នៅរយៈពេលចុងក្រោយនេះ កូរ៉េខាងជើងជារដ្ឋកុម្មុយនីស្តផ្ដាច់ការបានបាញ់កាំជ្រួចអន្តរទ្វីបបង្អើលពិភពលោក ជាពិសេសបង្អើលអាមេរិក និងសម្ពន្ធមិត្តជាច្រើនគ្រាប់មកហើយ។ យ៉ាងតិចកាំជ្រួចចំនួន ៦គ្រាប់ត្រូវបានបាញ់តាំងពីលោក ចូ បៃដិន ចូលកាន់តំណែងប្រធានាធិបតីអាមេរិក នៅថ្ងៃទី២០ ខែមករា ឆ្នាំ២០២១។
បន្ថែមលើសពីនេះ រដ្ឋសន្តតិវង្សមួយនេះបានបង្កើនល្បឿនអភិវឌ្ឍកាំជ្រួចអន្តរទ្វីបថែមទៀត ដោយមិនខ្ចីគោរពតាមបម្រាមរបស់ក្រុមប្រឹក្សាសន្តិសុខអង្គការសហប្រជាជាតិ។
ជាថ្មីម្ដងទៀត ទីភ្នាក់ងារសារព័ត៌មានមជ្ឈិមកូរ៉េ (KCNA) របស់ប្រទេសអាស៊ីខាងកើតផ្ដាច់ការមួយនេះ បានរាយការណ៍កាលពីថ្ងៃអង្គារ ទី១២ តុលា ដោយស្រង់សម្ដីមេដឹកនាំ Kim Jong Un ដែលអះអាងថាការអភិវឌ្ឍអាវុធរបស់កូរ៉េខាងជើង គឺចាំបាច់នៅក្នុងស្ថានការណ៍ប្រឈមជាមួយនឹងគោលនយោបាយសត្រូវពីសំណាក់សហរដ្ឋអាមេរិក និងសម្ពន្ធមិត្ត។
តែបើតាមសេចក្ដីរាយការណ៍របស់ទីភ្នាក់ងារសារព័ត៌មាន Reuters វិញ គឺការអភិវឌ្ឍអាវុធរបស់កូរ៉េខាងជើង គឺជាការបង្កើនកម្លាំងអនុភាពយោធាសំដៅឱ្យគេមើលឃើញថា ប្រទេសផ្ដាច់ការមួយនេះមានអំណាចខ្លាំងជាងគេនៅអាស៊ីខាងកើត គឺផ្នែកយោធា និងសព្វាវុធទំនើបៗ។
លោក Kim Jong Un បានថ្លែងនៅក្នុងសុន្ទរកថាដូចនេះនៅឯពិព័រណ៍អភិវឌ្ឍន៍ផ្នែកការពារជាតិ កាលពីថ្ងៃចន្ទ ទី១១ តុលា។ ប៉ុន្តែលោក គីម អះអាងថា រដ្ឋាភិបាលទីក្រុងព្យុងយ៉ាង បង្កើនកម្លាំងទ័ព គឺគ្រាន់តែការពារខ្លួនប៉ុណ្ណោះ មិនមែនដើម្បីផ្ដើមសង្គ្រាមនោះទេ។
ការពិត មេដឹកនាំវ័យក្មេងរូបនេះបានអួតដូចនេះ ខណៈលោកកំពុងពិនិត្យមើលអាវុធជាច្រើនប្រភេទ រួមមានកាំជ្រួចអន្តរទ្វីប ICBM ដែលអាចបាញ់ដល់ទឹកដីអាមេរិក ជាពិសេសរដ្ឋហាវៃ។ ក្នុងការតាំងបង្ហាញអាវុធទំនើបនេះ គឺមានកាំជ្រួច Hwasong-16 ដែលជាកាំជ្រួច ICBM។ ICBM ជាកាំជ្រួចដែលត្រូវបានបង្ហាញនៅក្នុងក្បួនព្យុហយាត្រាយោធាពីឆ្នាំទៅមិញ។
តែយ៉ាងណា សេចក្ដីថ្លែងការណ៍របស់លោក Kim Jong Un ដែលទាក់ទាញច្រើន គឺនិយាយថាកូរ៉េខាងជើងមិនមានផែនការទៅរកសង្គ្រាមប្រឆាំងនឹងប្រទេសណាមួយនោះទេ តែលោកថាអាវុធទាំងនេះគឺដើម្បីប្រឆាំងអនុត្តរភាពរបស់ពួកចក្រព័ត្រ។
លោកថា សត្រូវចម្បងបំផុតរបស់ប្រទេសកូរ៉េខាងជើង គឺសង្គ្រាមគំរាមកំហែងពីសត្រូវជិតឆ្ងាយ។ ចាប់តាំងពីការពុះច្រៀកកូរ៉េជាពីរនៅឆ្នាំ១៩៥៣ ដោយសារសង្គ្រាមស៊ីវិល ឃើញថាកងទ័ពអាមេរិកនៅលើទឹកដីកូរ៉េខាងត្បូងមានជាង ៣ម៉ឺននាក់។ អាមេរិកបានដាក់ពង្រាយរួចហើយនូវកាំជ្រួចដើម្បីការពារកូរ៉េខាងត្បូងផង និងការពារមូលដ្ឋានកងទ័ពអាមេរិកផងដែរ៕