មន្ត្រីជាន់ខ្ពស់គណបក្សក្រៅរដ្ឋាភិបាលមួយ អំពាវនាវឱ្យពលរដ្ឋនៅទូទាំងប្រទេស រួមគ្នាឆ្ពោះទៅរកការបង្កើតរដ្ឋាភិបាលមួយដែលដឹកនាំតាមលទ្ធិប្រជាធិបតេយ្យពិតប្រាកដ ខុសពីការដឹកនាំរបស់បក្សកាន់អំណាចបច្ចុប្បន្ន។
ប្រធានគណបក្សខ្មែរស្រឡាញ់ជាតិ លោក ជីវ កត្តា បានប្ដេជ្ញាក្នុងពិធីសន្និបាតចលនាយុវជនទូទាំងប្រទេសរបស់ខ្លួននៅទីស្នាក់ការកណ្តាលគណបក្សក្នុងទីក្រុងភ្នំពេញ កាលពីថ្ងៃអាទិត្យ ទី២៨ វិច្ឆិកា ថា គណបក្សរបស់លោកនឹងដឹកនាំយុវជន និងពលរដ្ឋឆ្ពោះទៅរកការផ្លាស់ប្ដូរមួយជាវិជ្ជមាន ដើម្បីដណ្តើមកៅអីសមាជិកក្រុមប្រឹក្សាឃុំ-សង្កាត់ឱ្យប្រជាពលរដ្ឋ។
លោក ជីវ កត្តា បញ្ជាក់ថា ចលនាយុវជនគឺជាឆ្អឹងខ្នងដ៏សំខាន់ក្នុងការដឹកនាំ និងបន្តវេនដើម្បីផ្លាស់ប្ដូរការអភិវឌ្ឍសង្គមជាតិ ដូច្នេះគណបក្សខ្មែរស្រឡាញ់ជាតិ បានរៀបចំគោលនយោបាយរបស់ខ្លួន ដែលផ្តល់ឱកាសដល់យុវជនក្នុងការចូលរួមជីវភាពនយោបាយគ្រប់លំដាប់ថ្នាក់ទាំងអស់ ទាំងនៅថ្នាក់ជាតិ និងថ្នាក់មូលដ្ឋាន ដើម្បីដឹកនាំ កសាង និងបម្រើប្រជាពលរដ្ឋដែលម្ចាស់ឆ្នោតឱ្យបានទូលំទូលាយ។
កាលពីថ្ងៃទី២៨ ខែវិច្ឆិកា ឆ្នាំ២០២១ គណបក្សខ្មែរស្រឡាញ់ជាតិ បានរៀបចំសន្និបាតយុវជនទូទាំងប្រទេស ដែលមកពីខេត្តបាត់ដំបង ខេត្តកណ្តាល និងខេត្តឧត្តរមានជ័យ ជាដើម ប្រមាណជិត ៥០០នាក់ ស្ថិតនៅទីស្នាក់ការកណ្តាលគណបក្សក្នុងទីក្រុងភ្នំពេញ ដើម្បីបណ្តុះបណ្តាលយុវជនទាំងនោះក្នុងការផ្សព្វផ្សាយគោលនយោបាយរបស់ខ្លួននៅមូលដ្ឋាន មុនការបោះឆ្នោតឃុំ-សង្កាត់មកដល់។
អគ្គហេរញ្ញិកគណបក្សខ្មែរស្រឡាញ់ជាតិ លោក សៀវ វិសុទ្ធ បានប្រាប់សារព័ត៌មាន The Cambodia Daily នៅថ្ងៃទី២៩ វិច្ឆិកា ថា ក្រុមរបស់លោកបានត្រៀមខ្លួនរួចជាស្រេច ទាំងគោលនយោបាយក្នុងការអភិវឌ្ឍប្រទេសជាតិ ជាពិសេសការអភិវឌ្ឍនៅមូលដ្ឋានដែលគណបក្សបានរៀបចំបេក្ខជនក្រុមប្រឹក្សាឃុំ-សង្កាត់ពោរពេញដោយសមត្ថភាព ដើម្បីដឹកនាំកសាងប្រទេសជូនពលរដ្ឋ៕