 ព្យាករថា កំណើនសេដ្ឋកិច្ចកម្ពុជាឆ្នាំ២០២១ មានកម្រិតត្រឹមតែ ១,៩ភាគរយប៉ុណ្ណោះ ខណៈឆ្នាំ២០២២ នឹងងើបឡើងវិញក្នុងអត្រាកំណើន ៥,៥% ប៉ុន្តែការព្យាករនេះគឺផ្ទុយពីការរំពឹងរបស់រដ្ឋាភិបាលកម្ពុជា ដែលថាសេដ្ឋកិច្ចកម្ពុជានឹងកើនឡើងរហូតដល់ ២,៥% ក្នុងឆ្នាំ២០២១ នេះ។){kind=link}
ធនាគារអភិវឌ្ឍន៍អាស៊ី (ADB) ព្យាករថា កំណើនសេដ្ឋកិច្ចកម្ពុជាឆ្នាំ២០២១ មានកម្រិតត្រឹមតែ ១,៩ភាគរយប៉ុណ្ណោះ ខណៈឆ្នាំ២០២២ នឹងងើបឡើងវិញក្នុងអត្រាកំណើន ៥,៥% ប៉ុន្តែការព្យាករនេះគឺផ្ទុយពីការរំពឹងរបស់រដ្ឋាភិបាលកម្ពុជា ដែលថាសេដ្ឋកិច្ចកម្ពុជានឹងកើនឡើងរហូតដល់ ២,៥% ក្នុងឆ្នាំ២០២១ នេះ។
ធនាគារអភិវឌ្ឍន៍អាស៊ី (ADB) បានចេញសេចក្តីប្រកាសព័ត៌មានរបស់ខ្លួននៅថ្ងៃទី២២ ខែកញ្ញា ឆ្នាំ២០២១ ថា ការនាំចេញសម្លៀកបំពាក់ ទំនិញធ្វើដំណើរ និងស្បែកជើងក្នុងឆមាសទី១ នៅឆ្នាំ២០២១ នេះមានកម្រិតទាបជាងពេលមុនផ្ទុះជំងឺរាតត្បាតកូវីដ-១៩ បើទោះបីជាការនាំចេញនៅឆ្នាំនេះមានកម្រិតខ្ពស់ជាងឆ្នាំ២០២០ ក៏ដោយ។
ប្រភពដដែលអះអាងថា តម្រូវការក្នុងស្រុកសម្រាប់ម្ហូបអាហារ ការស្នាក់នៅ ការដឹកជញ្ជូន និងសេវាកម្មបម្រើផ្ទាល់ផ្សេងទៀតត្រូវបានប៉ះពាល់យ៉ាងខ្លាំង ដោយសារការផ្ទុះឡើងនៃជំងឺកូវីដ-១៩ ក្នុងនោះលំហូរចូលរបស់ភ្ញៀវអន្តរជាតិក៏បានធ្លាក់ចុះរហូត ៩១,៣% ផងដែរក្នុងឆមាសទីមួយនៃឆ្នាំ២០២១ នេះ។
ការព្យាករនេះ ធ្វើឡើងបន្ទាប់ពីកម្ពុជាបានរងផលប៉ះពាល់ដោយសារជំងឺកូវីដ-១៩ អស់រយៈពេលជាង ១ឆ្នាំកន្លងមក ដែលបណ្តាលឱ្យវិស័យមួយចំនួនដែលជាកត្តាចម្បងនៃសេដ្ឋកិច្ចកម្ពុជាលែងដំណើរការស្ទើរតែទាំងស្រុង ដូចជាវិស័យទេសចរណ៍ ជាដើម។
ជុំវិញបញ្ហានេះ ធនាគារពិភពលោក (World Bank) បានព្យាករកាលពីដើមខែមិថុនា ឆ្នាំ២០២១ ថា សេដ្ឋកិច្ចរបស់កម្ពុជានឹងមានកំណើនជិត ៤% ក្នុងឆ្នាំ២០២១ បន្ទាប់ពីធ្លាក់ប្រមាណ ៣,១% កាលពីឆ្នាំ២០២០។ ទោះជាយ៉ាងណាក៏ដោយ ធនាគារពិភពលោកបញ្ជាក់ថា កំណើននេះនៅតែមានភាពមិនប្រាកដប្រជានៅឡើយ។
ក្នុងសារលិខិតអបអរសាទរឱកាសទិវាសន្តិភាពអន្តរជាតិ ២១ កញ្ញា ឆ្នាំ២០២១ លោក ហ៊ុន សែន អះអាងថា ទោះបីកម្ពុជាកំពុងរងផលប៉ះពាល់ដោយសារជំងឺកូវីដ-១៩ យ៉ាងណាក៏ដោយ ក៏អត្រាកំណើនសេដ្ឋកិច្ចកម្ពុជាសម្រាប់ឆ្នាំ២០២១ រំពឹងថាអាចនឹងងើបឡើងស្ថិតក្នុងរង្វង់ ២,៥% បន្ទាប់ពីធ្លាក់ចុះក្នុងកម្រិត -១,៩% ក្នុងឆ្នាំ២០២០ កន្លងទៅ។
ទោះជាបែបនេះក្តី កាលពីថ្ងៃទី៩ ខែកញ្ញា ឆ្នាំ២០២១ ក្នុងពិធីបើកកិច្ចប្រជុំកំពូលមហាអនុតំបន់មេគង្គលើកទី៧ លោក ហ៊ុន សែន ត្អូញត្អែរថា រលកថ្មីនៃជំងឺកូវីដ-១៩ បានធ្វើឱ្យប៉ះពាល់យ៉ាងខ្លាំងដល់កត្តាដែលនាំឱ្យងើបឡើងនៃសេដ្ឋកិច្ចកម្ពុជាក្នុងឆ្នាំ២០២១ នេះ។
លោកបន្ថែមថា ដើម្បីកាត់បន្ថយផលប៉ះពាល់ដល់ដំណើរការសេដ្ឋកិច្ចរបស់ខ្លួន និងរក្សាលំនឹងជីវភាពពលរដ្ឋ កម្ពុជាបានខិតខំប្រឹងប្រែងគ្រប់គ្រងសភាពការណ៍ជំងឺកូវីដ-១៩ ឱ្យកាន់តែមានប្រសិទ្ធភាពខ្ពស់បន្ថែមទៀត។
ជុំវិញបញ្ហានេះ នាយិកាធនាគារអភិវឌ្ឍន៍អាស៊ី (ADB) ប្រចាំកម្ពុជា អ្នកស្រី Sunniya Durrani-Jamal អះអាងក្នុងសេចក្តីប្រកាសព័ត៌មានរបស់ខ្លួននៅថ្ងៃទី២២ កញ្ញា ថា ដើម្បីលើកកម្ពស់ជីវភាពរស់នៅរបស់ប្រជាពលរដ្ឋ និងធានានូវនិរន្តរភាពសេដ្ឋកិច្ច រដ្ឋាភិបាលកម្ពុជាត្រូវតែពង្រឹងប្រព័ន្ធគាំពារសង្គមរបស់ខ្លួន និងពង្រឹងសមត្ថភាពប្រកួតប្រជែងអន្តរជាតិរបស់ប្រទេសផងដែរ។
យ៉ាងណាក៏ដោយ ធនាគារអភិវឌ្ឍន៍អាស៊ី អះអាងថា ដើម្បីគាំទ្រដល់ការអភិវឌ្ឍសេដ្ឋកិច្ច និងការងើបឡើងវិញរបស់កម្ពុជាពីជំងឺកូវីដ-១៩ ADB កំពុងអនុវត្តគម្រោងវិនិយោគដែលមានទំហំទឹកប្រាក់ ២,០៨ពាន់លានដុល្លារអាមេរិកនៅកម្ពុជាក្នុងពេលបច្ចុប្បន្ននេះ។
កាលពីឆ្នាំ២០២០ ធនាគារអភិវឌ្ឍន៍អាស៊ី (ADB) បានផ្តល់ប្រាក់កម្ចី និងជំនួយឥតសំណងជាង ៤៧០០លានដុល្លារ និងបានផ្តល់បន្ថែមជាង ២៨០០លានដុល្លារទៀត តាមរយៈសហហិរញ្ញប្បទាន។ បន្ថែមពីនេះ ទឹកប្រាក់បម្រុងរបស់ ADB សម្រាប់ការអភិវឌ្ឍសេដ្ឋកិច្ចកម្ពុជារយៈពេល ៤ឆ្នាំ ចាប់ពីឆ្នាំ២០២១ ដល់ឆ្នាំ២០២៤ រួមទាំងប្រាក់កម្ចីសម្បទានផងនោះ មានចំនួន ១,៤៩ពាន់លានដុល្លារ និងជំនួយឥតសំណងចំនួន ៣១,៨លានដុល្លារអាមេរិកផងដែរ៕