អតីតប្រធានចលនាយុវជនរបស់គណបក្សសង្គ្រោះជាតិ ប្រចាំប្រទេសកូរ៉េខាងត្បូង នឹងវិលត្រឡប់មកប្រទេសកម្ពុជាវិញនៅចុងសប្ដាហ៍នេះ ដោយមិនបារម្ភពីការចាប់ខ្លួននោះទេ បើទោះបីជាតុលាការក្រុងភ្នំពេញនឹងប្រកាសសាលក្រមនៃសំណុំរឿងរបស់លោកនៅដើមសប្ដាហ៍ក្រោយនេះក្ដី។
អតីតប្រធានចលនាយុវជនប្រចាំប្រទេសកូរ៉េខាងត្បូង លោក យឹម ស៊ីណន បានប្រាប់សារព័ត៌មាន The Cambodia Daily នៅថ្ងៃព្រហស្បតិ៍ ទី១៣ ខែមករា នេះថា លោកនឹងវិលត្រឡប់មកកម្ពុជានៅថ្ងៃទី១៥ ខែមករា ឆ្នាំ២០២២ ខាងមុខនេះ ដោយមិនបារម្ភពីការចាប់ខ្លួននោះទេ។ លោកបន្តថា លោកត្រូវមករួមរស់ជាមួយក្រុមគ្រួសារវិញ ហើយលោកក៏មិនចង់ទៅរស់នៅប្រទេសផ្សេងទៀតក្រៅពីប្រទេសកំណើតរបស់ខ្លួននោះដែរ។
លោកបានលើកឡើងថា ការវិលត្រឡប់ទៅរស់នៅកម្ពុជាវិញនេះ គឺមិនមានមូលហេតុអីផ្សេងក្រៅពីការចង់រស់នៅជុំក្រុមគ្រួសារលើទឹកដីកំណើតរបស់លោកវិញនោះទេ ពីព្រោះលោកមិនដែលមានបំណងចង់រស់នៅប្រទេសទី២ ឬទី៣ ឡើយ។ លោកថា សាលក្រមជម្រះរឿងក្ដីលោក នឹងត្រូវប្រកាសនៅថ្ងៃទី១៧ ខាងមុខនេះ តែលោកនៅតែសង្ឃឹមថា តុលាការនឹងទម្លាក់ចោលនូវរាល់បទចោទទាំងឡាយលើរូបលោក ព្រោះថាលោកមិនមានទោសកំហុសអ្វីដូចការចោទប្រកាន់នោះឡើយ។
នេះជាសម្ដីផ្ទាល់របស់លោក យឹម ស៊ីណន ដែលបានផ្ញើមកឲ្យ The Cambodia Daily «ពិតណាស់ ខ្ញុំនឹងត្រឡប់ទៅកម្ពុជាវិញនៅថ្ងៃសុក្រ ទី១៤ ចុងសប្តាហ៍នេះហើយ។ នយោបាយប្រៀបបានជាឆ្នាំងបាយរបស់ពលរដ្ឋម្ចាស់ប្រទេស ដូច្នេះការមិនគិតគូរ ឬប្រឡូកក្នុងនយោបាយរបស់ពលរដ្ឋ ស្មើនឹងការមិនគិតពីឆ្នាំងបាយខ្លួនឯងអ៊ីចឹងដែរ»។
លោកបន្តថា «សម្រាប់ជំហររួមផ្សំនឹងការស្រឡាញ់វិស័យនយោបាយផងនោះ ខ្ញុំនៅតែបន្តធ្វើនយោបាយសម្រាប់បម្រើដល់ប្រយោជន៍ជាតិ និងប្រជាជន។ ប៉ុន្តែក្នុងស្ថានការណ៍នយោបាយក្នុងប្រទេសកំពុងស្ថិតក្នុងជម្លោះនៃការខ្វែងទស្សនៈគ្នាបង្កជាកម្តៅឆេះរោលបែបនេះ ខ្ញុំមិនទាន់មានគោលដៅក្នុងការប្រឡូកក្នុងនយោបាយនៅឡើយទេ ខ្ញុំនឹងរង់ចាំមើលស្ថានការណ៍ធូរស្រាលបន្តិចសិន ចាំគិតទៀត។ ម្យ៉ាងវិញទៀត ដោយសារបែកពីគ្រួសារយូរ ខ្ញុំចង់យកពេលវេលាឲ្យបានច្រើន ដើម្បីនៅជាមួយគ្រួសារមួយរយៈផងដែរ។ ការវិលត្រឡប់ទៅរស់នៅកម្ពុជាវិញនេះ អត់មានមូលហេតុអីផ្សេងក្រៅពីការចង់រស់នៅជុំក្រុមគ្រួសារលើទឹកដីកំណើតជាទីស្រឡាញ់របស់ខ្ញុំនោះទេ។ ព្រោះខ្ញុំមិនដែលមានបំណងចង់រស់នៅប្រទេសទី២ ឬទី៣ ក្រៅពីកម្ពុជានោះទេ។ តុលាការបានបើកជម្រះក្តីខ្ញុំ និងអតីតសហការីកាលពីថ្ងៃទី១០ ខែមករា រួចហើយ សាលក្រមនឹងប្រកាសនៅថ្ងៃទី១៧ ខាងមុខនេះ ខ្ញុំនៅតែសង្ឃឹមថាតុលាការនឹងទម្លាក់ចោលនូវរាល់បទចោទទាំងឡាយមកលើរូបខ្ញុំ ព្រោះខ្ញុំមិនមានទោសកំហុសអ្វីដូចការចោទប្រកាន់នោះឡើយ។ ក្នុងស្ថានភាពនេះ ខ្ញុំចង់យកពេលវេលានៅជាមួយគ្រួសារឲ្យបានច្រើនសិន រឿងបក្សនយោបាយខ្ញុំនៅមិនទាន់បានគិតនៅឡើយទេ»។
កាលពីថ្ងៃទី២៩ ខែកញ្ញា ឆ្នាំ២០២១ លោក យឹម ស៊ីណន និងក្រុមរបស់លោកចំនួន ៩នាក់ផ្សេងទៀត បានផ្ញើលិខិតមួយស្នើសុំកិច្ចអន្តរាគមន៍ទៅលោកនាយករដ្ឋមន្ត្រី ហ៊ុន សែន ឱ្យដកការចោទប្រកាន់ទាំងឡាយទៅលើពួកគេដែលជាប់ពាក់ព័ន្ធនឹងព្រឹត្តិការណ៍វិលចូលស្រុករបស់លោក សម រង្ស៊ី កាលពីថ្ងៃទី៩ ខែវិច្ឆិកា ឆ្នាំ២០១៩។
លិខិតរបស់លោក យឹម ស៊ីណន ពេលនោះ ត្រូវបានលោកនាយករដ្ឋមន្ត្រី ហ៊ុន សែន ប្រគល់ជូនទៅលោក កើត រិទ្ធ រដ្ឋមន្ត្រីក្រសួងយុត្តិធម៌ ដើម្បីពិនិត្យមើល និងដោះស្រាយ ប៉ុន្តែមកទល់ពេលនេះ តុលាការនៅមិនទាន់សម្រេចបែបណានៅឡើយទេ៕