រដ្ឋមន្ត្រីក្រសួងមហាផ្ទៃ លោក ស ខេង សម្ដែងក្ដីបារម្ភចំពោះអនាគតអ្នកស្នងតំណែងប្រទេសជាតិ ដោយសារតែកុមារអាយុក្រោម ១៨ឆ្នាំជាច្រើនត្រូវបានសមត្ថកិច្ចចាប់ឃុំខ្លួនដោយជាប់ពាក់ព័ន្ធនឹងគ្រឿងញៀន។
ការបារម្ភនេះ ធ្វើឡើងស្របពេលដែលសមត្ថកិច្ចបង្ក្រាប និងរឹបអូសគ្រឿងញៀនបានជាង ២តោន ដោយគិតត្រឹមខែធ្នូ ឆ្នាំ២០២១ នេះ។
ថ្លែងក្នុងពិធីសម្ពោធដាក់ឱ្យប្រើប្រាស់មណ្ឌលនីតិសម្បទានៅខេត្តកណ្ដាល កាលពីថ្ងៃទី២៨ ខែធ្នូ ឆ្នាំ២០២១ រដ្ឋមន្ត្រីក្រសួងមហាផ្ទៃ លោក ស ខេង បានសម្ដែងការព្រួយបារម្ភចំពោះស្ថានភាពកុមារកម្ពុជាដែលកាន់តែមានចំនួនច្រើនឡើងកំពុងពាក់ព័ន្ធជាមួយគ្រឿងញៀន។ បញ្ហានេះ លោកថាជាការព្រួយបារម្ភណាស់ទាក់ទងនឹងទំពាំងស្នងឫស្សី ប្រសិនបើទំពាំងវាពុកតាំងពីពេលនេះទៅហើយនោះ វាជាបញ្ហាទៅអនាគតសម្រាប់ប្រទេសជាតិ។
លោក ស ខេង បានចាត់ទុកបញ្ហាគ្រឿងញៀនជាជំងឺរ៉ាំរ៉ៃធំរបស់សង្គមកម្ពុជា ដោយសារតែបច្ចុប្បន្ន ការផលិត ចែកចាយ និងជួញដូរកំពុងមានទម្រង់ធំឡើងៗ និងខ្លាំងជាងមុនទៅទៀត។ លោកបន្តថា ក្នុងខែធ្នូ ពេញមួយខែនេះ សមត្ថកិច្ចបានបង្ក្រាបគ្រឿងញៀនប្រមាណជាង ២តោន ដែលជាករណីមិនធម្មតាឡើយ។ លើសនេះ លោកថាគ្រឿងញៀនសព្វថ្ងៃនេះកំពុងតែបំផ្លាញមនុស្ស ដោយបច្ចុប្បន្នមិនទាន់មានថ្នាំព្យាបាលនោះទេ។
នៅក្នុងពិធីនោះ លោក ស ខេង ក៏បានបង្ហាញរបាយការណ៍ថា ចំនួនអនីតិជនដែលកំពុងជាប់ពន្ធនាគារនៅទូទាំងប្រទេសជាង ១ពាន់នាក់ (១៤២២នាក់) ដោយក្នុងនោះ អនីតិជនដែលពាក់ព័ន្ធនឹងគ្រឿងញៀនជិត ៥០០នាក់ (៤៥២នាក់) ឬស្មើនឹង ៣៨,៨% ដែលចំនួននេះ លោកថាជាក្ដីបារម្ភមួយរបស់កម្ពុជា ខណៈចំនួនអ្នកប្រើប្រាស់គ្រឿងញៀនជាក់ស្ដែងមានច្រើនជាងរបាយការណ៍នេះទៅទៀត។
បើតាមក្រសួងមហាផ្ទៃ ឱ្យដឹងថា ក្នុងរយៈពេល ១១ខែឆ្នាំ២០២១ នេះ សមត្ថកិច្ចចាប់យកសារធាតុញៀនមានការកើនឡើងទ្វេដង បើធៀបនឹងរយៈពេលដូចគ្នាកាលពី ១១ខែឆ្នាំ២០២០។
ចំណែកអង្គការសហប្រជាជាតិ ក៏បានចេញផ្សាយរបាយការណ៍វាយតម្លៃមួយកាលពីថ្ងៃទី១០ ខែមិថុនា ឆ្នាំ២០២១ ដោយថា កម្ពុជាគឺជាគោលដៅនៃក្រុមឧក្រិដ្ឋជនគ្រឿងញៀនប្រើប្រាស់សម្រាប់ចរាចរណ៍ ផលិត និងចែកចាយគ្រឿងញៀន ហើយបើទោះបីជាមានការឆ្លងរីករាលដាលនៃជំងឺ Covid-19 ក្តី ប៉ុន្តែការចរាចរ ផលិត និងចែកចាយគ្រឿងញៀនមិនមានការថយចុះឡើយ៕