អ្នកតាមដានស្ថានការណ៍នយោបាយនៅប្រទេសកម្ពុជា បានលើកឡើងថា ការស្វះស្វែងរបស់ប្រមុខការទូតប្រទេសលោកសេរីនៅកម្ពុជាចូលជួបសួរសុខទុក្ខ និងពិភាក្សាពីស្ថានភាពនយោបាយ សិទ្ធិមនុស្សនៅកម្ពុជាជាមួយលោក កឹម សុខា អតីតប្រធានគណបក្សសង្គ្រោះជាតិ ដែលកំពុងរងការរឹតត្បិតសេរីភាពនេះ គឺបង្ហាញថាប្រទេសលោកសេរីបន្តឆន្ទៈទាមទារឱ្យមានការគោរពសិទ្ធិមនុស្ស និងប្រជាធិបតេយ្យត្រឹមត្រូវពិតប្រាកដមួយឡើងវិញ។
នាយកប្រតិបត្តិអង្គការអភិវឌ្ឍន៍ផ្នត់គំនិត បណ្ឌិត សេក សុជាតិ ថាសកម្មភាពជួបជជែកសួរសុខទុក្ខជាមួយអតីតមេដឹកនាំបក្សប្រឆាំងរូបនេះ គឺជាការពង្រឹងទំនាក់ទំនងការទូត ហើយក៏ជាសញ្ញាប្រាប់ទៅអ្នកស្រឡាញ់លទ្ធិប្រជាធិបតេយ្យនៅកម្ពុជា ថាមិននៅឯកោទេ ទោះសិទ្ធិពួកគេកំពុងរងការគំរាមកំហែងក៏ដោយ។
លោក សេក សុជាតិ បានលើកឡើងថា ទំនាក់ទំនងនោះអាចជាការលើកទឹកចិត្តអ្នកប្រជាធិបតេយ្យអាចធ្វើកិច្ចការរបស់ខ្លួនបានល្អប្រសើរជាងបច្ចុប្បន្ន ហើយអាចបន្តឆន្ទៈយ៉ាងណាដើម្បីទាមទារឱ្យមានការគោរពសិទ្ធិមនុស្ស និងប្រជាធិបតេយ្យត្រឹមត្រូវពិតប្រាកដមួយឡើងវិញ។
អតីតប្រធានគណបក្សសង្គ្រោះជាតិ លោក កឹម សុខា ដែលកំពុងរងការរឹតត្បិតសេរីភាព បានសរសេរនៅលើបណ្ដាញសង្គម Facebook របស់លោកនៅថ្ងៃទី១២ ខែមករា ក្រោយពីជួបសន្ទនាអាហារថ្ងៃត្រង់នៅក្នុងស្ថានទូតបារាំង ប្រចាំនៅរាជធានីភ្នំពេញ តាមការអញ្ជើញរបស់លោក Jacques PELLET ឯកអគ្គរដ្ឋទូតថ្មីនៃសាធារណរដ្ឋបារាំង ប្រចាំនៅកម្ពុជា ថាការទទួលទានអាហារពិភាក្សាការងារពេលនេះមានសារសំខាន់ណាស់។
លោកថា ជាការកត់សម្គាល់តាមរយៈការពិភាក្សាក្នុងជំនួបជាបន្តបន្ទាប់ជាមួយលោក គឺជាតំណាងផ្លូវការនៃប្រទេសដែលប្រកាន់យកប្រជាធិបតេយ្យ សិទ្ធិមនុស្ស និងសេរីភាពជាគុណតម្លៃស្នូលរបស់គេ ហើយគេនៅតែចង់ជួយខ្មែរបន្តទៀតស្របតាមគុណតម្លៃស្នូលរបស់គេ។
នាយិកាប្រតិបត្តិមជ្ឈមណ្ឌលសិទ្ធិមនុស្សកម្ពុជា អ្នកស្រី ចក់ សុភាព ប្រាប់សារព័ត៌មានក្នុងស្រុកថា មានដំណើរទស្សនកិច្ចរបស់តំណាងប្រទេសលោកសេរីសំខាន់ៗជាច្រើនមកកម្ពុជា អាចជាការជួយកាត់បន្ថយការរំលោភបំពានសិទ្ធិមនុស្សនៅកម្ពុជាខ្លះដែរ។ អ្នកស្រីថា ពេលនេះគួរតែមានការលះបង់របស់អ្នកនយោបាយ ពិសេសពីភាគីពាក់ព័ន្ធ ដោយបង្កើតវប្បធម៌នយោបាយមួយមិនយកគូប្រជែងជាសត្រូវស្លាប់រស់ ហើយគួរតែមានការកសាងវប្បធម៌ថ្មី គឺវប្បធម៌ជាតិនិយមតែមួយ។
លោក កឹម សុខា ត្រូវបានសមត្ថកិច្ចចាប់ខ្លួនទាំងយប់កាលពីថ្ងៃទី៣ ខែកញ្ញា ឆ្នាំ២០១៧ នៅគេហដ្ឋានរបស់លោក ស្ថិតនៅខណ្ឌទួលគោក រាជធានីភ្នំពេញ ដោយអាជ្ញាធរចោទថាពាក់ព័ន្ធនឹងការប្រព្រឹត្តអំពើ «ក្បត់ជាតិ» ឃុបឃិតជាមួយបរទេសផ្ដួលរំលំរាជរដ្ឋាភិបាល។
លោក កឹម សុខា ត្រូវបានឃុំខ្លួននៅក្នុងពន្ធនាគារត្រពាំងផ្លុង ខេត្តត្បូងឃ្មុំ រយៈពេលជាង ១ឆ្នាំ ទើបដាក់ឱ្យស្ថិតនៅក្រោមការត្រួតពិនិត្យ។ លោកត្រូវបានតុលាការដកសិទ្ធិធ្វើនយោបាយទាំងស្រុងជាង ៤ឆ្នាំមកហើយ៕