នៅរយៈពេលចុងក្រោយនេះ ប្រតិភូបរទេសកាន់តែមានចំនួនច្រើនឡើងបានទៅធ្វើទស្សនកិច្ចនៅកោះតៃវ៉ាន់ គឺជាការបង្ហាញអំពីការលើកទឹកចិត្តកាន់តែខ្លាំងដល់រដ្ឋាភិបាលដែនដីកោះនៅអាស៊ីប៉ាស៊ីហ្វិកខាងកើតមួយនេះ ដែលកំពុងស្ថិតក្រោមសម្ពាធ និងសកម្មភាពយោធារបស់ចិន ដែលមានផែនការលើកទ័ពចូលកាន់កាប់កោះតៃវ៉ាន់យកមកនៅក្រោមដំបូលរបស់បក្សកុម្មុយនីស្តចិន។
ដោយមើលឃើញថាតៃវ៉ាន់ ដែលជាដែនដីប្រជាធិបតេយ្យមួយរឹងមាំហ៊ានប្រឈមមុខនឹងសម្ពាធពីសំណាក់កងទ័ពមហាយក្សចិន សហគមន៍អន្តរជាតិ ភាគច្រើនជាប្រទេសប្រជាធិបតេយ្យ បានពង្រីកចំណងការទូត និងសហប្រតិបត្តិការទ្វេភាគី និងពហុភាគីកាន់តែកើនឡើង ទោះជាក្រុងប៉េកាំងថ្កោលទោសប្រទេសទាំងនោះក៏ដោយ។
ជាក់ស្ដែង សមាជិកសភាអាមេរិកបានមកធ្វើទស្សនកិច្ចដល់ទីពីរដងនៅលើដែនកោះមួយនេះ ហើយជាបន្តបន្ទាប់ក៏មានទស្សនកិច្ចនៃមន្ត្រីជាន់ខ្ពស់ទាំងមន្ត្រីរដ្ឋាភិបាល និងរដ្ឋសភា រហូតមានប្រធានាធិបតីទៀតផង។
ជាការកត់សម្គាល់ ប្រទេសនៅអឺរ៉ុប មានសន្ទុះខ្លាំងជាងគេ ជាពិសេសប្រទេសនៅតំបន់សមុទ្របាល់ទិចនៃអឺរ៉ុបខាងកើត និងប្រតិភូសភាអឺរ៉ុប។ អ្នកស្រី សាយ អ៊ឹងវិន ដែលជាប្រធានាធិបតីកោះតៃវ៉ាន់ បានសម្ដែងមោទកភាពចំពោះរដ្ឋាភិបាលរបស់អ្នកស្រី ជាពិសេសដែនកោះតៃវ៉ាន់ដែលអ្នកស្រីអះអាងថា ដោយសារតែតៃវ៉ាន់ប្រកាន់ភ្ជាប់នូវលទ្ធិប្រជាធិបតេយ្យ ទើបប្រទេសនៅអឺរ៉ុបកាន់តែច្រើននាំគ្នាគាំទ្រប្រជាធិបតេយ្យនៅលើដែនកោះនេះ ហើយសកម្មភាពការទូតនេះ គឺជាការប្រកាន់ជំហររបស់ប្រទេសទាំងនោះប្រឆាំងនឹងលទ្ធិកុម្មុយនីស្តនៃរដ្ឋាភិបាលក្រុងប៉េកាំង។ អ្នកស្រីប្រកាសទទួលស្វាគមន៍ទាំងអស់នូវការមកធ្វើទស្សនកិច្ចរបស់ប្រតិភូ ទាំងប្រតិភូសភា និងរដ្ឋាភិបាល។
ប្រតិភូសភាអឺរ៉ុប ដែលបានធ្វើទស្សនកិច្ចនៅកោះតៃវ៉ាន់ កាលពីថ្ងៃព្រហស្បតិ៍សប្ដាហ៍មកនេះ បាននិយាយថា លទ្ធិប្រជាធិបតេយ្យរបស់តៃវ៉ាន់ ប្រៀបដូចកំណប់ទ្រព្យមួយដែលត្រូវរួមគ្នាជួយការពារ។ ពួកគេសន្យាថា នឹងគាំទ្ររដ្ឋាភិបាលដែនកោះនេះទប់ទល់នឹងសម្ពាធរបស់ទីក្រុងប៉េកាំង។ នេះបើតាមទីភ្នាក់ងារព័ត៌មាន AFP។
ប្រធានាធិបតីតៃវ៉ាន់ អ្នកស្រី សាយ អ៊ឹងវិន (Tsai Ing-wen) បាននិយាយថា តៃវ៉ាន់ និងទ្វីបអឺរ៉ុប ត្រូវតែធ្វើការជាមួយគ្នាដើម្បីទប់ទល់នឹងលទ្ធិផ្ដាច់ការនិយមនៅក្នុងតំបន់អាស៊ីប៉ាស៊ីហ្វិក។
រដ្ឋាភិបាលចិន បានបង្កើនសម្ពាធយោធា និងការទូតលើរដ្ឋាភិបាលតៃវ៉ាន់ ដើម្បីឲ្យតៃវ៉ាន់ឯកភាពតាមខ្លួនដែលថា តៃវ៉ាន់គឺជាដែនដីរបស់ខ្លួន និងដើម្បីដាក់កំហិតលើការចូលរួមរបស់តៃវ៉ាន់នៅលើឆាកអន្តរជាតិ។
ទោះជាយ៉ាងណា អ្នកស្រី សាយ អ៊ឹងវិន បាននិយាយប្រាប់សមាជិកសភាប្រទេសតំបន់សមុទ្របាល់ទិច ថា តៃវ៉ាន់នឹងមិនខ្លបខ្លាចការគំរាមកំហែងនេះទេ ហើយតៃវ៉ាន់នឹងការពារសេរីភាព និងលទ្ធិប្រជាធិបតេយ្យរបស់ខ្លួនជានិច្ច។
អ្នកស្រី សាយ អ៊ឹងវិន បានប្រាប់សមាជិកសភាទាំងនោះទៀតថា តៃវ៉ាន់ និងប្រទេសទាំង៣ នេះ មានបទពិសោធន៍ប្រហាក់ប្រហែលគ្នានៃការរំដោះខ្លួនចេញពីការគ្រប់គ្រងបែបផ្ដាច់ការ និងការតស៊ូប្រយុទ្ធដើម្បីសេរីភាព៕