ក្រសួងធនធានទឹក និងឧតុនិយម ឱ្យដឹងថា ប្រទេសកម្ពុជានឹងទទួលរងឥទ្ធិពលពីជ្រលងនៃព្យុះកុំប៉ាស៊ូ ដែលនឹងបង្កឱ្យមានភ្លៀងធ្លាក់ពីកម្រិតបង្គួរពេញមួយសប្ដាហ៍នៅតាមបណ្ដារាជធានី-ខេត្តមួយចំនួន។
ក្នុងសេចក្ដីជូនដំណឹងចុះថ្ងៃទី១២ ខែតុលា ឆ្នាំ២០២១ ក្រសួងធនធានទឹក និងឧតុនិយម បានឱ្យដឹងថា ចាប់ពីថ្ងៃទី១៣ ដល់ទី១៤ តុលា ព្យុះកុំប៉ាស៊ូ នឹងចូលមកកោះហាយណាំ បន្ទាប់មកឥទ្ធិពលព្យុះនេះនឹងចូលមកខេត្តវិញ នៃប្រទេសវៀតណាម និងបន្តចូលប្រទេសឡាវ រួមទាំងកម្ពុជា។
ក្រសួងថា ឥទ្ធិពលនៃព្យុះនេះនឹងបង្កឱ្យមានភ្លៀងធ្លាក់កម្រិតពីខ្សោយទៅមធ្យម និងមានខ្យល់កន្ត្រាក់ក្នុងល្បឿនមធ្យមនៅតាមបណ្ដាខេត្ត-ក្រុងមួយចំនួននៃប្រទេសកម្ពុជា។ ប្រភពដដែលបញ្ជាក់ថា ខេត្តដែលរងឥទ្ធិពលដោយសារព្យុះនេះមានខេត្តប៉ៃលិន ពោធិ៍សាត់ កំពង់ឆ្នាំង កំពង់ស្ពឺ កណ្តាល តាកែវ ព្រៃវែង និងរាជធានីភ្នំពេញ ជាដើម។
ដោយឡែកចាប់ពីថ្ងៃទី១៥ ដល់ថ្ងៃទី១៧ ខែតុលា ឆ្នាំ២០២១ កម្ពុជានឹងបន្តរងឥទ្ធិពលមូសុងនិរតីខ្លាំង និងប្រព័ន្ធសម្ពាធទាបភ្ជាប់ជាមួយវិសម្ពាធស្ថិតក្នុងសមុទ្រចិនខាងត្បូង ដែលបង្កឱ្យមានភ្លៀងធ្លាក់ពីតិចទៅច្រើននៅខេត្តកោះកុង ព្រះសីហនុ កំពត និងខេត្តកែប ចាប់ពីថ្ងៃទី១៣ ដល់ថ្ងៃទី១៥ ខែតុលា។
ចំណែកចាប់ពីថ្ងៃទី១៨ ដល់ថ្ងៃទី១៩ ខែតុលា ឆ្នាំ២០២១ កម្ពុជានឹងទទួលរងឥទ្ធិពលទ្រនុងសម្ពាធខ្ពស់ពីប្រទេសចិនមួយទៀត ដែលនឹងធ្វើឱ្យកម្ពុជាមានភ្លៀងធ្លាក់ពីតិចទៅច្រើនដែរ។ ករណីនេះ ក្រសួងធនធានទឹក បានអំពាវនាវដល់ប្រជាពលរដ្ឋឱ្យបង្កើនការប្រុងប្រយ័ត្នចំពោះបញ្ហាអាកាសធាតុទាំងនេះ។
បើតាមរបាយការណ៍គណៈកម្មាធិការជាតិគ្រប់គ្រងគ្រោះមហន្តរាយ ចេញផ្សាយកាលពីថ្ងៃទី០៨ ខែកញ្ញា ឆ្នាំ២០២១ បានឱ្យដឹងថា រយៈពេល ៨ខែក្នុងឆ្នាំ២០២១ នេះ មនុស្សចំនួន ៩៤នាក់ស្លាប់ និងរបួស ១៥៨នាក់ដោយសារគ្រោះធម្មជាតិរន្ទះបាញ់ ខ្យល់កន្ត្រាក់ និងគ្រោះអគ្គិភ័យ។
ក្រៅពីមនុស្សស្លាប់ និងរបួសនោះ ក៏មានផ្ទះជិត ១០០០ខ្នងបានរលំ និងផ្ទះជិត ១៧០០ខ្នងផ្សេងទៀតរបើកដំបូល ដោយសារខ្យល់កន្ត្រាក់ ខណៈគោក្របីក៏បានងាប់ដោយសារគ្រោះធម្មជាតិរន្ទះបាញ់។ បញ្ហាគ្រោះមហន្តរាយដែលកើតមានឡើងជាបន្តបន្ទាប់នេះ បណ្ដាលមកពីការប្រែប្រួលអាកាសធាតុ និងការទទួលរងឥទ្ធិពលប្រែប្រួលអាកាសធាតុជាសកល និងប្រទេសជិតខាង៕