លោក ហ៊ុន សែន បានប្រាប់ទៅពលរដ្ឋកុំស្លន់ស្លោ និងភ័យខ្លាចចំពោះជំងឺ Covid-19 បំប្លែងថ្មីឈ្មោះ អូមីក្រុង ដោយថាជំងឺនេះមិនទាន់បង្កភាពមហន្តរាយ និងសម្លាប់មនុស្សនៅឡើយទេ។
ការអះអាងរបស់លោក ហ៊ុន សែន គឺផ្ទុយពីអង្គការសុខភាពពិភពលោក ដែលកំពុងបង្ហាញក្ដីបារម្ភពីវីរុស Covid-19 បំប្លែងខ្លួនថ្មីប្រភេទ អូមីក្រុង ទោះបីជំងឺប្រភេទថ្មីនេះនៅមិនទាន់ធ្វើឲ្យអ្នកឆ្លងស្លាប់ក៏ដោយ។
ក្នុងពិធីដាក់សម្ពោធឱ្យប្រើប្រាស់សណ្ឋាគារ ហាយ៉ាត់ រីជិនស៊ី ភ្នំពេញ នៅថ្ងៃពុធ ទី១៥ ធ្នូ នេះ លោក ហ៊ុន សែន អះអាងថា លោកមិនសប្បាយចិត្តចំពោះការប្រកាសអាសន្នរបស់អ្នកនាំពាក្យអង្គការសុខភាពពិភពលោក និងប្រទេសខ្លះ ដោយហាក់ដូចជាជំងឺ Covid-19 អូមីក្រុង ជាជំងឺមហន្តរាយខ្ពស់ បើទោះបីនៅទ្វីបអាហ្វ្រិក ដែលរកឃើញករណីជំងឺនេះមុនគេ មិនទាន់មានអ្នកស្លាប់នៅឡើយនោះ។
លោកបន្តថា កម្ពុជាកំពុងរៀបចំបើកទទួលភ្ញៀវទេសចរបរទេស និងរៀបចំហេដ្ឋារចនាសម្ព័ន្ធឡើងវិញ ខណៈភ្ញៀវទេសចរបរទេសមកលេងកម្ពុជា មិនតម្រូវឱ្យធ្វើចត្តាឡីស័ក ដែលបង្កភាពងាយស្រួលមួយកម្រិតទៀតដល់ភ្ញៀវទេសចរ។ លោកលើកឡើងថា ករណីនេះ បានធ្វើឱ្យលោកអន់ចិត្ត ព្រោះជំងឺ Covid-19 អូមីក្រុង មិនទាន់សម្លាប់មនុស្សច្រើនទេ ប៉ុន្តែហេតុអ្វីបានជានាំគ្នាភ័យស្លន់ស្លោខ្លាំងបែបនេះ។
លោក ហ៊ុន សែន ក៏បានប្រាប់ទៅពលរដ្ឋកុំឱ្យភ័យស្លន់ស្លោជ្រុលពេក ដោយលោកថា ជំងឺអូមីក្រុង មិនទាន់សម្លាប់មនុស្សច្រើនដូចជំងឺ Covid-19 ប្រភេទ Delta និងអាល់ហ្វា នោះទេ ខណៈកម្ពុជាទើបរកឃើញជំងឺ Covid-19 អូមីក្រុង តែមួយករណីប៉ុណ្ណោះ។
ទាក់ទងនឹងករណីឆ្លងរាលដាលនៃជំងឺ Covid-19 នេះ លោក ហ៊ុន សែន ជាបុរសដើរបញ្ច្រាសទិសក៏ធ្លាប់ប្រាប់ពលរដ្ឋខ្មែរកុំឱ្យខ្លាចជំងឺ Covid-19 និងបានព្រមានដេញអ្នកសារព័ត៌មានចេញ បើសិនពួកគេពាក់ម៉ាស់ចូលរួមក្នុងសន្និសីទរបស់លោកកាលអំឡុងដើមឆ្នាំ២០២០ ខណៈជំងឺ Covid-19 កាលពីពេលនោះ កំពុងឆ្លងរីករាលដាលនៅតាមបណ្ដាប្រទេសផ្សេងៗនោះ។
បច្ចុប្បន្ន ក្រសួងសុខាភិបាលកម្ពុជា បានប្រកាសរកឃើញអ្នកឆ្លង និងស្លាប់ដោយជំងឺ Covid-19 បានថយចុះជាបន្តបន្ទាប់ចាប់តាំងពីក្រសួងឈប់ធ្វើតេស្ដតាមឧបករណ៍តេស្ដរហ័ស ដោយមកធ្វើតេស្ដម៉ាស៊ីន CPR វិញ។
គិតត្រឹមថ្ងៃទី១៥ ខែធ្នូ ឆ្នាំ២០២១ កម្ពុជារកឃើញអ្នកឆ្លងជំងឺ Covid-19 ចំនួនជាង ១២ម៉ឺននាក់ (១២០៣៩០នាក់) ក្នុងនោះករណីនាំចូលពីក្រៅប្រទេសចំនួនជិត ២ម៉ឺននាក់ (១៩៨៥៣នាក់) ខណៈអ្នកជំងឺព្យាបាលជាសះស្បើយចំនួនជាង ១១ម៉ឺន ៦ពាន់នាក់ (១១៦៧៤៦នាក់) ចំណែកឯអ្នកស្លាប់ចំនួនសរុបជិត ៣ពាន់នាក់ (២៩៩៥នាក់)៕