លោកនាយករដ្ឋមន្ត្រី ហ៊ុន សែន ប្រកាសបើកឱ្យមានទេសចរណ៍វ៉ាក់សាំងលើកដំបូងនៅក្រុងព្រះសីហនុ ក្រុងកោះរ៉ុង នៃខេត្តព្រះសីហនុ និងនៅតំបន់ទេសចរណ៍តារាសាគរ នៃខេត្តកោះកុង ហើយនិងខេត្តផ្សេងៗទៀតដែលកំពុងត្រៀមខ្លួនបើកជាបន្តបន្ទាប់ ខណៈក្រុមអ្នកឃ្លាំមើលសាទរលើដំណើរការនេះ ប៉ុន្តែពួកគេថាកម្ពុជាត្រូវជំរុញវិស័យទេសចរណ៍នេះឱ្យបានច្រើនផ្នែក។
លោក ហ៊ុន សែន បានសរសេរនៅលើទំព័រ Facebook របស់ខ្លួនកាលពីថ្ងៃអង្គារ ទី២៦ តុលា ថា បន្ទាប់ពីរងនូវវិបត្តិជំងឺ Covid-19 ជាងពីរឆ្នាំមកនេះ ទីបំផុតកម្ពុជាសម្រេចប្រកាសបើកទទួលទេសចរអន្តរជាតិឡើងវិញហើយ ក្រោមទម្រង់ជាទេសចរណ៍វ៉ាក់សាំង។
លោក ហ៊ុន សែន អះអាងថា ការបើកទទួលទេសចរណ៍វ៉ាក់សាំងនេះ គឺចាប់ផ្ដើមដំបូងនៅក្រុងព្រះសីហនុ ក្រុងកោះរ៉ុង នៃខេត្តព្រះសីហនុ និងនៅតំបន់វិស្សមកាលតារាសាគរ នៃស្រុកបុទុមសាគរ ខេត្តកោះកុង ចាប់ពីថ្ងៃទី៣០ ខែវិច្ឆិកា ឆ្នាំ២០២១ ខាងមុខនេះតទៅ។
បុរសខ្លាំងនៅកម្ពុជារូបនេះបញ្ជាក់ថា ក្រោយពីបើកទេសចរណ៍វ៉ាក់សាំងនៅតំបន់ទេសចរណ៍ខាងលើនេះហើយ នឹងបន្តបើកទទួលនៅខេត្តសៀមរាប អំឡុងខែមករា ឆ្នាំ២០២២ ខាងមុខក្នុងក្របខ័ណ្ឌនៃកម្មវិធីទេសចរណ៍វ៉ាក់សាំង ដែលអនុញ្ញាតឱ្យភ្ញៀវទេសចរអន្តរជាតិស្នាក់នៅ និងទស្សនាក្នុងតំបន់ ឬគោលដៅទេសចរណ៍សុវត្ថិភាពរយៈពេល ៥ថ្ងៃ ដោយមិនតម្រូវឱ្យធ្វើចត្តាឡីស័កក្នុងសណ្ឋាគារឡើយ។
ការអះអាងនេះ ធ្វើឡើងក្រោយពេលកម្ពុជាបានត្រៀមបើកប្រទេសឡើងវិញកាលពីពាក់កណ្តាលខែតុលា ឆ្នាំ២០២១ កន្លងទៅនេះ ដែលនឹងតម្រូវឱ្យពលរដ្ឋរៀនរស់ជាមួយនឹង Covid-19 ផងដែរ។
ក្រសួងទេសចរណ៍កម្ពុជា ក៏បានចេញសេចក្តីជូនដំណឹងស្ដីពីការបើកទទួលទេសចរណ៍វ៉ាក់សាំងកាលពីថ្ងៃទី២៦ ខែតុលា ឆ្នាំ២០២១ កន្លងទៅថា ភ្ញៀវទេសចរដែលទៅកម្ពុជាក្នុងកម្មវិធីទេសចរណ៍វ៉ាក់សាំង នឹងតម្រូវឱ្យធ្វើតេស្ដរហ័សរកអង់ទីហ្សែន Covid-19 តែប៉ុណ្ណោះ នៅពេលពួកគេទៅដល់អាកាសយានដ្ឋានអន្តរជាតិភ្នំពេញភ្លាមៗ។
ប្រភពដដែលអះអាងថា ករណីភ្ញៀវទាំងនោះទទួលបានលទ្ធផលអវិជ្ជមាន ពួកគេអាចដើរកម្សាន្តដោយសេរីនៅក្នុងតំបន់ទេសចរណ៍សុវត្ថិភាពទាំងអស់។ បន្ថែមពីនេះ ភ្ញៀវទេសចរវ៉ាក់សាំងអាចស្នើសុំប្រភេទទិដ្ឋាការទេសចរណ៍តាមស្ថានទូត ឬស្ថានកុងស៊ុលរបស់កម្ពុជាប្រចាំនៅប្រទេសរបស់ពួកគេរៀងៗខ្លួនផងដែរ។
ក្រសួងទេសចរណ៍បញ្ជាក់ថា សម្រាប់ភ្ញៀវទេសចរទាំងអស់ត្រូវស្នើសុំលិខិតអនុញ្ញាតចូលកម្ពុជា ដោយភ្ជាប់វិញ្ញាបនបត្រចាក់វ៉ាក់សាំង Covid-19 កន្លែងស្នាក់នៅដែលបានកក់ទុកមុន លិខិតធានារ៉ាប់រងសុខភាព លិខិតធានារ៉ាប់រងការព្យាបាលជំងឺ Covid-19 សំបុត្រយន្តហោះ វិញ្ញាបនបត្របញ្ជាក់ថាគ្មានជំងឺ និងព័ត៌មានលម្អិតពីប្រវត្តិធ្វើដំណើរ ១៤ថ្ងៃ មុនពេលចូលទៅកម្ពុជាផងដែរ។
អ្នកស្រាវជ្រាវការអភិវឌ្ឍសង្គម បណ្ឌិត សេង សារី បានប្រាប់សារព័ត៌មាន The Cambodia Daily នៅថ្ងៃទី២៧ ខែតុលា នេះថា នេះគឺជាពេលវេលាសមរម្យបំផុតសម្រាប់កម្ពុជាក្នុងការបើកទទួលទេសចរឡើងវិញ ព្រោះថាកម្ពុជាអាចយល់ដឹងពីវិធីទប់ស្កាត់ ការពារ និងព្យាបាលចំពោះការឆ្លងនៃវីរុស Covid-19 បានគ្រប់គ្រាន់ហើយ ខណៈពលរដ្ឋខ្មែរភាគច្រើនក៏បានទទួលវ៉ាក់សាំងការពារជំងឺនេះដែរហើយនោះ។
លោកអះអាងថា ការបើកទទួលទេសចរបរទេសជារឿងល្អហើយ ប៉ុន្តែកម្ពុជាត្រូវជំរុញវិស័យនេះឱ្យខ្លាំងក្លា ដែលមិនត្រឹមតែផ្ដោតតែទៅលើទេសចរណ៍វប្បធម៌ប៉ុណ្ណោះទេ គឺត្រូវបើកឱ្យមានទេសចរណ៍ធម្មជាតិ ឬទេសចរណ៍កសិកម្ម ជាដើម ដើម្បីទាក់ទាញភ្ញៀវទេសចរទាំងបរទេស និងភ្ញៀវក្នុងស្រុកឱ្យងើបឡើងវិញ ដើម្បីបង្កើនចំណូលជាតិឱ្យកាន់តែខ្លាំងក្រោយវិបត្តិ Covid-19៕