មេដឹកនាំដែលក្រាញអំណាចយូរជាងគេនៅកម្ពុជា លោក ហ៊ុន សែន គំរាមថា ក្រុមណាក៏ដោយដែលប៉ះពាល់ដល់រដ្ឋធម្មនុញ្ញដែលជាច្បាប់កំពូលរបស់ជាតិ កងកម្លាំងប្រដាប់អាវុធមានតួនាទីចាំបាច់ត្រូវតែកម្ទេចក្រុមនោះចោលជាបន្ទាន់ មិនអាចពន្យារពេលដាច់ខាត។
បុរសខ្លាំងរបស់កម្ពុជា លោក ហ៊ុន សែន បានព្រមានធ្ងន់ៗក្នុងពិធីសម្ពោធអគាររដ្ឋបាល និងសាលប្រជុំទីស្ដីការក្រសួងការពារជាតិ នៅថ្ងៃទី២៩ ខែធ្នូ ឆ្នាំ២០២១ ថា នរណាក៏ដោយដែលហ៊ានរំលោភបំពានរដ្ឋធម្មនុញ្ញតាមគ្រប់រូបភាព ដូចជាការធ្វើបដិវត្តពណ៌តាមរយៈការធ្វើរដ្ឋប្រហារ ជាដើម កម្លាំងប្រដាប់អាវុធត្រូវតែកម្ទេចចោលដោយគ្មានករណីលើកលែងនោះឡើយ។
លោក ហ៊ុន សែន បញ្ជាក់ថា រដ្ឋធម្មនុញ្ញរបស់កម្ពុជាបានចែងយ៉ាងច្បាស់ថា នាយករដ្ឋមន្ត្រីមានសិទ្ធិពេញលេញក្នុងការបញ្ជាកងទ័ព ដូច្នេះបើរូបលោកនៅតែកាន់កាប់តំណែងជានាយករដ្ឋមន្ត្រី លោកនៅតែមានអំណាចស្របច្បាប់ដើម្បីបញ្ជាកងកម្លាំងប្រដាប់អាវុធ ជាពិសេសបញ្ជាឱ្យកម្ទេចអ្នកដែលរំលោភរដ្ឋធម្មនុញ្ញគ្រប់វិធីទាំងអស់។
ការលើកឡើងរបស់លោក ហ៊ុន សែន ហាក់មិនឆ្លើយតបទៅនឹងស្ថានការណ៍ជាក់ស្តែងនៅកម្ពុជានោះទេ ត្បិតរដ្ឋធម្មនុញ្ញរបស់កម្ពុជាត្រូវគេមើលឃើញថា អ្នកដែលមានអំណាចរំលោភគ្រប់បែបយ៉ាងនោះ គឺមានតែមេដឹកនាំបក្សកាន់អំណាចតែមួយគត់នាពេលកន្លងមក។
ប្រធានក្រុមប្រឹក្សាភិបាលនៃចលនាពលរដ្ឋដើម្បីប្រជាធិបតេយ្យ លោក ម៉ែន ណាត បានប្រាប់សារព័ត៌មាន The Cambodia Daily នៅថ្ងៃទី២៩ ធ្នូ នេះថា ការគំរាមរបស់មេដឹកនាំបក្សកាន់អំណាច លោក ហ៊ុន សែន ពីការរំលោភរដ្ឋធម្មនុញ្ញនៅថ្ងៃនេះ មិនមែនសំដៅដល់បក្សប្រឆាំងនោះទេ ប៉ុន្តែជាការគំរាមផ្ទៃក្នុងបក្សរបស់គាត់តែម្តង ព្រោះគាត់ខ្លាចផ្ទៃក្នុងគណបក្សប្រជាជនកម្ពុជាប្រើវិធីណាមួយដើម្បីរារាំងបេក្ខភាពនាយករដ្ឋមន្ត្រីអនាគត ដែលជាកូនប្រុសឡើងតាមជើងខោរបស់គាត់នោះ។
លោក ម៉ែន ណាត បញ្ជាក់ថា ដើម្បីលើកស្ទួយកូនខ្លួនឯងឱ្យកាន់កាប់អំណាចបន្តពីខ្លួន លោក ហ៊ុន សែន បានគំរាមផ្ទៃក្នុងបក្សខ្លួនឯងផង អញ្ជើញមេដឹកនាំវៀតណាម ទៅទទួលទានអាហារនៅផ្ទះខ្លួនឯងផង ប៉ុន្តែការគំរាមអ្នកដទៃបែបនេះ គឺកំពុងតែរុញច្រានកូនរបស់គាត់ គឺលោក ហ៊ុន ម៉ាណែត ឱ្យធ្លាក់ជ្រោះនយោបាយរបស់គាត់កាន់តែជ្រៅប៉ុណ្ណោះ។
លោកបញ្ជាក់ថា អ្នកដែលមិនពេញចិត្តនូវការគំរាមនេះ មិនមែនអ្នកខាងក្រៅបក្សកាន់អំណាចនោះទេ គឺសមាជិកក្នុងបក្សរបស់គាត់ផ្ទាល់តែម្តង ដូច្នេះការគំរាមនេះជាសញ្ញាបង្ហាញឱ្យឃើញផងដែរថា បេក្ខភាពជានាយករដ្ឋមន្ត្រីអនាគតរបស់លោក ហ៊ុន ម៉ាណែត នៅមានការគាំទ្រតិចតួចនៅឡើយប៉ុណ្ណោះ ដែលធ្វើឱ្យលោក ហ៊ុន សែន ចេញមកគំរាមច្រើនលើកច្រើនសាបែបនេះ។
ប្រធានក្រុមប្រឹក្សាភិបាលនៃចលនាពលរដ្ឋដើម្បីប្រជាធិបតេយ្យរូបនេះអះអាងថា ការយកធម្មនុញ្ញមកសង្កត់អ្នកដទៃ ដើម្បីឱ្យគាំទ្រកូនខ្លួនឯងបែបនេះ គឺជាការរំលោភរដ្ឋធម្មនុញ្ញយ៉ាងធ្ងន់ធ្ងរទៅវិញ។ ជាងនេះទៀត អ្នកដែលរំលោភរដ្ឋធម្មនុញ្ញកន្លងមក ក៏គ្មាននរណាផ្សេងក្រៅពីលោក ហ៊ុន សែន ខ្លួនឯងផ្ទាល់តែម្តង ហើយជាការរំលោភអចិន្ត្រៃយ៍ថែមទៀត។
ជុំវិញបញ្ហានេះ ក្រុមអ្នកឃ្លាំមើលសង្គមអះអាងថា រដ្ឋធម្មនុញ្ញកម្ពុជាត្រូវបានបក្សកាន់អំណាចរបស់លោក ហ៊ុន សែន រំលោភបំពានជាញឹកញាប់តាំងពីឆ្នាំ១៩៩៤ មក ក្នុងនោះឆ្នាំ២០០៥ លោក ហ៊ុន សែន បានរំលោភរដ្ឋធម្មនុញ្ញយ៉ាងធ្ងន់ធ្ងរដោយការកែប្រែមាត្រា២ ដែលបានចែងពីការប្រើប្រាស់ផែនទីបោនខ្នាត ១/១០០.០០០ ទៅជាផែនទីខុសច្បាប់ថ្មីខ្នាត ១/២៥.០០០ តាមការចង់បានរបស់វៀតណាម។
បន្ថែមពីនេះ មាត្រា៥៥ នៃរដ្ឋធម្មនុញ្ញដែលបានចែងពីការលុបកិច្ចព្រមព្រៀងខុសច្បាប់នានាជាមួយបរទេសជិតខាង ក៏ត្រូវលោក ហ៊ុន សែន រំលោភបំពានថែមទៀត ដោយការបង្កើតសន្ធិសញ្ញាបំពេញបន្ថែមឆ្នាំ២០០៥ ដើម្បីធានាសុពលភាពកិច្ចព្រមព្រៀងខុសច្បាប់នានាដែលគាត់បានចុះហត្ថលេខាកាត់ទឹកដីឱ្យប្រទេសវៀតណាម តាំងពីអំឡុងទសវត្សឆ្នាំ៨០ មក។
រដ្ឋធម្មនុញ្ញកម្ពុជា ត្រូវបានរំលោភបំពានដើម្បីកែប្រែខ្លឹមសារដើមនូវមាត្រាមួយចំនួនជាច្រើនលើកច្រើនសាដោយគណបក្សកាន់អំណាចរបស់លោក ហ៊ុន សែន ដើម្បីឱ្យបុរសខ្លាំងនៅកម្ពុជារូបនេះអាចក្តោបក្តាប់អំណាចបានពេញដៃ និងបន្តអំណាចនេះទៅកូនខ្លួនឯងថែមទៀត៕