ថ្ងៃទី៧ មករា គឺជាថ្ងៃខួបលើកទី៤៣ឆ្នាំ ដែលគណបក្សប្រជាជនកម្ពុជា បានចាត់ទុកថាជាថ្ងៃដែលកងទ័ពរំដោះរបស់កម្ពុជា និងវៀតណាម បានវាយយកឈ្នះលើកងទ័ពខ្មែរក្រហមនៅក្នុងឆ្នាំ១៩៧៩ និងជាថ្ងៃកំណើតទីពីររបស់ពលរដ្ឋខ្មែរ។
នេះក៏ជាលើកទីពីរដែលគណបក្សប្រជាជនកម្ពុជា សម្រេចផ្អាកការប្រារព្ធពិធីរំឭកខួបអរគុណវៀតណាម ដែលអ្នកវិភាគលើកឡើងថា គឺជាចំណុចចាប់ផ្តើមនៃការធ្វើសង្គ្រាមនយោបាយការទូតជាមួយវៀតណាម និងបង្ហាញឲ្យមហាយក្សចិន ដែលជាខ្នងបង្អែករបស់ខ្លួនមើលឃើញថា កម្ពុជាគឺដើរតាមគោលនយោបាយចិនតែមួយ។
ជារៀងរាល់ឆ្នាំ រណសិរ្សសង្គ្រោះជាតិកម្ពុជា ដែលក្រោយមកគឺជាគណបក្សប្រជាជនកម្ពុជា តែងប្រារព្ធទិវាជ័យជម្នះលើរបបប្រល័យពូជសាសន៍ ថ្ងៃទី៧ ខែមករា យ៉ាងឱឡារិកដើម្បីរំឭកគុណប្រទេសវៀតណាម។ ប៉ុន្តែឆ្នាំនេះ គណបក្សប្រជាជនគ្រាន់តែរៀបចំផ្សព្វផ្សាយ Logo ឬបដាពាក្យស្លោកនៅតាមទីតាំងមួយចំនួនដែលបានកំណត់ប៉ុណ្ណោះ។ នេះបើយោងតាមលិខិតរបស់លោក សាយ ឈុំ អនុប្រធានគណបក្ស និងជាប្រធានគណៈប្រចាំការគណបក្សប្រជាជនកម្ពុជា ដែលផ្ញើជូនប្រធានក្រុមការងារគណបក្សនៅថ្ងៃទី១៣ ខែវិច្ឆិកា ឆ្នាំ២០២១។
បុរសខ្លាំងកម្ពុជា លោកនាយករដ្ឋមន្ត្រី ហ៊ុន សែន អះអាងក្នុងពិធីសម្ពោធអគាររដ្ឋបាលនៃអគ្គនាយកដ្ឋានគយកាលពីថ្ងៃទី២៣ ខែធ្នូ ឆ្នាំ២០២១ កន្លងទៅថា សម្រាប់ឆ្នាំ២០២២ គណបក្សប្រជាជននឹងមិនមានការប្រារព្ធពិធីអបអរសាទរខួបថ្ងៃជ័យជម្នះ ៧មករា នោះទេ ប៉ុន្តែលោកនឹងយកថ្ងៃទី៧ ខែមករា ឆ្នាំ២០២២ ដើម្បីទៅជួបជាមួយមេដឹកនាំយោធាផ្ដាច់ការភូមា មីន អ៊ុងឡាំង។
មេដឹកនាំដែលក្រាញអំណាចយូរជាងគេក្នុងលោករូបនេះអះអាងថា ការប្រារព្ធទិវានេះ បើធ្វើតូចពេកមិនសម ហើយបើធ្វើធំពេក ខ្លាចមានបញ្ហានៃការឆ្លងរីករាលដាលជំងឺ Covid-19 ដូច្នេះហើយវិធីដែលល្អ គឺយកថ្ងៃទី០៧ ខែមករា នេះ ដើម្បីធ្វើដំណើរទៅប្រទេសភូមាតែម្តង។
ថ្លែងក្នុងសារអបអរសាទរខួប ៤២ឆ្នាំនៃទិវាជ័យជម្នះ «៧ មករា ឆ្នាំ១៩៧៩» កាលពីឆ្នាំ២០២១ ហាក់ប្លែកជាងឆ្នាំកន្លងៗមក ដែលបុរសខ្លាំងកម្ពុជាធ្លាប់រំឭកពីគុណសម្បត្តិរបស់ប្រទេសវៀតណាម ក្នុងការវាយរំលំខ្មែរក្រហម ប៉ុន្តែម្តងនោះ លោកពុំបានមានសំណេរអ្វីដែលរំឭកទាក់ទងនឹងវៀតណាម នោះទេ។ បុរសខ្លាំងកម្ពុជារូបនេះបានលើកឡើងថា ៧មករា ជាថ្ងៃដែលនាំឱ្យកម្ពុជាមានការរីកចម្រើន និងមានមុខមាត់ដល់សព្វថ្ងៃ។
យោងតាមសៀវភៅ ១៣ទសវត្សនៃដំណើរកម្ពុជា ដែលសរសេរដោយបុរសខ្លាំងកម្ពុជា លោក ហ៊ុន សែន បានឲ្យដឹងថា កងទ័ពវៀតណាម បានចូលមកជួយបដិវត្តន៍កម្ពុជា ផ្ដួលរំលំរបបកម្ពុជាប្រជាធិបតេយ្យបានជោគជ័យនៅថ្ងៃទី៧ ខែមករា ឆ្នាំ១៩៧៩។ កងទ័ពស្ម័គ្រចិត្តវៀតណាម បានដកចេញបណ្តើរៗនៅឆ្នាំ១៩៨២ និងឈានទៅដកទាំងស្រុងនៅខែកញ្ញា ឆ្នាំ១៩៨៩ ដែលជាដំណាក់កាលផ្ទេរពីការប្រើប្រាស់កម្លាំងពីរគួបផ្សំគ្នាមកកាន់ដំណាក់កាលប្រើប្រាស់កម្លាំងបដិវត្តន៍កម្ពុជាផ្ទាល់ ដើម្បីរ៉ាប់រងភារកិច្ចការពារជាតិ។
នៅក្នុងសៀវភៅនោះបានសរសេរថា៖ «កម្ពុជា–វៀតណាម ជាធាតុពីរដែលមិនអាចខ្វះមួយណាបានឡើយ»។
កាលពីឆ្នាំ២០២១ នៃខួប ៧មករា ស្ថានទូតវៀតណាម ប្រចាំនៅកម្ពុជា បានសរសេរសារអំពីទំនាក់ទំនង និងវឌ្ឍនភាពរវាងប្រទេសទាំងពីរមកដល់សព្វថ្ងៃ បន្ទាប់ពីការដួលរលំទៅនៃរបបខ្មែរក្រហម។ ស្ថានទូតវៀតណាម ក៏បានរំឭកពីគុណសម្បត្តិរបស់ប្រទេសវៀតណាម ចំពោះកម្ពុជា ថា៖ «ការប្រយុទ្ធគ្នាយ៉ាងលំបាក និងដោយមានការលះបង់ខ្ពស់របស់ទាហានស្ម័គ្រចិត្តវៀតណាម ជាច្រើន កងពល និងកម្លាំងប្រដាប់អាវុធបដិវត្តន៍កម្ពុជា បានជួយឱ្យកម្លាំងប្រដាប់អាវុធកម្ពុជាខ្លួនឯងកាន់តែខ្លាំងឡើង និងអាចការពារប្រទេសបាន»។
ភាពជាក់ស្តែងនេះ យោងតាមកិច្ចព្រមព្រៀងរវាងបក្ស និងរដ្ឋនៃប្រទេសទាំងពីរនាឆ្នាំ១៩៨៩ វៀតណាមបានសម្រេចដកកងទ័ពស្ម័គ្រចិត្តទាំងអស់ដែលបានបំពេញកាតព្វកិច្ចអន្តរជាតិដ៏រុងរឿងរបស់ខ្លួនពីកម្ពុជា។
កាលពីឆ្នាំមុន ទាំងលោក សម រង្ស៊ី និងលោក កឹម សុខា ដែលជាមេដឹកនាំអតីតគណបក្សប្រឆាំងមិនបានបញ្ចេញសារអ្វីឡើយនៅថ្ងៃនោះ។
អ្នកជំនាញកិច្ចការអន្តរជាតិ និងជាព្រឹទ្ធបុរសរងនៃសាកលវិទ្យាល័យរដ្ឋអារីហ្សូណា បណ្ឌិត អៀ សុផល បានប្រាប់កាសែត The Cambodia Daily ឲ្យដឹងថា លោកគិតថានេះជាការរួមបញ្ចូលគ្នានៃជំងឺ Covid-19 ប៉ុន្តែអ្វីដែលកម្ពុជាមិនប្រារព្ធពិធីនេះ ក៏សម្លឹងមើលទៅខាងភាគីចិនដែរ។ លោកប្រាកដថា ចិនមិនចង់ឃើញកម្ពុជានៅតែបន្តប្រារព្ធពិធីរំដោះជាតិដោយអរគុណវៀតណាមនោះទេ។ លោកបន្តថា ការដែលកម្ពុជាមិនប្រារព្ធធ្វើពិធីនេះ គឺជារឿងល្អសម្រាប់ចិន និងកម្ពុជា។
ចំណែកឯលោក ថាច់ សេដ្ឋា អតីតសមាជិកព្រឹទ្ធសភាគណបក្សសង្គ្រោះជាតិ ដែលបានសម្រេចចូលរួមនយោបាយជាមួយគណបក្សភ្លើងទៀន បានប្រាប់សារព័ត៌មានក្នុងស្រុកកន្លងមកថា គណបក្សរបស់លោកបានចាត់ទុកថា ថ្ងៃ៧មករា គឺជាថ្ងៃដែលប្រទេសវៀតណាម ឈ្លានពានប្រទេសកម្ពុជា។ លោកថា៖ «ក្នុងនាមគណបក្សប្រឆាំង ថ្ងៃ៧មករា គឺនៅតែចាត់ទុកថាជាថ្ងៃដែលវៀតណាម ឈ្លានពានដដែល ពីព្រោះបើគ្មានពួកវៀតណាមបង្កើតបក្សកុម្មុយនីស្តកម្ពុជា ក៏គ្មានការកាប់សម្លាប់ពលរដ្ឋខ្មែរដ៏រង្គាលនេះដែរ។ ដូច្នេះហើយអ្នកសម្លាប់ និងអ្នកជួយខ្មែរ ក៏ជាក្រុមតែមួយ»។
នៅថ្ងៃទី៨ ខែមករា ឆ្នាំ១៩៧៩ មួយថ្ងៃក្រោយពីរបបកម្ពុជាប្រជាធិបតេយ្យ ឬហៅថារបបខ្មែរក្រហមត្រូវដួលរលំ ក្រុមប្រឹក្សាប្រជាជនបដិវត្តន៍កម្ពុជា ត្រូវបានបង្កើតឡើងដើម្បីដឹកនាំប្រទេសកម្ពុជាក្រោមអាណាព្យាបាលរបស់វៀតណាម។ សាធារណរដ្ឋប្រជាមានិតកម្ពុជា ត្រូវបានបង្កើតឡើងជាផ្លូវការនៅថ្ងៃទី១២ ខែមករា ដោយមានលោក ហេង សំរិន ជាប្រធានក្រុមប្រឹក្សារដ្ឋ មានឋានៈស្មើនឹងប្រមុខរដ្ឋ និងលោក ប៉ែន សុវណ្ណ ជាប្រធានក្រុមប្រឹក្សាគណៈរដ្ឋមន្ត្រី មានឋានៈស្មើនឹងនាយករដ្ឋមន្ត្រី។
នៅថ្ងៃទី១៧ ខែមករា ឆ្នាំ១៩៧៩ រដ្ឋាភិបាលសាធារណរដ្ឋប្រជាមានិតកម្ពុជា និងរដ្ឋាភិបាលសាធារណរដ្ឋសង្គមនិយមវៀតណាម បានចុះហត្ថលេខាលើសន្ធិសញ្ញាមិត្តភាពសម្រាប់រយៈពេល ២៥ឆ្នាំ។
តាមរយៈសន្ធិសញ្ញានេះ បក្សប្រជាជនបដិវត្តន៍កម្ពុជា បានសុខចិត្តទទួលយកអាណាព្យាបាលវៀតណាមនៅកម្ពុជា ដោយអនុញ្ញាតឲ្យកងទ័ពវៀតណាមប្រមាណ ១៥ម៉ឺននាក់ឈរជើងនៅលើទឹកដីកម្ពុជា។ នៅក្នុងផ្នែកស៊ីវិលវិញ វៀតណាមបានដាក់អ្នកជំនាញការនៅតាមគ្រប់មន្ទីរ ក្រសួងនៃរដ្ឋាភិបាលសាធារណរដ្ឋប្រជាមានិតកម្ពុជានៅពេលនោះ៕