សភាជាតិប្រទេសថៃ នៅថ្ងៃពុធ ទី១៧ ខែវិច្ឆិកា នេះ បានច្រានចោលសេចក្ដីព្រាងច្បាប់ថ្មីមួយដែលមានគោលដៅលុបបំបាត់ចោលកេរដំណែលរបស់ក្រុមរដ្ឋប្រហារ ឆ្នាំ២០១៤ ដែលផ្ដល់សិទ្ធិឲ្យពួកយោធាពាក់ព័ន្ធក្នុងវិស័យនយោបាយ។
ចំពោះសេចក្ដីព្រាងច្បាប់របស់សកម្មជនប្រជាធិបតេយ្យ គឺសំដៅលុបបំបាត់អំណាច និងតួនាទីរបស់យោធាថៃ នៅក្នុងឆាកនយោបាយ។
បណ្ដាញផ្សាយព័ត៌មាន BNN Bloomberg បានចុះផ្សាយនៅថ្ងៃពុធ ទី១៧ ខែវិច្ឆិកា នេះថា ការច្រានចោលសេចក្ដីព្រាងច្បាប់របស់ក្រុមប្រឆាំង ធ្វើឡើងនៅក្នុងសម័យប្រជុំរួមមួយរបស់សភាជាន់ទាប និងព្រឹទ្ធសភាថៃ ដែលបានបោះឆ្នោតជំទាស់នឹងសេចក្ដីព្រាងច្បាប់នេះក្នុងសំឡេងជំទាស់ ៤៧៣ ទល់នឹង ២០៦សំឡេងគាំទ្រ និងអនុប្បវាទ ៦សំឡេង។
សេចក្ដីព្រាងច្បាប់នេះ មានគោលដៅលុបបំបាត់អំណាច និងតួនាទីរបស់យោធាថៃ នៅក្នុងឆាកនយោបាយ តាមរយៈការធ្វើវិសោធនកម្មរដ្ឋធម្មនុញ្ញដែលត្រូវបានអនុម័តនៅក្រោមការដឹកនាំនៃរបបរដ្ឋប្រហារកាលពីឆ្នាំ២០១៧។ សេចក្ដីព្រាងច្បាប់ថ្មីនេះដែលទទួលបានការគាំទ្រពីអ្នកដាក់ញត្តិចំនួន ១៥ម៉ឺននាក់ ក៏មានបំណងលុបចោលអាសនៈសមាជិកព្រឹទ្ធសភាតែងតាំងដោយយោធាថៃ ចំនួន ២៥០រូបផងដែរ។
នេះជាលើកទីពីរហើយដែលសេចក្ដីព្រាងច្បាប់របស់ក្រុមប្រឆាំង ត្រូវបានទាត់ចោលដោយសមាជិកសភាបក្សកាន់អំណាច និងព្រឹទ្ធសភាលើកបន្តុប។
សេចក្ដីព្រាងច្បាប់លើកដំបូងរបស់ក្រុមប្រឆាំង បានស្នើឲ្យមានការកែទម្រង់អំណាចរបស់ព្រះរាជា និងក្រុមប្រឹក្សារាជបល្ល័ង្គ ក៏ត្រូវបានទាត់ចោលដែរ។
តាមរយៈសំឡេងឆ្នោតនៅក្នុងសភាទាំងនេះ ឃើញថាកម្លាំងប្រឆាំងនៅថៃ ចំនួន ៦បក្សរួបរួមគ្នាពុំមានការបែកបាក់នោះទេ ហើយក្រុមសភារដ្ឋាភិបាលចម្រុះ ១៩គណបក្ស ក៏មិនបានចុះខ្សោយដែរ។ តែអ្វីដែលសំខាន់ ព្រឹទ្ធសភា ២៥០រូប គឺជាកម្លាំងដ៏ធំមួយគាំទ្រលោកនាយករដ្ឋមន្ត្រី បា្រយុទ្ធ ចាន់អូចា និងក្រុមបក្សកាន់អំណាច។
ក្រុមបាតុករ និងបក្សប្រឆាំង កំពុងតែគាបសង្កត់ឱ្យបញ្ចប់អាណត្តិព្រឹទ្ធសភា ដែលជាឧបករណ៍នយោបាយរបស់ពួកយោធា។
នៅក្នុងព្រឹត្តិការណ៍បាតុកម្មដ៏ធំមួយកាលពីថ្ងៃអាទិត្យ កន្លងទៅនេះ ក្រុមបាតុករបានទាមទារឲ្យមានការកែទម្រង់របបរាជានិយម ដោយកំណត់ច្បាស់លាស់អ្វីទៅជារបបរាជានិយមអាស្រ័យរដ្ឋធម្មនុញ្ញ និងប្រជាធិបតេយ្យ សេរី ពហុបក្ស។ ពួកបាតុករក៏បានទាមទារថា អំណាចរបស់ពួកយោធាកើតចេញពីព្រឹទ្ធសភាដែលមិនឆ្លងកាត់ការបោះឆ្នោតរបស់ប្រជាជន ដែលបាតុករថាត្រូវលុបចោលស្ថាប័នមួយនេះ។
ក្រៅពីនេះ បាតុករទាមទារឱ្យលោក ប្រាយុទ្ធ ចុះចេញពីតំណែង ដោយចោទថាអតីតមេរដ្ឋប្រហារឆ្នាំ២០១៤ តោងអំណាចបានជាថ្មីម្ដងទៀតដោយសារពួកព្រឹទ្ធសភា ២៥០រូបនេះជាអ្នកបោះឆ្នោតគាំទ្រ៕