ប្រមុខរាជរដ្ឋាភិបាល លោក ហ៊ុន សែន អនុញ្ញាតឲ្យបើកដំណើរការគ្រឹះស្ថានអប់រំសាធារណៈ និងឯកជន រួមទាំងសេដ្ឋកិច្ច ពាណិជ្ជកម្មគ្រប់ប្រភេទឡើងវិញទាំងអស់ ចាប់ពីថ្ងៃទី១ ខែវិច្ឆិកា ឆ្នាំ២០២១ តទៅ ដោយមិនបិទសាលារៀន ផ្សារ រោងចក្រ និងកន្លែងផ្សេងៗទៀតទេ ទោះបីមានការឆ្លងក្នុងសាលារៀន ផ្សារ រោងចក្រ និងកន្លែងផ្សេងៗក៏ដោយ។
លោកនាយករដ្ឋមន្ត្រី ហ៊ុន សែន បានលើកឡើងក្នុងកិច្ចប្រជុំគណៈរដ្ឋមន្ត្រីនៃរដ្ឋាភិបាល នៅថ្ងៃទី២២ ខែតុលា ថា ការស្លាប់ដោយសារសេដ្ឋកិច្ច គឺជាការស្លាប់ដែលពិបាកជាងការស្លាប់ដោយសារជំងឺ Covid-19 ទៅទៀត ខណៈមន្ត្រីសង្គមស៊ីវិលសម្ដែងការព្រួយបារម្ភអំពីសុវត្ថិភាពកុមារថ្នាក់បឋមសិក្សា ដែលមិនទាន់ចេះការពារ និងរក្សាអនាម័យបានត្រឹមត្រូវ។
មេដឹកនាំកម្ពុជារូបនេះបញ្ជាក់ថា ការបើកឲ្យដំណើរការឡើងវិញនូវសកម្មភាពនានា ដោយសារតែកម្ពុជាបានគ្រប់គ្រងជំងឺ Covid-19 បានយ៉ាងល្អ ខណៈដំណើរការចាក់វ៉ាក់សាំងក៏ទទួលបានជោគជ័យថែមទៀត ប៉ុន្តែក្នុងករណីមានការឆ្លងក្នុងសាលារៀន ផ្សារ រោងចក្រ និងកន្លែងផ្សេងៗ ត្រូវតែយកអ្នកជំងឺដែលឆ្លងទៅព្យាបាលនៅមន្ទីរពេទ្យជាបន្ទាន់។
កាលពីអំឡុងខែមេសា ឆ្នាំ២០២១ អ្នកនាំពាក្យក្រសួងសុខាភិបាលកម្ពុជា អ្នកស្រី ឱ វណ្ណឌីន ធ្លាប់បានអះអាងថា បញ្ហាក្រពះជារឿងសំខាន់ហើយ ប៉ុន្តែសូមកុំភ្លេចពីបញ្ហាសួតផងដែរ ព្រោះថាប្រសិនបើគិតតែពីបញ្ហាក្រពះ ហើយមិនគិតពីបញ្ហាសួត នោះពិតជាមិនល្អសម្រាប់សុខភាពនោះទេ។
ទាក់ទងនឹងរឿងនេះ ក្រសួងអប់រំ យុវជន និងកីឡា បានចេញសេចក្តីណែនាំស្ដីអំពីការបង្រៀន និងរៀនជាបណ្ដុំសម្រាប់គ្រឹះស្ថានសិក្សាចំណេះទូទៅគ្រប់កម្រិត ទាំងសាធារណៈ ទាំងឯកជន ដែលនឹងចាប់អនុវត្តចាប់ពីថ្ងៃទី១ ខែវិច្ឆិកា ឆ្នាំ២០២១ ខាងមុខនេះតទៅទូទាំងប្រទេស ប៉ុន្តែត្រូវអនុវត្តវិធានការសុខាភិបាលឱ្យបានជាប់ជាប្រចាំ។
ក្រសួងបញ្ជាក់ថា ករណីរកឃើញការឆ្លងវីរុស Covid-19 នៅក្នុងក្រុមសិស្ស ឬក្នុងថ្នាក់រៀន មន្ទីរអប់រំ យុវជន និងកីឡាខេត្ត ត្រូវផ្អាកដំណើរការតែក្រុមសិស្ស ឬថ្នាក់រៀននោះតែប៉ុណ្ណោះ ប៉ុន្តែត្រូវយកអ្នកដែលពាក់ព័ន្ធទៅព្យាបាល និងធ្វើចត្តាឡីស័ករយៈពេល ១៤ថ្ងៃ ខណៈសាលារៀននៅតែបន្តដំណើរការបង្រៀន និងរៀនជាធម្មតា។
នាយកប្រតិបត្តិមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស ហៅកាត់ថា សង់ត្រាល់ លោក មឿន តុលា បានប្រាប់សារព័ត៌មាន The Cambodia Daily នៅថ្ងៃនេះថា សេដ្ឋកិច្ចពិតជាសំខាន់ណាស់សម្រាប់ប្រជាពលរដ្ឋ ដូច្នេះការទាមទារស្បៀងអាហាររបស់ប្រជាពលរដ្ឋក្នុងពេលបិទខ្ទប់ គឺដោយសារពួកគាត់ភ័យព្រួយដូចការលើកឡើងរបស់ប្រមុខរដ្ឋាភិបាលដែរ ដែលថាការស្លាប់ដោយសារសេដ្ឋកិច្ច គឺជាការស្លាប់ដែលពិបាកជាងការស្លាប់ដោយសារជំងឺ Covid-19 នៅពេលនេះយ៉ាងដូច្នេះដែរ។
លោកលើកឡើងថា ដោយឡែកវិធានការបើកគ្រឹះស្ថានសិក្សាឡើងវិញ រដ្ឋាភិបាលគួរតែធ្វើតាមដំណាក់ពីកម្រិតឧត្ដមសិក្សាបន្តចុះមកបឋមសិក្សាតាមដំណាក់កាល ដើម្បីធានាបាននូវការការពារជំងឺ Covid-19 ឱ្យបានត្រឹមត្រូវ ព្រោះថាថ្នាក់អនុវិទ្យាល័យ និងថ្នាក់បឋមសិក្សានៅមានកម្រិតនៃការថែរក្សាអនាម័យ និងការអនុវត្តវិធានការសុខាភិបាលទាបនៅឡើយ ដែលអាចបង្កហានិភ័យខ្ពស់ទៅថ្ងៃក្រោយ។
លោក មឿន តុលា អំពាវនាវឱ្យក្រសួងអប់រំ យុវជន និងកីឡា គួរតែណែនាំទៅគ្រឹះស្ថានទាំងអស់ឱ្យមានបរិក្ខារសុខាភិបាលត្រៀមបម្រុងឱ្យបានត្រឹមត្រូវ ឧបករណ៍លាងដៃ អាល់កុល ឬសាប៊ូ ការរក្សាគម្លាត ការពិនិត្យកម្តៅ និងការតាមដានសុខភាពរបស់សិស្សប្រចាំថ្ងៃ ដើម្បីទប់ស្កាត់ការចម្លងជាយថាហេតុណាមួយដែលអាចនាំឱ្យផ្ទុះក្នុងសហគមន៍ឡើងវិញ៕