ក្រុមប្រឹក្សាសន្តិសុខនៃអង្គការសហប្រជាជាតិ សម្ដែងការព្រួយបារម្ភយ៉ាងខ្លាំងជុំវិញអំពើហិង្សាដែលកំពុងកើនឡើងនៅទូទាំងប្រទេសភូមា ខណៈប្រទេសគ្រប់គ្រងដោយរបបសឹកមួយនេះធ្លាក់ក្នុងសង្គ្រាមស៊ីវិលយ៉ាងធ្ងន់ធ្ងរ។
ទីភ្នាក់ងារព័ត៌មាន Reuters ដែលបានធ្វើសេចក្ដីរាយការណ៍នៅថ្ងៃព្រហស្បតិ៍ ទី១១ ខែវិច្ឆិកា នេះ បានឱ្យដឹងថា សេចក្ដីថ្លែងការណ៍រួមរបស់ក្រុមប្រឹក្សាសន្តិសុខ ធ្វើឡើងបន្ទាប់ពីក្រុមប្រឹក្សានេះទទួលបានរបាយការណ៍របស់ក្រុមប្រឹក្សាសិទ្ធិមនុស្សអង្គការសហប្រជាជាតិ អំពីហិង្សានៅក្នុងប្រទេសភូមា កាន់តែធ្ងន់ធ្ងរឡើង ដោយបណ្ដាលឱ្យមានជនភៀសខ្លួនកើនឡើង ២៣ម៉ឺននាក់ចាប់តាំងពីប្រទេសសមាជិកអាស៊ានមួយនេះធ្លាក់ក្នុងរបបសឹកនៅថ្ងៃរដ្ឋប្រហារ ទី១ កុម្ភៈ កន្លងមកនេះ។
របាយការណ៍របស់ក្រុមប្រឹក្សាសិទ្ធិមនុស្ស បានឱ្យដឹងថា មនុស្សស្លាប់ដោយសារពួកយោធាបាញ់សម្លាប់កើនឡើងជាង ១៣០០នាក់ និងចាប់ខ្លួនជិត ១ម៉ឺននាក់ ហើយហិង្សាដែលផ្ទុះខ្លាំងនៅរដ្ឋឈិន និងរដ្ឋអារ៉ាកាន ដោយសារការវាយប្រហារខ្លាំងក្លាពីសំណាក់កងទ័ពតាតម៉ាដាវ នៃរបបសឹកភូមា ទៅលើភូមិរបស់អ្នកស្រុក។
នៅក្នុងសេចក្តីថ្លែងការណ៍ដ៏កម្រមួយដែលបានឯកភាពដោយសមាជិកទាំង ១៥ប្រទេស បានជំរុញឱ្យគ្រប់ភាគីនៅក្នុងប្រទេសភូមា ត្រូវបិទបញ្ចប់ការប្រយុទ្ធជាបន្ទាន់ ហើយពួកយោធាតាម៉ាដាវ ត្រូវអនុវត្តការអត់ធ្មត់ជាអតិបរមា។
បើតាមក្រុមប្រឹក្សាសន្តិសុខ គឺសមាជិកទាំងអស់នៃក្រុមប្រឹក្សានេះបានពិនិត្យមើលរបាយការណ៍នានាអំពីការដាក់ពង្រាយកងកម្លាំងយោធា និងសព្វាវុធធុនធ្ងន់នៅក្នុងរដ្ឋឈិន និងរដ្ឋអារ៉ាកាន ដើម្បីត្រៀមកម្ទេចកងជីវពល ឬកងកម្លាំងការពារប្រជាជន ដែលត្រូវបានបង្កើតឡើងក្រោយរដ្ឋាភិបាលអ្នកស្រី អ៊ុងសាន ស៊ូជី ត្រូវបានពួកយោធាធ្វើរដ្ឋប្រហារទម្លាក់ចេញពីអំណាចកាលពីថ្ងៃទី០១ ខែកុម្ភៈ។
សេចក្តីថ្លែងការណ៍រួមរបស់ក្រុមប្រឹក្សាសន្តិសុខ ធ្វើក្នុងកិច្ចប្រជុំកាលពីថ្ងៃពុធ ទី១០ វិច្ឆិកា បានបញ្ជាក់ថា សមាជិកនៃក្រុមប្រឹក្សាសន្តិសុខពិតជាមានការព្រួយបារម្ភយ៉ាងជ្រាលជ្រៅចំពោះអំពើហិង្សាដែលកំពុងកើតឡើង និងអាចកើនឡើងថែមទៀតនៅទូទាំងប្រទេសភូមា។ ក្នុងន័យនេះ ក្រុមប្រឹក្សាសន្តិសុខបានទទូចឲ្យបញ្ឈប់អំពើហិង្សាជាបន្ទាន់ និងធានាសុវត្ថិភាពដល់ជនស៊ីវិល។
រហូតមកទល់នឹងពេលនេះ របបសឹកភូមានៅមិនទាន់ឃើញបកស្រាយនៅឡើយជុំវិញស្ថានការណ៍នៅក្នុងរដ្ឋ Chin និងរដ្ឋអារ៉ាកាន ដែលត្រូវបានគេមើលឃើញថាកំពុងធ្លាក់ក្នុងអំពើហិង្សា និងរំលោភសិទ្ធិមនុស្សធ្ងន់ធ្ងរ។
ក្រៅពីការអំពាវនាវឲ្យបិទបញ្ចប់អំពើហិង្សា ក្រុមប្រឹក្សាសន្តិសុខក៏បានជំរុញបន្ថែមទៀតឱ្យគ្រប់ភាគីរៀបចំកិច្ចសន្ទនា និងផ្សះផ្សាគ្នាឡើងវិញ ដើម្បីជាផលប្រយោជន៍នៃប្រជាជនភូមា។
នៅមុនមួយថ្ងៃនៃកិច្ចប្រជុំនៃក្រុមប្រឹក្សាសន្តិសុខអង្គការសហប្រជាជាតិ លោករដ្ឋមន្ត្រីការបរទេសអាមេរិក Antony Blinken អំពាវនាវឱ្យរបបយោធាឆ្ពោះទៅរកលទ្ធិប្រជាធិបតេយ្យពិតប្រាកដ និងរួមបញ្ចូលគ្នាឡើងវិញ។ លោកថ្លែងដូច្នេះនៅចំខួបមួយឆ្នាំនៃជ័យជម្នះការបោះឆ្នោតសភារបស់គណបក្សសម្ព័ន្ធជាតិដើម្បីលទ្ធិប្រជាធិបតេយ្យ (NLD) ដែលលទ្ធផលនេះត្រូវបានពួកយោធាប្លន់ទៅហើយ។
គណបក្សសម្ព័ន្ធជាតិដើម្បីលទ្ធិប្រជាធិបតេយ្យ បានឈ្នះអាសនៈសភាចំនួន ៣៩៦ នៃអាសនៈចំនួន ៤៩៨ នៅក្នុងការបោះឆ្នោតកាលពីថ្ងៃទី៨ ខែវិច្ឆិកា ឆ្នាំ២០២០ ដោយឈ្នះគណបក្សសហភាព និងសាមគ្គីភាព គាំទ្រដោយយោធា ក្នុងការបោះឆ្នោតឡើងវិញតាមប្រជាធិបតេយ្យជាលើកទីពីរ បន្ទាប់ពីយោធាយល់ព្រមឱ្យមានការដឹកនាំតាមបែបប្រជាធិបតេយ្យ។
លោករដ្ឋមន្ត្រី Blinken បានបញ្ជាក់នៅក្នុងសេចក្តីថ្លែងការណ៍ថា រដ្ឋប្រហារថ្ងៃទី១ ខែកុម្ភៈ និងការបង្ក្រាបដោយហិង្សាជាបន្តបន្ទាប់ បានធ្វើឱ្យប៉ះពាល់សិទ្ធិមនុស្ស និងសេរីភាពជាមូលដ្ឋានរបស់ប្រជាជន។ លោក Blinken បាននិយាយថា សហរដ្ឋអាមេរិកផ្តល់កិត្តិយសដល់ប្រជាជនភូមា ដែលខិតខំតស៊ូស្ដារលទ្ធិប្រជាធិបតេយ្យ ការគោរពសិទ្ធិមនុស្ស និងនីតិរដ្ឋក្នុងប្រទេសនេះឡើងវិញ។
យ៉ាងណា នេះគឺជាលើកដំបូងហើយដែលក្រុមប្រឹក្សាសន្តិសុខនៃអង្គការសហប្រជាជាតិ បានចេញសេចក្ដីថ្លែងការណ៍ដ៏ពិសេសរបស់ខ្លួន ដោយពុំមានការជំទាស់ពីប្រទេសចិន និងរុស្ស៊ី ដែលតែងតែប្រើសិទ្ធិវេតូករណីការចេញសេចក្ដីថ្លែងការណ៍ប្រឆាំងរបបសឹកភូមា៕