រដ្ឋសភាឯកបក្សរបស់បក្សកាន់អំណាច លោក ហ៊ុន សែន បានបោះឆ្នោតអនុម័តជ្រើសតាំងលោក ជាម យៀប ជាអនុប្រធានទី១នៃរដ្ឋសភាជាផ្លូវការហើយនៅថ្ងៃព្រហស្បតិ៍ ទី២៥ វិច្ឆិកា។
សមាជិកសភាដែលមកពីគណបក្សកាន់អំណាចរបស់លោក ហ៊ុន សែន ចំនួន ១០៧នាក់ បានបើកកិច្ចប្រជុំពេញអង្គលើកទី៦ នៅថ្ងៃទី២៥ ខែវិច្ឆិកា ឆ្នាំ២០២១ បានសម្រេចជាឯកច្ឆន្ទបោះឆ្នោតជ្រើសតាំងលោក ជាម យៀប ដែលកំពុងកាន់តំណែងជាប្រធានគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្មនៃរដ្ឋសភា ជាអនុប្រធានទី១នៃរដ្ឋសភាជាតិហើយនៅពេលនេះ។
រដ្ឋសភាឯកបក្សនៃគណបក្សប្រជាជនកម្ពុជា ក៏បានបោះឆ្នោតជ្រើសតាំងលោក ឈាង វុន ជាសមាជិកគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្មនៃរដ្ឋសភា លោក ជៀប ស៊ីវន ជាសមាជិកគណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាននៃរដ្ឋសភា និងការសម្រេចផ្ដល់សុពលភាពដល់លោក អ៊ុន ប៊ុនហាន ជាតំណាងរាស្ត្រមណ្ឌលខេត្តកំពង់ធំ ជំនួសលោក ងួន ញ៉ិល ផងដែរ។
ការអនុម័តរបស់រដ្ឋសភាកម្ពុជានេះ ធ្វើឡើងដើម្បីឱ្យស្ថាប័ននីតិប្បញ្ញត្តិរបស់ខ្លួនបំពេញលក្ខខណ្ឌផ្លូវច្បាប់ក្នុងការរៀបចំឱ្យមានដំណើរការត្រឹមត្រូវ ក្រោយពីអវត្តមានអនុប្រធានទី១នៃស្ថាប័ននេះមួយរយៈពេលកន្លងទៅនោះ។
លោក ជាម យៀប គឺជាសមាជិកគណៈអចិន្ត្រៃយ៍របស់គណបក្សកាន់អំណាច ហើយបច្ចុប្បន្ននេះលោកមានតួនាទីជាប្រធានគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្មនៃរដ្ឋសភា និងជាតំណាងរាស្ត្រខេត្តព្រៃវែង របស់បក្សកាន់អំណាចតាំងពីឆ្នាំ១៩៩៣ មកផងដែរ ខណៈតួនាទីជាអនុប្រធានទី១នៃរដ្ឋសភាកម្ពុជានៅពេលនេះ គឺជាតំណែងបន្ថែមពីលើតំណែងដែលលោកមានស្រាប់ក្នុងបក្សកាន់អំណាចកន្លងមក។
ក្រុមអ្នកឃ្លាំមើលលើកឡើងថា មន្ត្រីបក្សកាន់អំណាចដែលកំពុងកាន់អំណាចក្នុងស្ថាប័នធំៗនៅកម្ពុជាសព្វថ្ងៃនេះ មិនបានគិតគូរពីផលប្រយោជន៍របស់ពលរដ្ឋទេ គឺគិតតែប្រព្រឹត្តអំពើពុករលួយ និងចងបណ្ដាញបក្ខពួកដើម្បីជំរុញឱ្យសាច់ញាតិខ្លួនឯងឡើងកាន់តំណែងធំៗក្នុងជួរមន្ត្រីរាជការតែប៉ុណ្ណោះ។
ក្នុងនោះ គេរកឃើញថា កូនប្រុសលោក ជាម យៀប កំពុងកាន់តួនាទីជាអភិបាលខេត្តត្បូងឃ្មុំ គឺលោក ជាម ច័ន្ទសោភ័ណ្ឌ និងកូនប្រសាម្នាក់ទៀតមានតំណែងជារដ្ឋលេខាធិការក្រសួងយុត្តិធម៌ គឺលោក គឹម សន្តិភាព ដោយឡែកកូនប្រសារបស់លោកម្នាក់ផ្សេងទៀតមានតំណែងជាប្រធានក្រុមហ៊ុន លី ឈួន ដែលតែងតែទទួលបានសិទ្ធិម៉ៅការសំណង់ស្ទើរគ្រប់អគាររដ្ឋ រួមទាំងអគាររដ្ឋសភាផងដែរ។ ជាងនេះទៅទៀត គេក៏រកឃើញពីការប្រព្រឹត្តអំពើពុករលួយរបស់លោក ជាម យៀប យ៉ាងច្រើនសន្ធឹកសន្ធាប់ក្នុងស្ថាប័នរដ្ឋាភិបាលឯកបក្សដែលដឹកនាំដោយគណបក្សកាន់អំណាចសព្វថ្ងៃនេះថែមទៀតផង។
សកម្មជនបក្សប្រឆាំង លោក ហ៊ុន កុសល បានប្រាប់សារព័ត៌មាន The Cambodia Daily នៅថ្ងៃទី២៥ វិច្ឆិកា នេះថា ការជ្រើសរើសលោក ជាម យៀប មកធ្វើជាអនុប្រធានទី១រដ្ឋសភានេះ គឺគ្រាន់តែជាការជ្រើសរើសបុគ្គលស័ក្ដិសមម្នាក់របស់គណបក្សកាន់អំណាច មកកាន់តំណែងនេះតែប៉ុណ្ណោះ ប៉ុន្តែមិនមែនជាការកែទម្រង់ស្ថាប័ននីតិប្បញ្ញត្តិដើម្បីឆ្លើយតបនឹងតម្រូវការចាំបាច់របស់ជាតិ និងតម្រូវការចាំបាច់របស់ពលរដ្ឋនោះទេ។
លោក ហ៊ុន កុសល អះអាងថា រដ្ឋសភាជាតិនៅពេលបច្ចុប្បន្ននេះមិនមែនជារដ្ឋសភាដែលកើតចេញពីការបោះឆ្នោតតាមបែបលទ្ធិប្រជាធិបតេយ្យពិតប្រាកដនោះឡើយ ដូច្នេះស្ថាប័នជាតិមួយនេះមានតួនាទីរង់ចាំតែធ្វើច្បាប់តាមការចង់បានរបស់បក្សកាន់អំណាច ដើម្បីបង្កើនសម្ពាធដល់និន្នាការប្រឆាំង និងជួយបិទបាំងទង្វើអាក្រក់បក្សកាន់អំណាចតែប៉ុណ្ណោះ។
មកទល់នឹងម៉ោងផ្សាយនេះ សារព័ត៌មាន The Cambodia Daily មិនអាចទាក់ទងលោក ជាម យៀប ដើម្បីសុំការអត្ថាធិប្បាយជុំវិញការជ្រើសរើសឱ្យកាន់តំណែងជាប្រធានទី១នៃរដ្ឋសភាឯកបក្សរបស់លោក ហ៊ុន សែន នេះបាននៅឡើយទេ៕