លោក ហ៊ុន សែន បានកាត់ដីក្នុងឧទ្យានជាតិបុទុមសាគរក្នុងខេត្តកោះកុង ទំហំជិត ៩ពាន់ហិកតារឱ្យទៅក្រុមហ៊ុន Royal Group របស់អ្នកឧកញ៉ា គិត ម៉េង ដើម្បីរៀបចំបង្កើតតំបន់សេដ្ឋកិច្ចពិសេស។
លោក ហ៊ុន សែន បានបញ្ជាឱ្យរដ្ឋមន្ត្រីក្រសួងបរិស្ថាន លោក សាយ សំអាល់ និងរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ន ព្រមទាំងរដ្ឋមន្ត្រីក្រសួងដែនដី នគរូបនីយកម្ម និងសំណង់ លោក ជា សុផារ៉ា និងគណៈកម្មាធិការគ្រប់គ្រងដីរដ្ឋខេត្តកោះកុង ត្រូវនាំគ្នាអនុវត្តតាមគោលការណ៍របស់រដ្ឋាភិបាលដាច់ខាត ក្នុងការបង្កើតតំបន់សេដ្ឋកិច្ចពិសេសនេះ។
ក្រុមអ្នកឃ្លាំមើលនិយាយថា ឧទ្យានជាតិនេះអាចនឹងត្រូវរលាយបាត់ពីខេត្តកោះកុង នៅថ្ងៃខាងមុខ បើរដ្ឋាភិបាលនៅតែបន្តសម្បទានឱ្យទៅក្រុមហ៊ុនឯកជនបន្តទៀតនោះ។
កាលពីថ្ងៃទី១៥ ខែកញ្ញា ឆ្នាំ២០២១ លោក ហ៊ុន សែន បានសម្រេចកាត់ផ្ទៃដីទំហំ ៨៦៣១ហិកតារស្ថិតនៅក្នុងឧទ្យានជាតិបុទុមសាគរ ក្នុងភូមិសាស្ត្រឃុំតានួន ស្រុកបុទុមសាគរ ខេត្តកោះកុង ឱ្យទៅក្រុមហ៊ុន Royal Group របស់អ្នកឧកញ៉ា គិត ម៉េង ដើម្បីបង្កើត និងអភិវឌ្ឍជាតំបន់សេដ្ឋកិច្ចពិសេស។
កន្លងមក លោក ហ៊ុន សែន ក៏ធ្លាប់បានសម្រេចកាត់ផ្ទៃដីទំហំជាង ១៦០ហិកតារក្នុងឧទ្យានជាតិបុទុមសាគរ ស្ថិតក្នុងភូមិថ្មស និងភូមិចម្លងគោ ឃុំថ្មស ស្រុកបុទុមសាគរ ខេត្តកោះកុង នេះផងដែរ ដើម្បីជួលឱ្យទៅក្រុមហ៊ុន Royal Group របស់អ្នកឧកញ៉ា គិត ម៉េង សម្រាប់បម្រើការក្នុងគម្រោងអភិវឌ្ឍន៍រោងចក្រអគ្គិសនីធ្យូងថ្មក្នុងរយៈពេល ៣៨ឆ្នាំ កាលពីដើមខែសីហា ឆ្នាំ២០២០ កន្លងទៅ។
ឧទ្យានជាតិបុទុមសាគរ ត្រូវបានបង្កើតឡើងដោយព្រះករុណាព្រះបាទ នរោត្តម សីហនុ កាលពីថ្ងៃទី០១ ខែវិច្ឆិកា ឆ្នាំ១៩៩៣ ដែលមានផ្ទៃដី ១៨ម៉ឺន ៣ពាន់ហិកតារ ជាតំបន់ធម្មជាតិ និងជាដែនជម្រកសត្វព្រៃ និងជាដែនជម្រកមច្ឆជាតិគ្រប់ប្រភេទស្ថិតក្នុងទឹកដីខេត្តកោះកុង ដែលមានព្រំប្រទល់ត្រឹមផ្លូវជាតិលេខ៤៨ ពីចំណុចឃុំអណ្ដូងទឹក រហូតទៅដល់ឃុំត្រពាំងរូង ក្រៅពីនោះគឺមានព្រំប្រទល់ជាប់មាត់សមុទ្រទាំងអស់។
អ្នកវិភាគនយោបាយ សង្គម និងជាអនុប្រធានក្រុមប្រឹក្សាភិបាលនៃចលនាពលរដ្ឋដើម្បីប្រជាធិបតេយ្យ (PMD) លោក គឹម សុខ បានប្រាប់សារព័ត៌មាន The Cambodia Daily នៅថ្ងៃទី៩ វិច្ឆិកា នេះថា អំណាចដែលលោក ហ៊ុន សែន ក្ដោបក្ដាប់ពេញដៃរហូតហ៊ានបំផ្លាញជាតិឱ្យហិនហោចព្រៃឈើ លុបបឹង លក់រ៉ែ ប្លន់ដីរាស្ត្រ រំលោភយកដីរដ្ឋ លក់កោះ ឆ្នេរសមុទ្រ និងសម្លាប់ទាំងប្រជាធិបតេយ្យរបស់កម្ពុជាដោយគ្មានកោតញញើតច្បាប់បែបនេះ ក៏មានចំណែកខុសរបស់មេបក្សប្រឆាំង លោក សម រង្ស៊ី ដែរ។
អ្នកវិភាគរូបនេះអះអាងថា ដោយសារតែចង់ឈ្នះគំនុំផ្ទាល់ខ្លួន មេបក្សប្រឆាំង លោក សម រង្ស៊ី សុខចិត្តជួយលោក ហ៊ុន សែន ធ្វើវិសោធនកម្មរដ្ឋធម្មនុញ្ញកែប្រែរូបមន្តបង្កើតរដ្ឋាភិបាលពី ២ភាគ៣ ទៅជា ៥០ភាគរយបូក១ ដែលជារូបមន្តបង្កើតគ្រឹះអំណាចឱ្យអតីតមេកម្មាភិបាលខ្មែរក្រហមរូបនេះវិលទៅរកការក្ដោបក្ដាប់អំណាចនៅកម្ពុជាសាជាថ្មី ក្នុងរូបភាពប្រជាធិបតេយ្យដូចសព្វថ្ងៃនេះ ហើយនៅទីបំផុត ទុក្ខសោកទាំងអស់បានធ្លាក់លើសង្គមជាតិខ្មែរទាំងមូល។
លោក គឹម សុខ បញ្ជាក់ថា ទោះជាយ៉ាងណាក៏ដោយ លោក ហ៊ុន សែន នឹងមិនអាចបន្តកាន់កាប់អំណាចកុម្មុយនីស្តក្នុងរូបភាពប្រជាធិបតេយ្យបានរហូតទេ ប្រសិនបើពួកអ្នកនយោបាយប្រជាធិបតេយ្យនិយមនាំគ្នារៀបចំផែនការយុទ្ធសាស្ត្រច្បាស់លាស់នៅលើសមរភូមិនយោបាយកម្ពុជា ដើម្បីផ្លាស់ប្ដូរការដឹកនាំនយោបាយបំផ្លាញជាតិបច្ចុប្បន្ននេះ ប៉ុន្តែមិនមែនជាយុទ្ធសាស្ត្រស្រែកពីចម្ងាយដូចក្រុមប្រឆាំងធ្វើរាល់ថ្ងៃនេះឡើយ៕