកណាស់ក្នុងការធ្វើជានាយករដ្ឋមន្ត្រីដែលបង្កើតឡើងដោយរូបមន្ត ២ភាគ៣។
លោក ហ៊ុន សែន បានថ្លែងបែបនេះដើម្បីចំអកឱ្យអតីតមេដឹកនាំបក្សប្រឆាំង លោក សម រង្ស៊ី ដែលធ្លាប់បានចូលរួមកែប្រែរដ្ឋធម្មនុញ្ញក្នុងរដ្ឋាភិបាលជាមួយគណបក្សកាន់អំណាចកាលពីឆ្នាំ២០០៦ កន្លងទៅ។
ក្នុងពិធីបើកយុទ្ធនាការចាក់ថ្នាំបង្ការជំងឺ Covid-19 សម្រាប់កុមារអាយុក្រោម ១៣ឆ្នាំនៅវិមានសន្តិភាព នៅថ្ងៃទី១៧ ខែកញ្ញា ឆ្នាំ២០២១ ប្រមុខរដ្ឋាភិបាលកម្ពុជាបានថ្លែងថា សម្រាប់លោកជានាយករដ្ឋមន្ត្រីក្រោមរូបមន្ត ២ភាគ៣ ត្រូវក្រុមប្រឆាំងនិយាយឌឺដងផ្លែផ្កាឱ្យច្រើនណាស់នៅពេលដែលលោកត្រូវការកែច្បាប់ដែលត្រូវការសំឡេង ២ភាគ៣ ម្តងៗ ដូច្នេះគណបក្សកាន់អំណាចមានតែពឹងបក្សប្រឆាំងឱ្យបង្គ្រប់សំឡេងតែប៉ុណ្ណោះ។
លោក ហ៊ុន សែន អះអាងថា ដោយសារតែអតីតមេដឹកនាំបក្សប្រឆាំង លោក សម រង្ស៊ី ចង់រុញព្រះអង្គម្ចាស់ នរោត្តម រណឫទ្ធិ ចេញពីឆាកនយោបាយនៅកម្ពុជា ដើម្បីខ្លួនឯងដើរតួជាមេដឹកនាំប្រឆាំងលេចធ្លោទៅថ្ងៃក្រោយ ក៏បានសហការជាមួយគណបក្សកាន់អំណាចកែរូបមន្តបង្កើតរដ្ឋាភិបាលដែលមានចែងក្នុងរដ្ឋធម្មនុញ្ញឱ្យទៅជា ៥០%+១ ដែលជួយឱ្យបក្សកាន់អំណាចអាចបង្កើតរដ្ឋាភិបាលដោយខ្លួនឯង លែងត្រូវការគណបក្សហ៊្វុនស៊ិនប៉ិច ឱ្យបង្គ្រប់សំឡេងតទៅទៀត។
លោក ហ៊ុន សែន បញ្ជាក់ថា បើនៅតែដឹកនាំនយោបាយដូចក្រុមប្រឆាំងដូចដែលធ្លាប់ធ្វើកន្លងមក គឺមិនអាចធ្វើនយោបាយឈ្នះលោកជាដាច់ខាត ស្របពេលដែលបទពិសោធន៍នយោបាយរបស់លោកអស់រយៈពេលជាច្រើនឆ្នាំថែមទៀតនោះ អ្នកនយោបាយក្រុមប្រឆាំងទាំងនោះរឹតតែមិនមែនជាដៃគូប្រកួតប្រជែងនឹងលោកទៅទៀត។
រដ្ឋធម្មនុញ្ញកម្ពុជា ត្រូវបានធ្វើវិសោធនកម្ម ឬកែប្រែចំនួន ៩លើករួចមកហើយ ក្នុងនោះកាលពីឆ្នាំ២០០៦ សមាជិករដ្ឋសភាមកពីគណបក្សប្រជាជនកម្ពុជា និងគណបក្ស សម រង្ស៊ី បានចាប់ដៃគ្នាកែប្រែរូបមន្តបង្កើតរដ្ឋាភិបាលពី ២ភាគ៣ ទៅ ៥០ភាគរយបូក១ ដែលបានផ្តល់ឱកាសឲ្យគណបក្សកាន់អំណាចអាចក្តោបក្តាប់អំណាចបានពេញដៃដូចសព្វថ្ងៃនេះ។
ជុំវិញបញ្ហានេះ អតីតមេដឹកនាំបក្សប្រឆាំង លោក សម រង្ស៊ី ធ្លាប់បានអះអាងកាលពីដើមឆ្នាំ២០២១ នេះថា រដ្ឋធម្មនុញ្ញមិនមែនជាច្បាប់ដែលកែប្រែមិនបាននោះទេ ដូច្នេះការចូលរួមកែប្រែរដ្ឋធម្មនុញ្ញរបស់លោកកាលពីមុននោះ គឺមិនខុសច្បាប់អ្វីនោះឡើយ ប៉ុន្តែលោកមិនបាននិយាយពីឥទ្ធិពលនៃការកែប្រែរូបមន្តពី ២ភាគ៣ ទៅ ៥០ភាគរយបូក១ នេះថានឹងមានផលល្អ ឬផលអាក្រក់សម្រាប់ជាតិប៉ុនណានោះទេ។
ក្រុមអ្នកឃ្លាំមើលសង្គមអះអាងថា រយៈពេលជិត ១៥ឆ្នាំមកនេះ ក្រោយវិសោធនកម្មរដ្ឋធម្មនុញ្ញពី ២ភាគ៣ មក ៥០ភាគរយបូក១ កម្ពុជាបានប្រែក្លាយជាប្រទេសដែលដឹកនាំដោយពហុបក្សទៅជារដ្ឋមួយដឹកនាំដោយឯកបក្ស ដែលធ្វើឱ្យមានការព្រួយបារម្ភពីអធិបតេយ្យភាព បូរណភាពទឹកដី និងនីតិរដ្ឋរបស់កម្ពុជាយ៉ាងខ្លាំង ស្របពេលដែលរដ្ឋាភិបាលក្រុងភ្នំពេញប្រើសភាឯកបក្សរបស់ខ្លួនកែប្រែ និងបង្កើតច្បាប់ថ្មីៗជាបន្តបន្ទាប់ ដើម្បីគាបសង្កត់សិទ្ធិមូលដ្ឋានរបស់ពលរដ្ឋ និងការពារអំណាចរបស់ខ្លួន។
ជាងនេះទៀត ស្ថាប័នដែលជាសសរស្ដម្ភទាំងបីរបស់ជាតិ គឺស្ថាប័ននីតិប្បញ្ញត្តិ ស្ថាប័ននីតិប្រតិបត្តិ និងស្ថាប័នតុលាការ បានក្លាយជាឧបករណ៍នយោបាយរបស់អ្នកកាន់អំណាចទាំងស្រុង៕