ខណៈយុទ្ធនាការឃោសនាបោះឆ្នោតប្រធានាធិបតីហ្វីលីពីន កំពុងតែប្រព្រឹត្តទៅ គេសង្កេតឃើញបេក្ខជនជាច្រើនបានកំណត់គោលនយោបាយសំខាន់ៗ ដើម្បីទទួលបានការគាំទ្រពីប្រជាជនរបស់ប្រទេសនេះ។
បេក្ខជនខ្លះផ្ដោតសំខាន់លើបញ្ហាស្ដារសេដ្ឋកិច្ចឡើងវិញ។ បេក្ខជនខ្លះសន្យាបោសសម្អាតអំពើអយុត្តិធម៌ និងអំពើពុករលួយ។ តែសម្រាប់អ្នកស្រី Leni Robredo ចាប់ផ្ដើមផ្ដោតលើជម្លោះដែនសមុទ្រជាមួយនឹងប្រទេសចិន។ បើទោះជាបច្ចុប្បន្ន អ្នកស្រី Leni Robredo ជាអនុប្រធានាធិបតីពិតមែន តែអ្នកស្រីគឺជាអនុប្រធានាធិបតីមកពីបក្សប្រឆាំង។ អ្នកស្រីមិនគាំទ្រគោលនយោបាយរបស់លោកប្រធានាធិបតី រ៉ូឌ្រីហ្គោ ឌូទើតេ (Rodrigo Duterte) ដែលមានភាពទោរទន់ទៅរកចិន នោះគឺករណីជម្លោះដែនសមុទ្រជាមួយប្រទេសធំនេះ។
បណ្ដាញផ្សាយព័ត៌មាន ABS និង CBN News បានចុះផ្សាយនូវសេចក្ដីរាយការណ៍នៅថ្ងៃព្រហស្បតិ៍ ទី១៨ វិច្ឆិកា នេះថា អ្នកស្រី Leni Robredo បានបើកពិភាក្សាជាមួយឧត្តមសេនីយ៍ហ្វីលីពីនចូលនិវត្តន៍ គឺរយៈពេលពីរថ្ងៃបន្ទាប់មកនេះអំពីនាវាចិនដែលបានបាញ់កាំភ្លើងបាញ់ទឹកទៅលើនាវាហ្វីលីពីន នៅសមុទ្រហ្វីលីពីនខាងលិច។
បេក្ខជនប្រធានាធិបតី អ្នកស្រី Robredo បាននិយាយនៅក្នុងសេចក្តីថ្លែងការណ៍ថា បើយោងតាមទស្សនៈរបស់ឧត្តមសេនីយ៍ទាំងនេះ និងអ្នកយុទ្ធសាស្ត្រ គឺពួកគាត់ទទួលស្គាល់ចំពោះការគំរាមកំហែងពីសំណាក់កងទ័ពចិន មកលើដែនអធិបតេយ្យរបស់ហ្វីលីពីន ឃើញថាមានការវិវឌ្ឍកាន់តែធ្ងន់ និងស្មុគស្មាញ ដែលចាំបាច់ត្រូវរកយុទ្ធវិធី និងវិធីសាស្ត្រប្រកបដោយការទទួលខុសត្រូវដ៏ទូលំទូលាយ ដើម្បីការពារសន្តិសុខជាតិ។
នៅក្នុងកិច្ចពិភាក្សាអំពីសន្តិសុខជាតិ ក៏មានព្រឹទ្ធសមាជិក Kiko Pangilinan ដែលជាបេក្ខជនប្រជែងរបស់អ្នកស្រី Robredo នៅក្នុងការបោះឆ្នោតឆ្នាំ២០២២ ក៏បានចូលរួមប្រជុំផងដែរ។
ចំពោះបញ្ហាជម្លោះដែនទឹកជាមួយប្រទេសចិន ទីប្រឹក្សាសន្តិសុខជាតិ Hermogenes Esperon បានបញ្ជាក់ថា នាវាឆ្មាំសមុទ្រចិន កាលពីថ្ងៃអង្គារ ទី១៦ ខែវិច្ឆិកា បានរារាំង និងប្រើកាណុងបាញ់ទឹករាំងខ្ទប់នាវាផ្គត់ផ្គង់ស្បៀងរបស់ហ្វីលីពីន ដែលកំពុងដឹកជញ្ជូនស្បៀងទៅឱ្យបុគ្គលិកយោធាដែលមានមូលដ្ឋាននៅ Ayungin Shoal។
ចំណែកអ្នកស្រី Robredo បាននិយាយថា ការព្យាបាទរបស់ចិនមកលើហ្វីលីពីន ត្រូវតែបញ្ឈប់ ដែលអ្នកស្រីអះអាងថា សមុទ្រហ្វីលីពីនខាងលិច គឺជាដែនអធិបតេយ្យហ្វីលីពីន គឺដូចតុលាការមជ្ឈត្តការអន្តរជាតិបានសម្រេចកាលពីខែកក្កដា ឆ្នាំ២០១៦ ដោយផ្ដល់សិទ្ធិឱ្យហ្វីលីពីនកាន់កាប់តំបន់នោះ។
សេចក្តីសម្រេចរបស់តុលាការដែលគាំទ្រដោយអង្គការសហប្រជាជាតិមួយ បានធ្វើឱ្យចិនជំទាស់ ដែលក្រុងប៉េកាំងប្រកាសថា សាលដីកានេះពុំមានអំណាចបង្ខំឱ្យចិនអនុវត្តតាមនោះទេ។
ទីក្រុងម៉ានីល បានតវ៉ាផ្នែកការទូត និងថ្កោលទោសជាខ្លាំងចំពោះសកម្មភាពរបស់នាវាចិន ដែលបានឃារឃាំងនាវាដឹកស្បៀងរបស់ហ្វីលីពីន។
អ្នកស្រី Robredo ដែលជាបេក្ខជនតំណែងប្រធានាធិបតីនៅក្នុងការបោះឆ្នោតឆ្នាំ២០២២ បាននិយាយថា ពេលវេលាដែលត្រូវរៀបចំផែនការគោលនយោបាយ និងយុទ្ធសាស្ត្រសន្តិសុខជាតិហ្វីលីពីនទាក់ទងនឹងជម្លោះដែនសមុទ្រ និងទឹកដីរបស់ខ្លួនជាមួយប្រទេសចិន ត្រូវតែមានភាពរឹងមាំ និងច្បាស់លាស់ ក្នុងការអនុវត្តប្រកបដោយនិរន្តរភាព ដោយមិនគិតអំពីការផ្លាស់ប្ដូររដ្ឋការរបស់មេដឹកនាំឡើយ។
តាមអ្នកស្រី ការចុះសម្រុងគ្នាក្នុងផែនការសន្តិសុខជាតិ និងផែនការអភិវឌ្ឍន៍សេដ្ឋកិច្ចមានសារសំខាន់ គឺត្រូវដើរទន្ទឹមគ្នា។ តាមអ្នកស្រី Robredo ឧត្តមសេនីយ៍ដែលមានវត្តមានចូលរួមប្រជុំជាមួយអ្នកស្រី អំពីសន្តិសុខជាតិ និងការរិះរកយុទ្ធសាស្ត្របញ្ចប់ការឈ្លានពានពីសំណាក់ប្រទេសចិន មកលើដែនទឹករបស់ហ្វីលីពីន មានចំនួន ៧រូប គឺពួកគាត់បានផ្ដល់យោបល់ឱ្យមានយុទ្ធសាស្ត្រសន្តិសុខជាតិរឹងមាំប្រឆាំងនឹងចិន។
ស្ត្រីអនុប្រធានាធិបតីដែលជាអ្នករិះគន់ឥតសំចៃចំពោះគោលនយោបាយរបស់ប្រធានាធិបតី រ៉ូឌ្រីហ្គោ ឌូទើតេ ក្នុងការទុកចោលសាលដីការបស់តុលាការអន្តរជាតិ បែរជាសំដៅពង្រឹងទំនាក់ទំនងមិត្តភាពជាមួយទីក្រុងប៉េកាំង បាននិយាយថា បញ្ហាសមុទ្រហ្វីលីពីនខាងលិច គឺមិនអាចចរចាជាមួយចិនម្ដងទៀតឡើយ។
អ្នកស្រី Robredo បាននិយាយថា ប្រសិនបើអ្នកស្រីជាប់ឆ្នោតជាប្រធានាធិបតីនៅឆ្នាំ២០២២ អ្នកស្រីនឹងបើកចំហក្នុងការធ្វើការជាមួយប្រទេសចិន ប៉ុន្តែឈរលើគោលការណ៍ស្មើភាព និងឯករាជ្យ។ ប៉ុន្តែនៅពេលនិយាយអំពីសមុទ្រហ្វីលីពីនខាងលិច អ្នកស្រីថាមិនអាចដោះស្រាយជាមួយចិន ដោយគ្មានការទទួលស្គាល់ពីការសម្រេចចិត្តរបស់អាជ្ញាកណ្ដាលនៃមជ្ឈត្តការអន្តរជាតិឡើយ។
អ្នកស្រី Robredo សង្កត់ធ្ងន់ថា ចំពោះកិច្ចការពាណិជ្ជកម្មជាមួយចិន នឹងមិនមានបញ្ហាឡើយ ប៉ុន្តែទីក្រុងប៉េកាំង ត្រូវតែទទួលយកការសម្រេចរបស់មជ្ឈត្តការអន្តរជាតិ ដែលស្ត្រីបេក្ខជនប្រធានាធិបតីហ្វីលីពីនរូបនេះគិតថា ទំនាក់ទំនងពាណិជ្ជកម្មទ្វេភាគី នឹងកាន់តែមានសន្ទុះខ្លាំងឡើង៕