ក្រុមអ្នកតស៊ូមតិនៅឯនាយសមុទ្រ លើកឡើងថា មហាអំណាចកុម្មុយនីស្តចិន ក៏ដូចមហាអំណាចអាមេរិកដែរ គ្មានគោលការណ៍ឈ្លោះគ្នាដើម្បីតែអ្នកនយោបាយខ្មែរខាងណាម្នាក់នោះទេ ព្រោះថាមហាអំណាចទាំងនោះតែងគិតផលប្រយោជន៍របស់ប្រទេសគេរៀងៗខ្លួនប៉ុណ្ណោះ ដូច្នេះមេដឹកនាំខ្មែរក៏ត្រូវគិតពីផលប្រយោជន៍នៃប្រទេសខ្លួនដែរ មិនត្រូវផ្ដេកផ្ដួលលើមហាអំណាចណាមួយនោះឡើយ។
ប្រធានប្រតិបត្តិនៃចលនាពលរដ្ឋដើម្បីប្រជាធិបតេយ្យ (PMD) លោក ទូច វិបុល បានសរសេរលើគណនី Facebook លោក នៅថ្ងៃទី២៧ ខែកញ្ញា ថា បច្ចុប្បន្ននេះ អ្នកនយោបាយខ្មែរដែលកំពុងកាន់អំណាច និងមិនទាន់កាន់អំណាច បាននាំគ្នាផ្ដេកផ្ដួលខ្លួនលើមហាអំណាចចិន និងមហាអំណាចអាមេរិក ដើម្បីទាញប្រយោជន៍នយោបាយរបស់ពួកគេរៀងៗខ្លួន។ លោកអះអាងថា មេដឹកនាំរបស់កម្ពុជាទាំងអស់គួរតែដឹង និងសិក្សាឲ្យបានល្អិតល្អន់ថា ការដណ្តើមឥទ្ធិពលក្នុងភូមិសាស្ត្រនយោបាយរវាងប្រទេសមហាអំណាចលោកសេរី និងកុម្មុយនីស្ត គឺតែងតែកើតមានជានិច្ច ប៉ុន្តែមិនមែនដើម្បីផលប្រយោជន៍របស់អ្នកនយោបាយខ្មែរណាម្នាក់ឡើយ។ ផ្ទុយទៅវិញ ពួកគេធ្វើឡើងដើម្បីឥទ្ធិពលនយោបាយរបស់ពួកគេតែប៉ុណ្ណោះ។
មេដឹកនាំចលនាពលរដ្ឋដើម្បីប្រជាធិបតេយ្យរូបនេះបញ្ជាក់ថា ដើម្បីបានយុត្តិធម៌ បានសេរីភាព បានប្រជាធិបតេយ្យ ពលរដ្ឋខ្មែរត្រូវតែប្រើសិទ្ធិសេរីភាពស្របតាមរដ្ឋធម្មនុញ្ញ តវ៉ាជាមួយរដ្ឋអំណាច និងអ្នកនយោបាយទាំងនោះ ដើម្បីឱ្យពួកគេបម្រើសេចក្តីត្រូវការរបស់ខ្លួន និងគោរពតាមច្បាប់ដែលកម្ពុជាបានផ្តល់សច្ចាប័នឲ្យខាងតែបាន។
លោក ទូច វិបុល បញ្ជាក់ថា នៅពេលដែលពលរដ្ឋខ្មែរក្លាយជាពលរដ្ឋដែលខ្លាំង នោះនឹងនាំឱ្យស្ថាប័នជាតិរបស់កម្ពុជាក្លាយជាស្ថាប័នដែលរឹងមាំ ហើយក៏អាចដឹកនាំកម្ពុជាឱ្យស្ថិតក្រោមដំបូលនីតិរដ្ឋពិតប្រាកដដែរ ដែលនឹងនាំជនជាតិខ្មែរក្លាយជាជនជាតិដែលខ្លាំងទៅថ្ងៃអនាគតយ៉ាងពិតប្រាកដ។
ការអះអាងបែបនេះ ធ្វើឡើងស្របពេលដែលអ្នកដឹកនាំខ្មែរ ទាំងគណបក្សកាន់អំណាច និងគណបក្សប្រឆាំង នៅមិនទាន់អាចរកដំណោះស្រាយនយោបាយដើម្បីផ្សះផ្សាជាតិរបស់ខ្លួនបាននៅឡើយរហូតមកដល់ពេលនេះ ប៉ុន្តែពួកគេព្យាយាមយកប្រទេសមហាអំណាចធ្វើជាខ្នងបង្អែករៀងៗខ្លួន ដើម្បីតែយកឈ្នះគ្នាទៅវិញទៅមក ខណៈប្រទេសជាតិនៅតែបន្តរងនូវវិបត្តិទាំងនយោបាយ និងសេដ្ឋកិច្ចកាន់តែធ្ងន់ធ្ងរទៅៗ។
ក្រុមអ្នកឃ្លាំមើលនិយាយថា លោក ហ៊ុន សែន កំពុងធ្វើនយោបាយបង្កជម្លោះរវាងតែជាតិសាសន៍ឯង ដោយយកមហាអំណាចកុម្មុយនីស្តចិន ជាខ្នងបង្អែក ចំណែកឯក្រុមប្រឆាំងទាញយកមហាអំណាចអាមេរិកជាខ្នងបង្អែក ហើយភាគីទាំងពីរនេះសុទ្ធតែគ្មានជំហរផ្សះផ្សាជាតិដូចគ្នា ហើយពលរដ្ឋខ្មែរនៅតែបន្តរងគ្រោះដោយសារនយោបាយបែបនេះជាបន្តបន្ទាប់។
កាលពីពាក់កណ្តាលខែកញ្ញា ឆ្នាំ២០២១ នេះ លោក ហ៊ុន សែន ធ្លាប់បានអះអាងថា នៅពេលនេះគ្មានកិច្ចការនយោបាយណាដែលត្រូវដោះស្រាយដោយការចរចាជាមួយក្រុមប្រឆាំងនោះទេ ហើយសូមកុំសង្ឃឹមថានឹងមានការចរចា ឬការយោគយល់ពីរូបលោកឲ្យសោះ។
អ្នកវិភាគនយោបាយ សង្គម និងជាអនុប្រធានក្រុមប្រឹក្សាភិបាលនៃចលនាពលរដ្ឋដើម្បីប្រជាធិបតេយ្យ លោក គឹម សុខ បានសរសេរលើគណនី Facebook របស់លោកនៅថ្ងៃនេះថា ពុំមានការធ្វើបុណ្យអ្វីល្អប្រសើរជាងការចូលរួមធ្វើបុណ្យដើម្បីសង្គ្រោះលទ្ធិប្រជាធិបតេយ្យនោះទេ។ លោកថា ទាល់តែកម្ពុជាមានប្រជាធិបតេយ្យ ទើបព្រះពុទ្ធសាសនារុងរឿង ពលរដ្ឋមានសិទ្ធិជាម្ចាស់ប្រទេសពិតប្រាកដ ហើយកម្ពុជាក៏អាចរក្សាអធិបតេយ្យរបស់ខ្លួនបានគង់វង្សជានិរន្តដែរ។
លោកបញ្ជាក់ថា ដើម្បីសង្គ្រោះប្រជាធិបតេយ្យ ត្រូវមានធាតុខ្លាំងយ៉ាងតិចពីរក្នុងចំណោមធាតុមូលដ្ឋានសំខាន់ៗបី ដែលត្រូវងើបឡើងព្រមៗគ្នា រួមមាន អ្នកនយោបាយដែលមាននិន្នាការប្រជាធិបតេយ្យខ្លាំង ចលនាសង្គមដើម្បីប្រជាធិបតេយ្យខ្លាំង និងពលរដ្ឋដែលប្រាថ្នាប្រជាធិបតេយ្យខ្លាំង។
លោក គឹម សុខ សង្កត់ធ្ងន់ថា ក្នុងស្ថានភាពបច្ចុប្បន្នរបស់កម្ពុជា ដោយសារតែគ្មានអ្នកនយោបាយខ្មែរខ្លាំងណាម្នាក់ហ៊ានធ្វើពលីកម្មដើម្បីសង្គ្រោះប្រជាធិបតេយ្យនោះហើយ ទើបកម្ពុជាជួបនូវវិបត្តិនយោបាយឥតឈប់ឈរបែបនេះ ដូច្នេះនិស្សិតបញ្ញវន្តខ្មែរ ត្រូវតែជួយជំរុញចលនាសង្គមដើម្បីប្រជាធិបតេយ្យ និងពលរដ្ឋដែលប្រាថ្នាលទ្ធិប្រជាធិបតេយ្យឲ្យមានស្មារតីខ្លាំងឡើងវិញ ដើម្បីសង្គ្រោះប្រជាធិបតេយ្យនៅកម្ពុជាឱ្យបានទាន់ពេលវេលា៕