រដ្ឋមន្ត្រីក្រសួងមហាផ្ទៃ បានចេញបទបញ្ជាភ្លាមៗដោយតម្រូវឱ្យប្រធានគណៈកម្មាធិការប្រឆាំងទារុណកម្មនៃក្រសួងមហាផ្ទៃ ចេញលិខិតព្រមានមន្ត្រីនគរបាលជាន់ខ្ពស់ ៤រូបទៅតាមវិន័យនគរបាល ក្រោយពីរកឃើញនូវបទល្មើសដែលពួកគេបានប្រើប្រាស់អំណាចលើសលប់ និងគំរាមកំហែងបាញ់សម្លាប់ដោយអនុវត្តផ្ទុយពីគោលការណ៍ និងបទដ្ឋាននានានៃកងកម្លាំងនគរបាល។
ប្រតិកម្មរបស់លោក ស ខេង នៅពេលនេះ ធ្វើឡើងក្រោយពីមានជម្លោះផ្ទៃក្នុងនៅក្នុងគណៈកម្មាធិការប្រឆាំងទារុណកម្មនៃក្រសួងមហាផ្ទៃ កាលពីខែមិថុនា ឆ្នាំ២០២០ រវាងមន្ត្រីនគរបាលជាន់ខ្ពស់ ៤រូបជាមួយនឹងលោក គង់ ឆាន ជាអតីតសមាជិកនៃគណៈកម្មាធិការប្រឆាំងទារុណកម្ម ហើយបច្ចុប្បន្នលោកជាទីប្រឹក្សាក្រសួងមហាផ្ទៃ។
លោក ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ បានចេញបញ្ជាកាលពីខែមីនា ឆ្នាំ២០២១ ទៅលោក នុត សាអាន ប្រធានគណៈកម្មាធិការប្រឆាំងទារុណកម្ម ឱ្យរៀបចំលិខិតព្រមានមន្ត្រីនគរបាលទាំង ៤រូប រួមមានលោកឧត្តមសេនីយ៍ទោ នុត សត្យា លោកវរសេនីយ៍ឯក ភោគ វឌ្ឍនា លោកវរសេនីយ៍ត្រី ភួន សុខនី ជាប្រធានការិយាល័យរបាយការណ៍ និងលោក អ៊ឹម ផល្លា ជាអនុប្រធានការិយាល័យទំនាក់ទំនងនៃក្រសួងមហាផ្ទៃ។
បើយោងតាមលិខិតរបស់លោក ស ខេង មន្ត្រីជាន់ខ្ពស់នៃក្រសួងមហាផ្ទៃពីររូប គឺលោក នុត សត្យា និងលោក ភោគ វឌ្ឍនា គឺជាមន្ត្រីដែលប្រើអំណាចខ្លាំងជាងគេរហូតគំរាមកំហែងប្រមាថជីវិតទៅលើគូទំនាស់ គឺលោក គង់ ឆាន ដែលជាថ្នាក់ដឹកនាំ និងជាអ្នកដាក់ផែនការឱ្យអនុវត្ត។
តាមរយៈកិច្ចអន្តរាគមន៍កាលពីខែមិថុនា ឆ្នាំ២០២០ របស់លោក គង់ ឆាន ជាអតីតសមាជិកនៃគណៈកម្មាធិការប្រឆាំងទារុណកម្ម ផ្ញើទៅលោក ស ខេង បញ្ជាក់ថា លោក នុត សត្យា មានអាកប្បកិរិយា និងសម្ដីសំដៅមិនសមរម្យទៅកាន់ថ្នាក់ដឹកនាំ និងមន្ត្រីក្រោមបង្គាប់។ ចំណែកលោក ភោគ វឌ្ឍនា វិញបានជេរប្រមាថ និងគំរាមប្រមាថអាយុជីវិតលោក នៅពេលអង្គភាពតម្រូវឱ្យពួកគេបំពេញការងារដែលស្ថាប័នដាក់ផែនការឱ្យអនុវត្ត។
បើតាមលិខិតរបស់លោក ស ខេង ដែលចេញកាលពីខែមីនា ឆ្នាំ២០២១ ផ្ញើទៅលោក នុត សាអាន ប្រធានគណៈកម្មាធិការប្រឆាំងទារុណកម្ម ហើយត្រូវបានគេផ្សព្វផ្សាយកាលពីថ្ងៃទី១ ខែវិច្ឆិកា ឆ្នាំ២០២១ បញ្ជាក់ថា ផ្អែកលើរបាយការណ៍អង្កេតស្រាវជ្រាវ ពិតជារកឃើញថា មន្ត្រីនគរបាលទាំង ៤រូប ជាពិសេសលោក នុត សត្យា និងលោក ភោគ វឌ្ឍនា បង្កជម្លោះ និងមិនស្ដាប់បង្គាប់ថ្នាក់ដឹកនាំ មានអាកប្បកិរិយាចចេសរឹងរូស និងប្រើអំណាចលើសលប់ ពេលដាក់ការងារឱ្យអនុវត្តពិតមែន។
មិនតែប៉ុណ្ណោះ លោក ស ខេង ក៏បញ្ជាឱ្យលោក នុត សាអាន ក្នុងតួនាទីជាប្រធាននៃគណៈកម្មាធិការប្រឆាំងទារុណកម្ម ត្រូវចេញលិខិតព្រមានទៅមន្ត្រីនៅក្នុងសំណុំរឿងនេះទៅតាមវិន័យនៃកងកម្លាំងនគរបាល៕