ក្រុមអ្នកឃ្លាំមើលផែនការអភិវឌ្ឍន៍សង្គម និងពលរដ្ឋ ស្នើដល់ថ្នាក់ដឹកនាំក្រសួងពាក់ព័ន្ធ និងប្រមុខរដ្ឋាភិបាល មានវិធានការទប់ស្កាត់មន្ត្រីជាន់ខ្ពស់រដ្ឋាភិបាល និងមន្ត្រីជាន់ខ្ពស់ក្រសួងការពារជាតិ កំពុងកាប់ទន្ទ្រានដីព្រៃរបស់រដ្ឋធ្វើកម្មសិទ្ធិខុសច្បាប់ ដែលកំពុងកើតមានឡើងស្ថិតក្នុងភូមិសាស្ត្រស្រុកត្រាំកក់ ខេត្តតាកែវ និងស្រុកជុំគីរី ខេត្តកំពត។
មន្ត្រីឃ្លាំមើលបរិស្ថាន និងប្រជាពលរដ្ឋ បានឲ្យសារព័ត៌មាន The Cambodia Daily ដឹងនៅថ្ងៃពុធ ទី០៦ ខែតុលា ឆ្នាំ២០២១ នេះថា អ្នកនៅពីក្រោយបទល្មើសមនុស្ស និងគ្រឿងចក្រឲ្យចូលទៅឈូសឆាយទន្ទ្រានរំលោភយកដីព្រៃឈើរបស់រដ្ឋដោយខុសច្បាប់ គឺភាគច្រើនជាមន្ត្រីមានឋានៈបុណ្យស័ក្តិខ្ពស់ មានអង្គភាពប្រចាំការនៅជិតប្រជុំជួរភ្នំទាំងនោះ រួមមានមេបញ្ជាការកងពលតូចអន្តរាគមន៍លេខ១១ និងមន្ត្រីខ្លះទៀតបម្រើការងារនៅមជ្ឈមណ្ឌលព្យាបាល និងស្ដារនីតិសម្បទាអ្នកញៀនគ្រឿងញៀនជាដើម។
ប្រភពដដែលបានបញ្ជាក់ទៀតថា បច្ចុប្បន្ននេះ ភាពអនាធិបតេយ្យនៃសកម្មភាពចូលទៅទន្ទ្រានដីព្រៃឈើរដ្ឋធ្វើកម្មសិទ្ធិខុសច្បាប់របស់មន្ត្រីយោធាខិលខូចទាំងនោះ គឺមានវិសាលភាពរហូតដល់រាប់ពាន់ហិកតារ ប៉ុន្តែមិនដែលឃើញមានលោកអភិបាលខេត្តតាកែវ ឬខេត្តកំពត និងមន្ត្រីពីក្រសួងស្ថាប័នណាមួយចុះមកពិនិត្យ ឬបង្ក្រាបនៅឡើយទេ។
ប្រភពបន្តថា ទីតាំងដែលមន្ត្រីយោធាជាន់ខ្ពស់បានជួលមនុស្ស និងគ្រឿងចក្រឲ្យចូលទៅឈូសឆាយស្ថិតនៅចំណុចអមផ្លូវចូលទៅតំបន់រមណីយដ្ឋានម្លិច ឬនៅជួរភ្នំក្បែរវត្តបាក់នឹម មានដូចជានៅជ្រោះម្លូរ ជ្រោះជ្រៃ ជ្រោះរការ ជ្រោះកែវ ជម្រាលភ្នំតាកុច ជម្រាលភ្នំដំរីរមាល ជម្រាលភ្នំជ្រោះរបង និងជម្រាលភ្នំវិហារ ជាដើម។
ប្រភពដដែលបន្តទៀតថា អ្នកនៅពីក្រោយបទល្មើសទាំងនេះ គឺមានអង្គភាពនៅអមតាមផ្លូវចូលទៅតំបន់រមណីយដ្ឋានម្លិច ឬជួរភ្នំនៅម្តុំជិតវត្តបាក់នឹម ដោយធ្វើសកម្មភាពឈូសឆាយដីព្រៃចាប់ពីជម្រាលជើងភ្នំរហូតទៅដល់កំពូលភ្នំទៅតាមសណ្ឋានដីរាបស្មើ ឬដីមានជីវជាតិ។
បន្ទាប់ពីជនល្មើសទាំងនោះបានឈូសឆាយដីព្រៃភ្នំទាំងនោះរួច គឺក្រុមជនអនាធិបតេយ្យដែលជាមន្ត្រីយោធាជាន់ខ្ពស់មួយចំនួននោះ បានធ្វើរបងហ៊ុមព័ទ្ធកំណត់ព្រំដីសម្រាប់សម្គាល់ម្ចាស់រៀងៗខ្លួន ដោយមានដាំកៅស៊ូ ទុរេន និងដំណាំផ្សេងៗទៀតនៅលើបរិវេណដីដែលពួកគេទន្ទ្រានខុសច្បាប់ទាំងនោះថែមទៀតផង។
ក្រុមអ្នកឃ្លាំមើលផែនការអភិវឌ្ឍន៍សង្គម និងពលរដ្ឋ បានស្នើដល់លោក សាយ សំអាល់ រដ្ឋមន្ត្រីក្រសួងបរិស្ថាន លោក ទៀ បាញ់ រដ្ឋមន្ត្រីក្រសួងការពារជាតិ ជាពិសេសលោកនាយករដ្ឋមន្ត្រី ហ៊ុន សែន ឲ្យជួយមានវិធានការទៅលើជនអនាធិបតេយ្យដែលមានតួនាទីជាមេទាហាន ឬមន្ត្រីជាន់ខ្ពស់ក្នុងទីបញ្ជាការកងពលតូចអន្តរាគមន៍លេខ១១ និងបម្រើការងារនៅក្នុងមជ្ឈមណ្ឌលព្យាបាល និងស្ដារនីតិសម្បទាអ្នកញៀនគ្រឿងញៀន ដែលបានចូលទន្ទ្រានដីព្រៃឈើរបស់រដ្ឋធ្វើកម្មសិទ្ធិឯកជនខុសច្បាប់។
ប្រជាពលរដ្ឋ និងមន្ត្រីឃ្លាំមើលបរិស្ថាន ក៏ស្នើដល់លោក ហ៊ុន សែន និងលោក ទៀ បាញ់ មានវិធានការតឹងរ៉ឹងចំពោះមន្ត្រីជាន់ខ្ពស់ទាំងនោះដែលជាប់ពាក់ព័ន្ធនឹងសកម្មភាពជួលមន្ត្រី និងគ្រឿងចក្រចូលទន្ទ្រានកាប់រានដីព្រៃឈើរបស់រដ្ឋឲ្យបានធ្ងន់ធ្ងរ ដើម្បីជាការព្រមាន និងការពារធនធានព្រៃឈើដែលនៅសេសសល់ឲ្យបានគង់វង្ស។
ពលរដ្ឋបានបន្តថា ក្រោយមានបទល្មើសទន្ទ្រានដីព្រៃរដ្ឋធ្វើកម្មសិទ្ធិខុសច្បាប់ទាំងនេះ គឺពលរដ្ឋមិនអាចចូលទៅប្រកបរបររុករកអនុផលព្រៃឈើ និងមិនអាចយកគោក្របីឲ្យចូលទៅស៊ីស្មៅនៅតាមជម្រាលជើងភ្នំនៅជិតផ្ទះរបស់ពួកគាត់ដូចពេលមុនទៀតទេ ដោយសារតែត្រូវបានគេធ្វើរបងហ៊ុមព័ទ្ធមិនអាចចេញចូលបាន។
ក្រុមប្រជាពលរដ្ឋក៏បានចោទថា ចាប់តាំងពីអង្គភាពនៃទីបញ្ជាការកងពលតូចអន្តរាគមន៍លេខ១១ បានមកប្រចាំការនៅត្រង់ចំណុចចន្លោះព្រំប្រទល់ខេត្តតាកែវ និងខេត្តកំពត រួចមក គឺក្រុមមន្ត្រីដឹកនាំអង្គភាពមួយនេះតែងតែបញ្ជូនកម្លាំងទាហានគំរាមកំហែងរំលោភយកដីធ្លីរបស់ប្រជាពលរដ្ឋ រំលោភដីទីធ្លាសង់រោងធ្វើបុណ្យរបស់ទីអារាម និងបំផ្លាញព្រៃឈើនៅតាមជម្រាលជើងភ្នំនានា ធ្វើកម្មសិទ្ធិឯកជនខុសច្បាប់ស្ទើរលាយហិនហោច។
ទោះជាបែបនេះក្តី The Cambodia Daily នៅមិនទាន់អាចទាក់ទងលោក សាយ សំអាល់ រដ្ឋមន្ត្រីក្រសួងបរិស្ថាន និងលោក ទៀ បាញ់ រដ្ឋមន្ត្រីក្រសួងការពារជាតិ ដើម្បីបំភ្លឺជុំវិញបទល្មើសដែលជាប់ពាក់ព័ន្ធមន្ត្រីយោធាមានឋានៈបុណ្យស័ក្តិខ្ពស់ កំពុងបម្រើការងារនៅទីបញ្ជាការកងពលតូចអន្តរាគមន៍លេខ១១ និងនៅក្នុងមជ្ឈមណ្ឌលព្យាបាល និងស្ដារនីតិសម្បទាអ្នកញៀនគ្រឿងញៀន ដែលជួលគ្រឿងចក្រឈូសឆាយដីព្រៃឈើរបស់រដ្ឋដោយខុសច្បាប់ទាំងនោះបាននៅឡើយទេ នៅថ្ងៃរសៀលថ្ងៃពុធ ទី០៦ ខែតុលា ឆ្នាំ២០២១ នេះ៕