គណបក្សបេះដូងជាតិ ប្រតិកម្មជាថ្មីទៀតដោយចាត់ទុកការទាត់ចោលសំណើសុំចុះបញ្ជីគណបក្សរបស់ខ្លួន ថាជារូបភាពថ្មីទៀតនៃការគំរាមកំហែងផ្នែកនយោបាយប្រឆាំងអ្នកប្រជាធិបតេយ្យ។
នេះជាប្រតិកម្មផ្លូវការជាលើកដំបូងរបស់ខ្លួនចាប់តាំងពីក្រសួងមហាផ្ទៃ បានបដិសេធសំណើ និងស្នើឱ្យកែតម្រូវលក្ខន្តិកៈគណបក្សនយោបាយថ្មោងថ្មីនេះជាបន្តបន្ទាប់ក្នុងពេលកន្លងទៅ។
លោក សៀម ភ្លុក បានចេញលិខិតចំហនៅថ្ងៃទី២២ ខែវិច្ឆិកា នេះដោយចាត់ទុកថា ខ្លួនពិតជាមិនអាចទទួលយកបានឡើយចំពោះការចោទប្រកាន់របស់ក្រសួងមហាផ្ទៃ មកលើគណបក្សបេះដូងជាតិ។ ម្យ៉ាងវិញទៀត ការសំអាងហេតុថា ស្នាមមេដៃមានភាពមិនប្រក្រតី គឺគ្រាន់តែជាលេសក្នុងចេតនានយោបាយបំភិតបំភ័យ គំរាមកំហែង និងបំបាក់ស្មារតីប្រជាពលរដ្ឋ ដែលមានទស្សនៈនយោបាយផ្សេងពីគណបក្សកាន់អំណាចប៉ុណ្ណោះ។ គណបក្សបេះដូងជាតិ ព្រមានប្តឹងទៅតុលាការកំពូលប្រឆាំងការសម្រេចរបស់ក្រសួងមហាផ្ទៃនេះទៅតាមនីតិវិធីច្បាប់។
ក្រសួងមហាផ្ទៃ កាលពីថ្ងៃទី១៦ ខែវិច្ឆិកា ថ្មីៗនេះឲ្យដឹងថា ខ្លួនសម្រេចបដិសេធការសុំចុះបញ្ជីជាផ្លូវការរបស់ «គណបក្សបេះដូងជាតិ»។ ការសម្រេចនេះ ត្រូវបានក្រសួងមហាផ្ទៃ លើកឡើងថា «គណបក្សបេះដូងជាតិ» មានចេតនាទុច្ចរិត តាមរយៈអនុញ្ញាតឱ្យមានអ្នកផ្ដិតស្នាមមេដៃជំនួស ការក្លែងបន្លំអត្តសញ្ញាណបុគ្គល និងការផ្ដិតមេដៃធ្វើឱ្យខូចគុណភាព ដើម្បីបង្កើនចំនួនសមាជិកជាដើម។
ក្រសួងមហាផ្ទៃ ថាខ្លឹមសារនៃប្រការមួយចំនួននៃលក្ខន្តិកៈរបស់គណបក្សនេះទៀតសោត គឺផ្ទុយទៅនឹងបទបញ្ញត្តិនៃច្បាប់ស្ដីពីគណបក្សនយោបាយផងដែរ។ មិនតែប៉ុណ្ណោះ មានស្នាមមេដៃជាច្រើនរបស់អ្នកគាំទ្រ ត្រូវបានរកឃើញថាមានភាពមិនត្រឹមត្រូវ និងលួចក្លែងបន្លំ។
បើទោះជាបែបណា នៅថ្ងៃចន្ទ ទី២២ វិច្ឆិកា នេះ គណបក្សបេះដូងជាតិ បញ្ជាក់នៅក្នុងលិខិតផ្លូវការរបស់ខ្លួនថា ការរកឃើញមានស្នាមមេដៃខុសប្រក្រតីដោយក្រសួងមហាផ្ទៃនោះ វាគ្រាន់តែជារឿងនយោបាយប៉ុណ្ណោះ។
អ្នកវិភាគសង្គម និងនយោបាយ លើកឡើងថា មូលហេតុសំខាន់ដែលក្រសួងមហាផ្ទៃបដិសេធចុះបញ្ជីឱ្យគណបក្សបេះដូងជាតិ នេះ គឺពុំមែនព្រោះតែកំហុសបច្ចេកទេសទេ។ ផ្ទុយទៅវិញ បញ្ហានេះមានការសង្ស័យថា គណបក្សបេះដូងជាតិ គឺមានលោក សម រង្ស៊ី ជាតួអង្គសំខាន់ដែលស្ថិតនៅពីក្រោយនៃការបង្កើតគណបក្សមួយនេះ៕